Ni xi akakoo̱ 1

Ni xi akó Néná Jesukristoo̱

1Kuí bí ni xi akó Jesukristoo̱, kui ni xi Néná katsjaá, tsi̱ꞌe̱ nga kui ko̱ko̱ó mosoo̱ kjo̱a̱a̱ ni xi sꞌe̱ je tsá ka̱ma, Jesukristoo̱ katsangiya ngo ndítsjiee̱ tsi̱ꞌe̱ nga akoó mosoo̱ xi ꞌmí Juaa̱ ni xi sꞌe̱ je tsá ka̱ma, 2kuí Juaa̱ xi katsóyà eén Néná, ko̱jo kuí boá xi chistikoo̱ Jesukristoo̱, ko̱jo ngayeje ni xi je kamábee̱.

3Achichíra̱ tsjaa̱ xi tsꞌènyà, ko̱jo xi ntꞌié nga tjíniꞌányá kui én xi tsóyà ni xi sꞌe̱ ka̱maa̱, ko̱jo xi tsꞌénkjátjosón én xí Néná tsóyà, xi kjitꞌa kui xo̱jo̱o̱n, ngatꞌa̱ jè kjimatiña ni̱xtjii̱n.

Juaa̱ tsꞌentínde nga yito xota̱ na̱ngo̱xi̱i̱

4Juaa̱ tsꞌentínde nga yito na̱ngo̱xi̱ xi chji̱a̱ni nangi Asia̱: Chjábéjnú kjo̱a̱nda ko̱jo kjo̱a̱xió xi katsangiyajnú kui xi je kuii̱, kui xi kui kamaá, ko̱jo kui xi sꞌe̱ ndibaá, ko̱jo xi katsangiyajnú nga yito a̱siénni̱xtjin xi síndo kje̱n nínga tikón Néná xí botixómaá, 5ko̱jo xi katsangiya Jesukristoo̱, chistiko̱ xi ꞌniátakoón, kuí boá ndí tjón xi jaꞌáꞌyaá, ko̱jo xi tjiín xá nga botixómaá ngayeje re xi chji̱a̱ni tꞌanangii̱. Kristoo̱ tjoó ñá, kó kuí boá xi índondéná kjo̱a̱a̱ jéná nga iskjitjón jiín, 6kó kuí boá xi botixómáná, ko̱jo xi katsꞌénná chináꞌmi xi tsꞌén xaá Nee̱, kui xi Na̱ꞌmii̱. ¡Kjo̱a̱jee̱ Néná, ko̱jo ngaꞌniuú kui tsi̱ꞌe̱ ngatama ngatsjéni̱xtjin! Bo̱a̱ kjiꞌi.

7Jéꞌe̱n, kꞌi̱e̱ tsꞌéndibájin ngi̱jin ṉdi̱i̱, kó ngayeje ndyikon xi sku̱i̱e̱, ngaskande xota̱ xi katsꞌénꞌoón, ko̱jo ngayeje tji̱e̱e̱ xota̱ xi tjín kuí tꞌanangii̱, kó skja̱ndá ta̱ngatꞌanii̱ kui. Jo̱o̱n, bo̱a̱ kjiꞌi.

8“Án boá xi alfaa̱ ko̱jo xi omengaa̱, xi tjón ko̱jo xi fetꞌanii̱, xi kui, ko̱jo xi kui kamaá, ko̱jo xi jaskan ndibaá”, tsó Ndi̱a̱ná xí tsi̱ꞌe̱ ngayeje ngaꞌniuú.

Ngo ni xi akako kjo̱a̱a̱ ndií nda̱ xi̱ꞌii̱n

9An, Juaa̱, ntsꞌiejnú, kó ta̱ngatꞌanii̱ nga nijan ikitjatió kuí kjo̱a̱ni̱ma̱a̱, ngi̱yaa̱ nínga botixómá Néná, ko̱jo ta̱ngatꞌanii̱ kjo̱a̱chiyákoón Jesukristoo̱, nga ki̱a̱ kisꞌijña an tji̱ngi̱ xi ꞌmí Patmo̱, ta̱ngatꞌanii̱ eén Néná xí chji̱a̱ kjo̱a̱a̱ Jesukristoo̱. 10Ngo ndi̱yà nga ni̱xtjin nga niꞌándikón Ndi̱a̱ná, A̱si̱énni̱xtjii̱n Néná kisꞌijñajo̱na, kó nga̱xto̱n án tsintꞌie an ngo nda̱ xi ꞌniú tsíchji̱a̱ xikó maá ngo tjio, 11xi bi̱ katsóna:

–Ngo xo̱jo̱n tꞌítꞌe ji kui ni xi tiye ji, kó nangíyée̱ nga yito na̱ngo̱xi̱ xi chji̱a̱ni nangi Asia̱: Kui xi Éfesoo̱, Esmirnaa̱, Pérngamoo̱, Tiatiraa̱, Sarndii̱, Filandelfiaa̱ ko̱jo Laondiseaa̱.

12Katsꞌenkꞌafóya an tsi̱ꞌe̱ nga skuie an ꞌyá kuií bo̱a̱ nda̱ xi tsꞌénchji̱a̱jona, kó bo̱a̱ tsꞌén kamábe an yito ni xi ꞌbítíyá ndiꞌí xí tsꞌentsíjee̱n xi to̱nsinié kamándani, 13kó ngamasiee̱n nga yito kui ni xi ꞌbítíyá ndiꞌí xí tsꞌentsíjee̱n, kamábe an ngo xi ja̱kjiꞌi ndií nda̱ xi̱ꞌii̱n má kjiꞌi, xi yajá ngo ńjñondio xi fochó ngaskande se, kó ngo tji̱xin xí to̱nsinié tjíkjaá xtji̱e̱e̱n ni̱se̱e̱n, 14tsja̱a̱ tiboa xó xó xikoó tsa̱nga̱a̱, ko̱jo xikoó nchꞌaàn, kó ndyi̱ko̱n xikó maá ndiꞌií, 15se jaꞌatꞌe ꞌna̱ ꞌna̱, xikó maá ki̱cha̱ bronse̱ xi kiniꞌánꞌna̱a̱, xikó maá nga tjíniꞌánńdá ngi̱yaa̱ ngo orjno̱, kó nda̱a̱ achichí ꞌniú kandaꞌyá, xikó maá nga fonie ngo ngi̱ndie nínga ꞌbóka ndáfoaa̱, 16ngi̱ya tsja kixi̱ tsꞌényaꞌa yito ńño, kó ngi̱ya tsꞌoa jatjo ngo ki̱cha̱ xi yojó nga jó ngoboaá, kó kje̱n bo̱a̱ má kjiꞌi xikó maá nga ꞌniú tíngá ndoboaá.

17Nga kamábe an, tsꞌákatójó an ngindie se xikó maá tsi kꞌien an, ta̱nga kui íjñasónna tsja kixi̱, kó bi̱ katsóna:

–Ngata̱ ndakinjín ma ji, án boá xi tjón an ko̱jo xi fetꞌa an, 18ko̱jo án boá xi tikòn an, kꞌien án ngasꞌe̱, ta̱nga ngotꞌe̱, tikòn án ngatsjéni̱xtjin, kó án boá xi tikónna yibii̱ nínga botíxomaa̱ kjo̱a̱bo̱yaa̱. 19Ti̱ꞌinꞌindé ji ni xi je kamáyè ji: Ni xi tikón ngotꞌe̱, ko̱jo ni xi kꞌuié jaskan. 20Kuí bí ni xi tjiꞌmaá nga yito ńño xi je kamáyè ji ngi̱ya ndsa̱ an, ko̱jo nga yito ni xi ꞌbítíyá ndiꞌí xí tsꞌentsíjee̱n xi to̱nsinié xi je kamáyè: nga yito ńñoo kuí boá xi ndítsjiee̱ nga yito na̱ngo̱xi̱i̱, kó nga yito ni xi ꞌbítíyá ndiꞌí xí tsꞌentsíjee̱n kuí boá xi yito na̱ngo̱xi̱i̱.

Currently Selected:

Ni xi akakoo̱ 1: MAIX

Highlight

Compare

Copy