Xo̱jo̱n Salmoo̱ 73
73
¡Achichí ndaxota̱ Néná!
Só xi katsꞌénda Asaa̱f.
1Nga ja̱koxi̱ Néná, achichí ndaxota̱ tsꞌénjo̱ xota̱ Israee̱l,
kui xota̱ xi tsjie síndo ini̱ma̱a̱.
2Kjo̱a̱a̱ an ki, jè mején katsꞌenjé án katsaki,
jè ta̱ ngi̱chií tsí kichajána nga ko̱ngajon an katsaki,
3ngatꞌa̱ kamáꞌonkon an kjo̱a̱a̱ xota̱ xi nkꞌa ꞌboxié yojoo̱,
kjiꞌanga kamábe an nga tjitjóninkꞌaa̱ yojoo̱ xota̱ xi ꞌniú ndajiín.
4Ngatꞌa̱ jmíjiín xi so xi ndakjan kjiꞌanga je fesón,
kó achichí nda yojoo̱ nga tjingáꞌniuú.
5Jmíjiín kjo̱a̱niꞌin xikoó xi tjiín kje̱ꞌe xota̱,
ti̱nde jmí kjo̱a̱ni̱ma̱ ndyi̱foaꞌatiojín xikoó xota̱ xi ngasee̱.
6Ngatꞌa̱ kjo̱a̱nkꞌakoo̱n boá xi xikoó tsi kui xi ixkìꞌ kjimaa̱,
kó ni xi ndajiín, kuí boá xi xikoó tsi kui xi ńjñobichitjé kjimaa̱.
7Kjifotjoꞌmé má ndyi̱ko̱n nga yiꞌi kui xotaa̱,
kó tsꞌénkjátjosón ni xi ndajín xi maxkè ini̱ma̱a̱.
8Mojnókie xotaa̱, kó chꞌo tsó nga chji̱a̱,
achichí nkꞌakon má nga ꞌbínda nga ndajín sa̱ꞌín.
9Tsꞌoa tsꞌénkjién nga chꞌo tsoó nkꞌajmii̱,
kó na̱je̱n tsꞌénkjién nga chji̱a̱taꞌin xota̱ nga̱sondiee̱.
10Kuíni nga xota̱ na̱xi̱ńdána kui ndyi̱fíkoón,
kó ꞌniú kjíbé eén xikoó tsi ndáfoa xi ndyi̱ꞌbi,
11kó bi̱ tsó nga chji̱a̱: Kótsꞌèn beni Néná kuí nii̱.
A tjínrií kjo̱a̱kjíntakón Néná xí tikón ndiꞌakꞌajmii̱.
12Bo̱a̱ kón má xota̱ xi ꞌniú ndajiín,
kó nde ta̱jmìjín ni xi nda̱ maa̱,
kó saꞌniú sáꞌniú kjima cho̱n ngase.
13Kósꞌe̱, a ta̱kjo̱a̱ndaní nga je katsꞌentsjie an ini̱ma̱na,
ko̱jo a ta̱kjo̱a̱ndaní nga je aniejón an ndsa̱ án, nga jmí jéjínna.
14Ngatꞌa̱ nga ngo ni̱xtjii̱n nga tjíꞌbéna,
kó ndyiojón ndyiojón tjíniꞌánjéna.
15Tsi bi̱ xián án: Bo̱a̱ tsꞌén kuichjiá an xikoó kui xotaa̱,
kꞌuindisojo̱ra an xota̱ tji̱e̱e̱ ndíi̱ tsobo̱a̱.
16Katsꞌenkjó án tsi̱ꞌe̱ nga ka̱makjínna kui nii̱ katsaki,
ta̱nga achichí niꞌìn kamána.
17Ngaskande nga kijí an ki̱a̱ Ndiꞌandikoón Néná,
kó ki̱a̱ boá nínga kamákjínna ni xi maa̱ nga fetꞌani, kui xota̱ xi ꞌniú ndajiín.
18Nga ja̱koxi̱, Jí boá xi ki̱a̱ ikꞌínde Ji nínga ko̱ngajon,
kó ko̱e̱ꞌéndiè Ji nga ku̱i̱xo̱ tsi̱ꞌe̱ nga kju̱i̱e̱.
19¡Kótsꞌèn nga ta̱niján má kjindibá nga kiniꞌánkjié!
¡Kótsꞌèn nga ndikoón boá xi katsꞌénkjié!
20Xikó má má nga foaꞌáná,
bo̱a̱ má tsꞌén kjiꞌanga kjo̱a̱ꞌaá Ji Ne,
chꞌo ka̱maa̱ xikó kón kui xotaa̱.
21Kjiꞌanga kamáxtií ini̱ma̱na,
kó nga kamákjinie chjo̱ondáyána,
22achichí kitikjo̱a̱ ko̱jo chi̱ni kamá an,
xikó maá tsi ngo cho̱ tamá kamá an ngindyikin Ji.
23Kó ndatsi ngayeje kui nii̱ je kamána,
ngatsjéni̱xtjin nga Ji tikónjoo̱,
Jí boá xi chjábéngí Ji ndsa̱ kixi̱ an.
24Jí boá xi ko̱e̱ꞌéní ngo kjo̱a̱botíxoma,
kó nga kjo̱chó ni̱xtjin, Jí boá xi chjábéní nínga tikón kjo̱a̱jèe̱.
25ꞌYá xí tikónna ki̱a̱ nkꞌajmii̱, ja̱ ta̱ Jí tsí.
Kó tsi ki̱a̱ tikóntꞌaa̱ Ji, jmí nii̱ kui nga̱sondiee̱ mejénjínna.
26Yojona ko̱jo ini̱ma̱na je kjiꞌme,
ta̱nga Jí boá xi Ndi̱jo̱jee̱ ini̱ma̱na, Jí boá xi ngatsjéni̱xtjin nga ku̱i̱ndyinje̱ní.
27Ngatꞌa̱ kju̱i̱e̱ boá kui xota̱ xi sa̱ꞌínkjii̱n Ji yojoo̱,
Jí boá xi si̱ꞌinkjie Ji ngayeje xi kje̱ꞌe ne ko̱e̱je̱tji̱ngi, kó ku̱i̱ꞌíjñámasiee̱n Ji.
28Kó án sa̱ꞌintiñaa yojona,
ngatꞌa̱ kuí boá kui nii̱ xi ꞌniú tsjá má ngasena.
Néna kui xi ndi̱a̱na, kuí boá xi tsꞌénkónna,
tsi̱ꞌe̱ nga xiyà an ngayeje ni xi je katsꞌén.
Currently Selected:
Xo̱jo̱n Salmoo̱ 73: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
