Xo̱jo̱n Salmoo̱ 71
71
Jí boá xi ngo ngi̱ndie nínga kotíjña̱ an
1Ji Ne, jí boá xi kjimaꞌniákoo̱n,
nga jmíni̱xtjin niꞌínkjeꞌéní kjo̱a̱soboá.
2¡Ta̱ngatꞌanii̱ kjo̱a̱kixìi̱ nga ti̱ꞌindéní,
kó te̱ꞌéndièní nga kjo̱tjongina yojona!
¡Tasínijìnní, kó ꞌna̱xiéꞌéní!
3Jí boá xi ngatama Ji xikoó ngo Ndi̱jo̱je,
nínga ngatsjéni̱xtjin nga ka̱ma ki̱a̱ kjuín án.
Jè katseꞌé Ji kjo̱a̱, tsi̱ꞌe̱ nga ko̱ꞌna̱xiéꞌéní,
ngatꞌa̱ Jí boá xi Ndi̱jo̱jena,
ko̱jo Jí boá xi boeꞌéní ngaꞌniú.
4Ji Ne, ꞌna̱xiéꞌéní ngi̱ya tsja xota̱ xi ndajiín,
ko̱jo ngi̱ya tsja xota̱ xi ꞌniú ndajiín, ko̱jo xi tamaá.
5Ngatꞌa̱ Ji Ne, Jí boá xi kjo̱a̱chiyána,
ndeskande koó nga kjindí án nga Ji ꞌniákoo̱n.
6Ngatꞌa̱ Jí boá xi tibosíke̱jení,
ndeskande koó nga tikón an ngi̱ya ndo̱bo̱a̱ndií na̱anna.
¡Jí boá xi ngatsjéni̱xtjinni nga sa̱ꞌintsjaà!
7Achichí má xota̱ xi fíndikoón nga bena,
ta̱nga Jí boá xi ngo ngi̱ndie xi ꞌniú tikón kjimana an.
8Tjikítsie maá ndso̱ꞌba án ni xi Ji sa̱ꞌíntsjaà,
kó nga ngo ni̱xtjii̱n nga kuichjiá an kjo̱a̱a̱ kjo̱a̱jèe̱.
9Ngata̱ niꞌínchꞌíjínní kjiꞌanga je ka̱maxchá án,
ti̱nde ngata̱ ꞌbíjñímasínjínní kjiꞌanga je kju̱i̱e̱ ngaꞌniúna.
10Ngatꞌa̱ kondra̱na je ndyi̱chji̱a̱taꞌinna,
kó je ndyi̱kondaxtínna, kui xi mejeén nga ndajín sa̱ꞌínjo̱ ini̱ma̱na,
11nga bi̱ ndyi̱tsó: Néná jè íjñá masien,
¡ti̱yótji̱ngíjnúu̱, kó ndo̱bo̱a̱jnú, ngatꞌa̱ jè ngiti̱ jmíjín xi kꞌo̱xiéꞌá!
12¡Ji Ne, ngata̱ kjinjín niꞌínní yojòo̱!
Ji Ne xi tsa̱ꞌa̱n, tsá ndibékasíke̱jení.
13Nga sakoó kjo̱a̱soboá, ko̱jo ngatjiesón kondra̱ xi mejeén sa̱ꞌínkjié ini̱ma̱na,
ngasꞌikitsie maá kjo̱a̱soboá ko̱jo ngatama tsobéjii̱n,
kui xota̱ xi mejeén nga ndajín ka̱mana.
14Kó án ki, ngatsjéni̱xtjin nga skoya an,
kó saꞌniú sáꞌniú ngase sa̱ꞌíntsjaà Jí.
15Ndso̱ꞌba án kjo̱a̱kixìi̱ ko̱jo kjo̱a̱ꞌnaxiéꞌáa̱ boá xi ku̱i̱chji̱a̱ nga ngo ni̱xtjii̱n,
ndatsi nde májínna ꞌbíxki̱.
16Ji Ne, kji̱ndi̱bá an, kó xiyà an ni yiꞌi xi kiniꞌín Ji,
xiyà an kjo̱a̱kixi̱ xi ta̱ Jí tsí xi niꞌín Ji.
17Ji Ne, ndeskande koó nga kjindí án nga Ji xi akakoyéní,
kó ngaskande ngotꞌe̱ nga to̱kó tsꞌénchji̱a̱ an ni xi fíndikónná xi kiniꞌín Ji.
18Ji Ne, ndatsi je xchá án, ko̱jo ndatsi je kichjí tokó án,
ngata̱ ꞌbíjñímasínjínní, ngaskande nga xiyàa̱ kui xota̱ tji̱e̱e̱,
ko̱jo nga xiyàa̱ ngaꞌniú xí tjiín Jí kui xota̱ xi kji̱e̱ tsenjiín.
19Kó ko̱jo kjo̱a̱kixi̱i̱ nga Ne, ngaskande nkꞌa jàn fochó,
ko̱jo ni xi achichí ni yiꞌi xi je kiniꞌín Ji.
ꞌYá xí kjo̱chótji̱ngi xikó kón Ji Ne.
20Jí xi kiniꞌínkjeꞌení tsie kjo̱a̱ni̱ma̱, ko̱jo ni xi ndajín, ko̱e̱ꞌé nginí kjo̱a̱mindyion,
kó ndeskande nínga ꞌniú na̱nga̱a̱ tꞌanangii̱ si̱ꞌinkjastji̱n nginíní.
21Tsie ngase kjo̱a̱yandikón ko̱e̱ꞌéní,
kó si̱ꞌíndajìn nginíní.
22Kó án ti̱ sa̱ꞌintsjaà nga sa̱ꞌinkjièn án salterioo̱,
kó ta̱ngatꞌanii̱ kjo̱a̱kixi̱i̱ ji Ne,
nga siee salmo̱ nga sa̱ꞌinkjièn án arpaa̱.
¡Ji Ne ndikón xí chji̱a̱ni Israee̱l!
23Achichí tsjá ka̱maa̱ ndso̱ꞌba án nga si̱eé salmo̱,
ko̱jo tsja ka̱maa̱ ini̱ma̱na, ngatꞌa̱ Jí boá xi kaꞌnaxiéꞌéní.
24Nga ngo ni̱xtjii̱n nga kuichjiá najén án kjo̱a̱a̱ kjo̱a̱kixi̱i̱,
ngatꞌa̱ kasakoo̱ kjo̱a̱soboá ko̱jo kamátsobéjii̱n,
kui xota̱ xi ndyi̱mongase nga ni xi ndajín ka̱mana.
Currently Selected:
Xo̱jo̱n Salmoo̱ 71: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
