Xo̱jo̱n Salmoo̱ 80
80
¡Takejne̱ kjo̱a̱ndàa̱!
Só xi katsꞌénda Asaa̱f.
1Ji Ne xi koo̱n xota̱ Israee̱l, ndaꞌyé Ji.
Ji xi tińtje̱tjée̱n xota̱ tji̱e̱e̱ Kosiee̱, xikoó tsi ngo xtín cho̱tsa̱nga̱,
Ji xi ki̱a̱ botíxome Ji ngi̱jii̱n keruu̱b. ¡Take Ji ngaꞌniúu̱!
2Ngindyi̱ko̱n xota̱ tji̱e̱e̱ Efraii̱n, ko̱jo xota̱ tji̱e̱e̱ Benjaa̱, ko̱jo xota̱ tji̱e̱e̱ Manasee̱.
¡Take Ji ngaꞌniúu̱, kó ndibé ꞌna̱xiéꞌéjne̱!
3¡Ji Ne, ti̱ꞌintja̱tsi̱e̱ye nginíjne̱!
¡Takejne̱ ndiꞌí ꞌna̱a̱ kje̱n Ji, kó kjo̱tjoꞌajne̱!
4Ji Ne xi tsi̱ꞌe̱ jájuún,
ngaskande kjiꞌání nga to̱kó si̱ꞌinxchín Jí,
kondraa̱ nga Ji ndyi̱chji̱a̱a̱ xota̱ na̱xi̱ńdáa̱.
5Ngindiee̱ nga nichinie xi ko̱e̱ꞌée̱,
ta̱sá pan xi tjiín ndándyíkon katseꞌée̱,
ko̱jo ngindiee̱ nga ni xi ꞌyó ko̱e̱ꞌée̱,
ta̱sá achichí ndándyíkón katseꞌée̱ nga katsꞌe.
6Jí boá xi kiniꞌín Ji nga xota̱ tꞌa ndiꞌajne̱ tsajnókiejne̱,
ko̱jo nga kondra̱jne̱ ti̱kuii tsajnójo̱ xkjín.
7¡Ji Ne xi tsi̱ꞌe̱ jájuún, ti̱ꞌintja̱tsi̱e̱ye nginíjne̱!
¡Takejne̱ ndiꞌí ꞌna̱a̱ kje̱n Ji, kó kjo̱tjoꞌajne̱!
8Ji̱n boá xi xikoó ńꞌniú tostsi̱jè xí kjindibéje̱ni Ji ki̱a̱ nangi Ejiptoo̱,
tsi̱ꞌe̱ nga kꞌi̱e̱ ikꞌítji̱e̱ Ji kui tꞌanangii̱, kó ikiyitji̱ngìi̱ xota̱ na̱xi̱ńdaá.
9Kiniꞌíntsjie tꞌanangii̱ tsi̱ꞌe̱ kui tostsi̱je̱è,
kó kisꞌiee̱ ja̱ma̱, sꞌe̱ kisꞌikitsieni ngayeje tꞌanangii̱.
10Tji̱nkꞌi̱e̱én kisiꞌmani na̱xi̱i̱,
kó yákón xi tsi̱ꞌe̱ Néná kisiꞌmani ꞌyo̱o̱.
11Katsꞌénkjín ndií kui tostsi̱je̱è ngaskande nga jachó ndáchíkoón,
kó ꞌyo̱o̱ ngaskande ndejeèꞌ jachó.
12Ji Ne, ánní nga kiniꞌínkixóndé Jí xó xí tjíchjáꞌyáni,
nga ngayeje xota̱ xi foaꞌaa̱ ꞌboje̱n too̱ kui tostsi̱jèe̱.
13Chi̱nga̱ kꞌijñaá je katsꞌénkjatsón,
kó ngayeje cho̱ tamaá ndyi̱tsꞌènkjié.
14Ji Ne xi tsi̱ꞌe̱ jájuún, ꞌniú chjiáꞌájne̱ nga ndibékasíke̱je nginíjne̱,
tsitsíjin Ji ndeskande nkꞌajmii̱, ti̱ꞌinkjé Jí, kó ndibé tsitsíjìi̱n kui jno̱ tostsi̱je̱è.
15Kuí boá kui xka̱ xi ndse̱ kixi̱ má Ji xi ítji̱e̱,
ko̱jo kui ꞌyo̱ xi tse̱, xi Ji katseꞌéngaꞌníi̱.
16¡Jè ikichá kó je ikꞌítí,
je kjifesón ta̱ngatꞌanii̱ nga kamábe nga tamá tikón kje̱n Ji!
17¡Tasíke̱je Ji kui nda̱ xi Ji kachjeꞌéjin Ji,
kui ndií nda̱ xi̱ꞌin xi Ji katseꞌéngaꞌníi̱!
18Bo̱a̱ tsí tsꞌén nga si̱ꞌankjinjínjne̱ yojojne̱ Ji.
¡Te̱ꞌéndièjne̱ nga ku̱i̱ndyion ngasejne̱ nga̱sondie, kó si̱ꞌankaxomajne̱ Jaꞌée̱n!
19Ji Ne xi tsi̱ꞌe̱ jájuún. ¡Te̱ꞌéndiè Ji nga kji̱ndi̱báchon nginíjne̱ Ji!
¡Te̱ꞌéndiè Ji nga xcha̱jne̱ xcha̱ ꞌna̱ ꞌna̱ ji̱n kje̱n Ji, tsi̱ꞌe̱ nga kjo̱tjoꞌajne̱!
Currently Selected:
Xo̱jo̱n Salmoo̱ 80: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
