Xo̱jo̱n Salmoo̱ 79
79
ꞌBijñámasiénjínná Néná
Só xi katsꞌénda Asaa̱f.
1¡Ji Ne, xota̱ na̱xi̱ńdá xí bejiín Jí je jachókjánjo̱jne̱,
je katsꞌéndándí Ndiꞌandikón tsjièe̱,
kó je katsꞌénkjiékjo̱a̱ nga katsꞌénkjatsón na̱xi̱ńdáꞌniú Jerusalee̱n!
2Atítsojo yojo kꞌiee̱n mosòo̱, tsi̱ꞌe̱ nga iskjinie ni̱sie xi tjín nkꞌa jàn,
kó yojoo̱ xota̱ tsjiée̱ cho̱ tamá xí tjín tꞌanangii̱ katsjaá.
3Iskjitjón jiín xota̱ xi jesoón,
xikó maá tsi ndáfoa xi iskjitjón nga ngo foaꞌatjiyajoo̱n na̱xi̱ńdáꞌniú Jerusale̱n,
kó kui xota̱ xi je jesoón nde ngojín xi bónijín.
4Xota̱ xi síndotꞌa na̱xi̱ńdá nínga tindyionjne̱ mojnókiejne̱,
kjo̱a̱soboá ko̱jo kjo̱a̱mojnóchaá xota̱ xi síndotꞌajne̱ kjimajne̱.
5Ngaskande kjiꞌání Ji Ne.
A ngatsjéni̱xtjin nga si̱ꞌinxchín Jí.
A xikónií ndiꞌí xí tjítíngá ka̱ma kjo̱a̱chi̱ni̱i̱.
6Ngatjandibánié kjo̱a̱xcháa̱n xota̱ na̱xi̱ńdá xí bejiín Jí,
ko̱jo xotaa̱ ngi̱ndie nínga botíxoma xi tsꞌénkáxomájín Jaꞌée̱n.
7Ngatꞌa̱ kuí boá xi je katsꞌénkjié xota̱ tji̱e̱e̱ Jakoo̱b,
kó je katsꞌénkjiékjo̱a̱ ngi̱ndie nínga síndo nga.
8Ngata̱ ji̱njín chjeꞌéchjíjne̱ jé xí katsꞌén xota̱ xi xchájne̱ ngasꞌe̱,
¡tsá ye Ji! Kó ngatjandibániéjne̱ kjo̱a̱ni̱ma̱takóo̱n,
ngatꞌa̱ jè ta̱nisién ꞌniú jè kiniꞌánchajajne̱.
9¡Ji Ne xi ꞌboxiéꞌájne̱, tasíke̱jejne̱,
ta̱ngatꞌanii̱ kjo̱a̱je xi tjiín Jaꞌée̱n!
¡Xín ti̱ꞌinkjeꞌejne̱ jeé, kó ti̱ꞌinjetakínjne̱ jéjne̱,
ta̱ngatꞌanii̱ kjo̱a̱tjó xi tjiín Jaꞌée̱n!
10Míkjo̱a̱a̱ nga: Ñá tikón Nee̱ ꞌne̱, ka̱tso̱jne̱ xota̱ na̱xi̱ńdá xí bejiín Jí.
¡Ngatamaya ngi̱jii̱n kui xota̱ na̱xi̱ńdaá ko̱jo ngatamaya ji̱n,
nga si̱ꞌingojo Ji kjo̱a̱a̱ nga kiniꞌánkjiesón mosòo̱!
11¡Ngo kjo̱a̱nda, ndaꞌyé Ji ni xi ni̱ma̱ ndyi̱tsó xota̱ xi síndoꞌniuú!
Ta̱ngatꞌanii̱ xikó kjiꞌi ngaꞌniú xí tjiín, ꞌna̱xiéꞌé Ji xota̱ xi je si̱ꞌankjiesoón.
12¡Ji Ne, ti̱ꞌin Ji nga kui xota̱ na̱xi̱ńdá xí síndotꞌajne̱,
yito ndi̱yà bo̱a̱ kjiꞌi ngatꞌíchjí,
kjo̱a̱a̱ kui ni xi ndajín xi katsꞌénjoo̱ Ji!
13Kó bo̱a̱ tsꞌén ji̱n xi xota̱ na̱xi̱ńdáa̱, ko̱jo xi cho̱tsa̱nga̱ xi tse̱,
ngatsjéni̱xtjin nga Ji xi si̱ꞌantsjajne̱.
¡Ngatsjéni̱xtjin nga Ji xi ko̱ndájne̱ só!
Currently Selected:
Xo̱jo̱n Salmoo̱ 79: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
