Xo̱jo̱n Salmoo̱ 74
74
Ji Ne, ti̱ꞌindé jí xota̱ na̱xi̱ńdáa̱
Só xi katsꞌénda Asaa̱f.
1Ji Ne, míkjo̱a̱a̱ nga ngatsjéni̱xtjin niꞌínchꞌíjne̱.
Míkjo̱a̱a̱ tiniꞌínxchínje̱ ji cho̱tsa̱nga̱ xi síndo ngi̱jii̱n ndi̱xcho̱o̱.
2Ngatjaꞌátsjieen xota̱ na̱xi̱ńdáa̱,
kui xi Ji kisꞌingii̱ nga tse̱ kamá ndeskande ni̱xtjin xchá jàn,
kui xi kaꞌnaxiéꞌé Ji tsi̱ꞌe̱ nga xota̱ tji̱e̱ tse̱ kamá,
ko̱jo ngatjaꞌátsjiee̱n kui na̱xi̱ńdáꞌniú Sioo̱n,
kui na̱xi̱ nínga tindyin Ji.
3Ja̱bítsitsíjìi̱n kui ngi̱ndie xi ixóndoó, kui xi ngatsjéni̱xtjin nga je jatson,
kó tsitsijíi̱n ngayeje ni xi ndajín xi katsꞌeén Ndiꞌandikóo̱n kondraa̱.
4Kondra̱a̱ ki̱a̱ ndyi̱kjandayà ngamasiee̱n nínga matikó xota̱ na̱xi̱ńdáa̱,
kó je yején ńjño banderaa̱ nga ndyi̱bokó nga kui je katsꞌén.
5Bo̱a̱ má kón xikoó xota̱ xi kjiyojoyítsja má jachaa̱ ki̱a̱ ngi̱jii̱n kꞌijñá ꞌniuú.
6Kó ngotꞌe̱ ꞌne̱, jacha̱ ko̱jo martiyo̱ katsꞌénkjién
nga katsꞌénkjatsón xó xí yá kjiꞌijoo̱n Ndiꞌáa̱.
7Je ítꞌandiꞌí Ndiꞌandikóo̱n,
kó ngaskande ngiti̱ kamábendikónjín xoó ngi̱ndie nínga yandikón Jaꞌée̱n.
8Bi̱ tsꞌén íjin ini̱ma̱a̱:
¡Ta̱ ngo ndi̱yà si̱ꞌankjatsón ñá ngayejee̱!
Kó ítí ndiꞌa nínga ndokjo̱a̱ ée̱n xi chji̱a̱ni na̱xi̱ńdaá.
9Jè ngiti̱ yàjínjne̱ nga kjimatíyá ńjño bandera̱jne̱,
jè ngiti̱ jmíjín ingo nda̱chji̱ni̱e̱ꞌén ngi̱jinjne̱,
ti̱nde jmíjín xi be ngi̱jinjne̱ ngaskande kjiꞌání nga xchikjoa ngasejne̱.
10Ji Ne, ngaskande kjiꞌání nga kondraa̱ to̱kó chꞌo ka̱tso̱ ngasejne̱.
A ngatsjéni̱xtjin nga to̱kó chꞌo ka̱tso̱o̱ Jaꞌée̱n.
11Ánní nga xió ikꞌíjñí kon ndse̱ Ji.
¡Jo̱o̱n ndse̱ kixi̱ Ji!
¡Takée̱ ngaꞌniú xí tjiín, kó ti̱ꞌinkjie Ji!
12Ndeskande koó ngasꞌe̱ nga Néná boá xi Nejne̱ ko̱jo rejne̱,
Kui xi ꞌboxiéꞌájne̱ kui tꞌanangii̱.
13Jí boá xi akakjange ndáfoaa̱ ndáchíkoón nga kiniꞌínkjìn jí ngaꞌniúu̱,
kó cho̱ chꞌokon xi tjín ngi̱jin ndáchíkoón akakjen Ji to̱ko̱.
14Jí boá xi kiniꞌínkjítie Ji to̱ko̱ cho̱ chꞌokjiꞌi xi ꞌmí Lebiataa̱n,
kó yojoo̱ katseꞌée̱ nga iskjinie kui xi síndo ki̱a̱ nangi kixií.
15Jí boá xi kiniꞌín Ji nga kisꞌie ndejèꞌ ko̱jo ndáńchꞌi̱,
ta̱nga ti̱ kiniꞌínxí Ji ngayeje xo̱ngà xi ndeskande jmíni̱xtjin xi̱ya katsaki.
16Jí tse̱ ni̱xtjii̱n ko̱jo ni̱xtji̱e̱e̱n,
Jí boá xi kiniꞌínde Ji tsꞌueé ko̱jo saá.
17Jí boá xi ikꞌínde Ji tsindioó tꞌanangii̱,
Jí boá xi kiniꞌínde Ji cho̱ndoboaá ko̱jo cho̱ṉchꞌaán.
18Ji Ne, ngatjaꞌátsjiee̱n nga chꞌo katsoó kondra̱a̱,
ko̱jo nga ngo xtín xota̱ na̱xi̱ńdá xí chꞌo katsoó Jaꞌée̱n.
19Ngata̱ cho̱ tamaájín niꞌínkꞌasꞌíi̱n ini̱ma̱a̱ ndí ni̱sièe̱,
ngata̱ ngatsjéni̱xtjinjín niꞌínchíyé Ji xota̱ na̱xi̱ńdáa̱ xi ndasen síndoo̱.
20Ngatjaꞌátsjiee̱n ni xi ikꞌínde Ji,
ngatꞌa̱ ngayeje ngi̱ndiee̱ nínga jñó xi tjín nga̱sondiee̱,
je ta̱soboá ni xi ndajín boá xí kjima.
21Ngata̱ boeꞌéndièjín Ji nga xota̱ xi kjo̱a̱ni̱ma̱ ndyi̱foaꞌatioo̱, kjo̱a̱soboá sakoó,
ti̱ꞌin Ji nga Jaꞌée̱n sa̱ꞌíntsjaà xota̱ xi síndo ndasee̱n ko̱jo xi ni chjieén nga.
22¡Ye ꞌne̱ Ne, ꞌna̱xiéꞌé Ji yojòo̱!
Kó ngatjaꞌátsjieen nga kui xota̱ xi ꞌniú ndajiín, ngatsjéni̱xtjin nga chꞌo ndyi̱tsoó.
23Ngata̱ niꞌínchíyéjín Ji ni xi ndyi̱chji̱a̱ kondra̱a̱,
kui xi ndyi̱kjandàyaá ko̱jo kui xi xiyé xibó ndyi̱tsó kondra̱ tse̱.
Currently Selected:
Xo̱jo̱n Salmoo̱ 74: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
