Xo̱jo̱n Salmoo̱ 81
81
Néná achichí nda tsꞌénjo̱ xota̱ na̱xi̱ńdaá
Só xi katsꞌénda Asaa̱f.
1¡Tsjangatamajnú nga ko̱ndàjnúu̱ Néná,
ngatꞌa̱ kuí boá xi tsjangaꞌniúná!
¡Chaꞌayàmájnú nga tsjangatꞌiéjnú nga si̱ꞌantsjàjnúu̱, Nee̱ Jakoo̱b!
2Ndàjnúu̱ salmo̱, kó ti̱ꞌankjaniéjnú panderoo̱,
ko̱jo arpaa̱, ko̱jo salterioo̱.
3Ti̱ꞌankjaniéjnú tjioo̱ kjiꞌanga si̱ꞌánjnú sꞌué nga chjindié saá,
ko̱jo nga si̱ꞌánjnú sꞌué nga ńtsó saá,
ko̱jo ni̱xtjin nga si̱ꞌánjnú sꞌué ndikónná.
4Ngatꞌa̱ kjo̱a̱kiti boá kui nii̱ tsi̱ꞌe̱ xota̱ Israee̱l,
kó Nee̱ Jakoo̱b boá xi bo̱a̱ tsꞌén atíxomaa̱.
5Kuí boá xi ngo kjo̱a̱kiti íjñá tsi̱ꞌe̱ xota̱ tji̱e̱e̱ Kosiee̱,
kjiꞌanga jatjoni nangi Ejipto̱.
Tsintꞌièe̱ ngo nda̱ xi bejín an, xi bi̱ katsó:
6Jè jaꞌáxín An nga̱són tjiaà kui chꞌià é xí yaꞌanijín,
jé kamándé tsja kjo̱a̱a̱ kui ni̱se̱nyá xí ta̱nisién eé.
7Kjiꞌanga ꞌniú nda̱ kamaá, ni̱ma̱ kase ji nga kandokjo̱e̱ní, kó Án tsꞌaxiéꞌaá,
katsꞌénseén ndeskande ngi̱jii̱n ngi̱ndie nínga ꞌmaa̱ cho̱ꞌo̱o̱n,
ki̱a̱ má nínga tjitjó ndáfoaa̱ ki̱a̱ ngi̱ndie xi ꞌmí Meribaa̱, ki̱a̱ askotꞌayákoón.
8¡Jún xota̱ na̱xi̱ńdá xí tsa̱ꞌa̱n,
ndaꞌyájnú ni xi tsꞌénbotixoma an!
Jún xota̱ Israee̱l tsi ko̱ndaꞌyájnúꞌun.
9Kꞌuiéjín ki̱a̱ tiña nínga tindyiónjnú ne xi kje̱ꞌe,
ti̱nde ko̱si̱e̱ntꞌajínjnúu̱ tikójnú ne xi nde yajínjnú.
10Án boá xi Nejnú má An,
Án boá xi tsꞌaxiéjnúꞌun ki̱a̱ nangi Ejipto̱.
¡Chjáxꞌájnú ndso̱ꞌbájnú, kó An tsjajnúꞌun ni xi xi̱ni̱e̱jnú!
11Ta̱nga xota̱ na̱xi̱ńdána, tsintꞌiéjiín nda̱na,
kó xota̱ Israee̱l, ngiti̱ kamámejénjiín An.
12Kuíni nga ta̱sá katsjandièe̱ nga katsꞌén ni xi kamámejeén ini̱ma̱a̱,
tsi̱ꞌe̱ nga ki̱a̱ kijítji̱ngi ni xi ndajín xi kamámejeén katsꞌén.
13¡Achichíra̱ tsjana tsi xota̱ na̱xi̱ńdána tsintꞌiéna katsaki!
Achichíra̱ tsjana tsi xota̱ Israee̱l ki̱a̱ kisꞌiṉtso̱ma ndi̱yàna katsaki.
14Ta̱ ngotjónra̱ tsí katsꞌenkjié An kondra̱a̱,
kó katsꞌenkjiénra̱ An ngaꞌniúna nga katsꞌenkjié An kondra̱a̱.
15Xota̱ xi chꞌoo̱ Néná, ki̱a̱ra̱ je ni̱ma̱kjo̱a̱ kixindyia ngindyi̱ko̱n kui,
ta̱nga ngatsjéni̱xtjinra̱ nga Néná kotijée̱.
16Nénárá xi katsjaá to ndso̱ko̱a̱n ṉño̱pan xi nda ngasee̱,
kó kuira̱ ntsjién xí ꞌbe tꞌa ndi̱jo̱jee̱ katsjaá, tsi̱ꞌe̱ sa̱ꞌíntsie cha̱n cha̱a̱n.
Currently Selected:
Xo̱jo̱n Salmoo̱ 81: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
