Xo̱jo̱n Salmoo̱ 9
9
Kjo̱a̱kixi̱i̱ Néná
Só xi katsꞌénda Ndabii̱.
1Ji Ne, ngayejení ini̱ma̱na nga sa̱ꞌintsjaà Jí,
xiyáni̱jmì án ngayeje ni xi fíndikónná xí niꞌín Ji.
2Tsjakꞌuiéna ko̱jo tsja ka̱mana ta̱ngatꞌanii̱ Ji,
siée̱ só Jaꞌée̱n ji Ne xi tindyin ji ki̱a̱ ndiꞌakꞌajmii̱.
3Kjiꞌanga kijíꞌoyá nginí kondra̱na, ixó, kó ki̱a̱ jesón ngindyikin Ji,
4ngatꞌa̱ Jí boá xi titsitsijìi̱n kjo̱a̱ xi tsa̱ꞌa̱n,
kó tiboeꞌéní kjo̱a̱nda xi tjínna.
Ne xi kixi̱ boá ji, kó jè tibotíxome ji nga tindyinsén ji yáxíríe̱ ndikóo̱n.
5Kiniꞌínxchínje̱ ji xota̱ na̱xi̱ńdaá,
kiniꞌínkjisén ji xota̱ xi ndajiín,
kó kiniꞌínkjié ji jaꞌeén ngatsjéni̱xtjin.
6Jè kichajá kondraa̱, jè kisꞌińdomasien ngatsjéni̱xtjin.
Kiniꞌínkjatsén jí na̱xi̱ńdáꞌniuú, kó ki̱a̱ nijan jesónjo̱ kjo̱a̱foaꞌátsjiee̱n.
7Ta̱nga Néná, ngatsjéni̱xtjin nga tikón,
kó jè tikóndaa̱ yáxíríe̱ nínga botixómá nga sa̱ꞌínjeé xotaa̱.
8Kó kixi̱ tsꞌén sa̱ꞌínjeé xota̱ na̱xi̱ńdá xí tjín nga̱sondiee̱,
kó ta̱ són sa̱ꞌínjo̱ na̱xi̱ńdaá nga sa̱ꞌínjeé.
9¡Néná boá xi ngakoo̱n xota̱ xi ndajín mataꞌii̱n,
kó kuí tsja̱angaꞌniuú xotaa̱ kjiꞌanga nda̱ ka̱maa̱!
10Jí boá xi ka̱maꞌniátakoón xota̱ xi be Jaꞌée̱n,
ngatꞌa̱ ji Ne, jmíni̱xtjin ꞌbíndemasin Ji xi Ji mongasee̱.
11¡Ndàjnúu̱ salmo̱ kui Néná xí tikón na̱xi̱ńdáꞌniú Sioo̱n!
¡Tꞌíyájnú ngi̱jii̱n ngayeje xota̱ na̱xi̱ńdaá ngayeje ni xi je katsꞌén Kuí!
12Ngatꞌa̱ Kui xi tsꞌéngojo nga niꞌánkjiesón xota̱ xi jmí jéjiín, jè jaꞌátsjiee̱n kui,
kó kji̱e̱ chíyájiín nga ni̱ma̱ ndyi̱tsó xota̱ xi ndyi̱foaꞌatio kjo̱a̱ni̱ma̱a̱.
13Ji Ne, ngatama ni̱ma̱a̱ an.
Tsitsíjìi̱n kjo̱a̱ni̱ma̱ xi tsꞌénfoaꞌatio an, ta̱ngatꞌanii̱ kui xota̱ xi chꞌoo̱ an.
Jí boá xi katseꞌéndièjín ji nga ki̱a̱ jachó an nga̱ntjo̱a̱a̱ kjo̱a̱bo̱yaa̱,
14tsi̱ꞌe̱ nga ka̱ma sa̱ꞌintsjaà Ji ngindyi̱ko̱n ngayeje xotaa̱,
ki̱a̱ nga̱ntjo̱a̱a̱ na̱xi̱ńdáꞌniú Sioo̱n,
ko̱jo nga tsjakꞌuiéna kjo̱a̱a̱ nga Ji xi kaꞌnaxiéꞌéní.
15Xota̱ na̱xi̱ńdá xí bejiín Jí, ti̱kuii ixóyà ti̱xa̱ xi kui katsꞌénda,
ki̱a̱ kisitsakjájin se kui nda̱ꞌya xi ti̱kuii yején ꞌmá.
16Néná jè akó yojoo̱, kó kixi̱ tsꞌén je katsꞌénseén xotaa̱.
Xota̱ xi ꞌniú ndajiín, ti̱kuíní xi ixóyà, ni xi kui katsꞌénda.
17¡Ngatjiesón xota̱ xi ꞌniú ndajiín,
ko̱jo ngayeje xota̱ na̱xi̱ńdá xí je katsꞌénchíyaá Ji Ne!
18Ngatꞌa̱ jmí tsi ngatsjéni̱xtjin nga si̱ꞌanchíyá xota̱ ni̱ma̱a̱,
ti̱nde jmí tsi ngatsjéni̱xtjin nga xcha̱ja kjo̱a̱chiyaá xota̱ xi ndyi̱foaꞌatio kjo̱a̱ni̱ma̱a̱.
19¡Ye ꞌne̱ Ne, ti̱sítji̱n Ji, kó nga boeꞌéndièjín xota̱ nga̱sondiee̱ xi sa̱ꞌiín!
¡Ngindyikin Ji nganiꞌánjeé na̱xi̱ńdaá!
20¡Tꞌíjìi̱n ndikón tsi̱ꞌe̱ nga sku̱i̱e̱ndikoón Ji Ne,
kó ngatamabe kui xotaa̱ nga ta̱ xota̱ tsí bo̱a̱!
Currently Selected:
Xo̱jo̱n Salmoo̱ 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
