Xo̱jo̱n Salmoo̱ 72
72
Soó ree̱
Só xi katsꞌénda Salomoo̱.
1Ji Ne, chji̱e̱ꞌèe̱ ree̱ nga kixi̱ ka̱ma, xikótsꞌèn kixi̱ Ji,
kó ti̱ chji̱e̱ꞌèe̱ ndií ree̱ nga ti̱ bo̱a̱ ti̱ tsꞌén kixi̱ ngatama nga xikoó Ji.
2Kixi̱ ko̱tíxomaa̱ xota̱ na̱xi̱ńdáa̱ kui ree̱,
kó kꞌuieé kjo̱a̱kixi̱ nga sa̱ꞌínseén xota̱ ni̱ma̱a̱.
3Kósꞌe̱ kjiꞌá boá nga na̱xi̱i̱ tsja̱á kjo̱a̱xió xota̱ na̱xi̱ńdaá, nga sa̱ꞌínkjién kjo̱a̱kixi̱i̱.
4Ngatjíjindajo̱ xota̱ xi kjo̱a̱ni̱ma̱ tjíniꞌánkjaꞌaa̱,
kó ngatꞌaxiéꞌá ndií xota̱ ni̱ma̱a̱,
kó ngatsꞌénjeé xota̱ kui xi ndajín ndyi̱tsꞌènjo̱ xota̱ ni̱ma̱a̱.
5Ngatamayandikón ree̱, tji̱e̱nga tikón, xikoó tsꞌueé ko̱jo saá.
Ngatsjéni̱xtjin nga ngatamayandikón.
6Ngatama xikoó stsé xí tsꞌénkꞌándyi̱ni kꞌijñá xí je ikichaá,
ngatama xikoó stsé ꞌniú xí ꞌniú tsꞌénkꞌándyi̱ tꞌanangii̱.
7Ni̱xtjin nga ko̱tíxoma kui ree̱ kjín xota̱ xi kixi̱ ngatꞌié,
kó ngatꞌié kjo̱a̱xió ngaskande ngije xcha̱ja saá.
8Ngatatixómá kui ree̱,
ndeskande nínga tikón ngo ndáchíkoón
ngaskande nínga tikón xi ingoo̱,
ndeskande nínga tikón Ndejèꞌ Jee̱,
ngaskande nínga fetꞌanii̱ tꞌanangii̱.
9Ngindyi̱ko̱n kui ngatasiéntíkoó xota̱ xi síndo nangi kixií.
Kó kondraa̱ nga kjinie chojoo̱.
10Já re xi chji̱a̱ni nangi Tarsii̱ ko̱jo xi síndo tji̱ngi̱i̱,
ngatꞌíchjií to̱n xi machjítjéni nii̱.
Já re xi chji̱a̱ni nangi Sabaa̱, ko̱jo xi chji̱a̱ni nangi Sebaa̱ ngatjandibájoo̱ ni tsjakon kui ree̱ nga.
11Ngayeje já ree̱ ngatasiéntíkoó ngindyi̱ko̱n kui.
Kó ngayeje xota̱ na̱xi̱ńdaá ngatsꞌénxátꞌaa̱.
12Ngatꞌa̱ kui boá xi kꞌo̱xiéꞌá xota̱ xi ni chjieén xi ku̱i̱ꞌa nga ko̱síko̱joo̱,
ko̱jo kꞌo̱xiéꞌá xota̱ ni̱ma̱ xi jmíjiín xi ko̱síko̱jo.
13Ni̱ma̱ ka̱maa̱ xota̱ ni̱ma̱a̱, ko̱jo xota̱ xi ndasen síndoo̱,
kó kꞌo̱xiéꞌá kjo̱a̱mindyioo̱n xota̱ xi ni chjieén.
14Kꞌo̱xiéꞌá kui xotaa̱ kjo̱a̱a̱ kjo̱a̱ni̱ma̱a̱ ko̱jo kjo̱a̱a̱ ni xi ndajiín,
ngatꞌa̱ kjo̱a̱mindyioo̱n ꞌniú chjí ka̱maa̱ ngindyi̱ko̱n kui.
15¡Tsie ngatamaa̱ ree̱ nga kꞌuijñá,
kó kuí ngateꞌeé to̱nsinié xi tjín nangi Sabaa̱!
¡Ngatsjéni̱xtjin nga ngandokjo̱a̱tjé kui ree̱,
kó nga ngo ni̱xtjii̱n nga nganiꞌánchikonñé!
16Tsie to ndso̱ko̱a̱n ṉño̱pan ngatꞌieé na̱xi̱ńdaá,
kó ngatamaya nga ka̱matíyaá xka̱a̱ ki̱a̱ nga̱són nkꞌaá na̱xi̱i̱.
Tsie to ndso̱ko̱a̱n ṉño̱pan ngatꞌié,
xikoó yákón xi tjín ki̱a̱ nangi Líbanoo̱,
kó xi tjín ki̱a̱ na̱xi̱ńdáꞌniuú ngatꞌieé naxó,
xikoó xka̱ xi tjín ngi̱jin kꞌijñaá.
17¡Ngatsjéni̱xtjin nganiꞌánkjaꞌátsjien Jaꞌeén kui ree̱!
¡Ngatsjéni̱xtjin ngatamayandikón Jaꞌeén tji̱e̱nga tikón tsꞌueé,
kó kui Jaꞌeén xi ngatsꞌénchíkonñéni xkjín xotaa̱!
Ngayeje na̱xi̱ńdaá xi achichíra̱ tsjaa̱ nga kui ngatsó.
18¡Ngatamachikonñé Néná, kui xi Nee̱ xota̱ Israee̱l,
kui Néná xi ta̱kuítsí xi tsꞌén ni xi fíndikónná!
19¡Ngatsjéni̱xtjin nga ngatamachikonñé Jaꞌeén, kui xi tjiín kjo̱a̱jee̱,
kó ngasꞌikitsieni kjo̱a̱jee̱ ngayeje nga̱sondiee̱!
¡Bo̱a̱ kjiꞌi! ¡Bo̱a̱ kjiꞌi!
20Kꞌi̱e̱ tji̱e̱n fe xikótsꞌèn tsíchji̱a̱a̱ Néná Ndabii̱, kui xi ndií Isaii̱ kamá.
Currently Selected:
Xo̱jo̱n Salmoo̱ 72: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
