Xo̱jo̱n Salmoo̱ 7
7
Nga chjiáꞌaá Néná nga kixi̱tsꞌèn sa̱ꞌínsénná
Kjo̱a̱ndasen xi katsóyaà Ndabii̱ Néná kjo̱a̱a̱ ni xi katsꞌénjo̱ Kuu̱, ngo nda̱ xi chji̱a̱ni xota̱ tji̱e̱e̱ Benjaa̱.
1¡Ji Ne xi tsa̱ꞌa̱n, Jí boá xi kjimaꞌniákoo̱n!
¡ꞌNa̱xiéꞌéní, kó ti̱ꞌindéní kjo̱a̱a̱ ngayeje kui xota̱ xi ndyi̱mongatji̱ngina!
2Ngatꞌa̱ tsájmi̱, sa̱ꞌínꞌoón ini̱ma̱na xikoó ngo xandi̱je̱e̱,
kó ngije sa̱ꞌínxi̱, jmíjín xi ka̱maa̱ kꞌo̱xiéꞌána.
3Ji Ne xi tsa̱ꞌa̱n, tsi kui nii̱ xi katsꞌen an:
Tsi ni xi ndajín je katsꞌén ndsa̱ án.
4Tsi ndajín tsꞌén ichjíi̱ xota̱ xi xió tsaꞌana.
Ta̱sá je katsꞌendé án kui kondra̱ xi jmí kjo̱a̱jiín nga ndajín tsaꞌana.
5Ja̱ tsi bo̱a̱ kjiꞌi ni xi katsꞌen an,
te̱ꞌéndiè Ji nga kondra̱na ngatangatji̱ngii̱ ini̱ma̱na, kó ngatjachótjingína,
te̱ꞌéndièe̱ nga tsja̱niéna ki̱a̱ tꞌanangii̱,
kó kjo̱a̱yandikónna ngaskande ngindie jàn ngatꞌijñá tsobo̱a̱.
6¡Ji Ne, ti̱sítji̱n Ji, kó nga tiniꞌínxchín Jí!
¡Ti̱xkén Ji kjo̱a̱a̱ kjo̱a̱tamaá kondra̱na,
kó kjo̱a̱ndana tꞌen Ji nga ka̱ma kui kjo̱a̱niꞌánjé xí kanangiye Ji!
7¡Ki̱a̱ nga ngo foaꞌatjiyajòo̱n ngatꞌíndotꞌaa̱ ngayeje na̱xi̱ńdaá,
kó Jí tatíxome Ji, ndeskande ki̱a̱ ndiꞌakꞌajmii̱!
8Ji Ne, Ji xi kixi̱ tsꞌén niꞌínsée̱n xota̱ na̱xi̱ńdaá:
¡Ndókjo̱e̱ Ji tsi nda ko̱jo tsi ndajín katsꞌen an, kó te̱ꞌéjéní,
ta̱nga chꞌi̱e̱xki̱ Ji nga kixi̱ án, ko̱jo nga jmí jéjínna!
9¡Ngatjie ngotꞌe̱ ꞌne̱ ni xi ndajín xi tsꞌén xota̱ xi ndajiín,
kó xota̱ xi kixi̱i̱, ꞌniú ngasꞌijña!
Ngatꞌa̱ kui Ne xi kixi̱i̱, kuí boá xi kotꞌa ini̱ma̱a̱ ko̱jo kjo̱a̱niꞌánkjoó.
10Néná boá xi konna xikoó ngo ni xi ꞌbíchjaá ni xi ndajín,
kó Kuí boá xi ꞌboxiéꞌá xi kixi̱ síndo ini̱ma̱a̱.
11Néná, Kuí boá ngo Nendiꞌamasien xi kixi̱,
ngo Ne xi ndyiojón ndyiojón tsꞌénjeé xota̱ xi ndajiín.
12Tsi sa̱ꞌínkꞌoyàjín yojoo̱ kui xotaa̱,
Néná sa̱ꞌínyojó ki̱cha̱ndojoó,
kó ku̱i̱ꞌíjñanda yáchjonyáa̱, tsi̱ꞌe̱ nga skji̱ní yáyojoó.
13Jè tikóndaa̱ ni xi tsꞌenkꞌiénná xi tsꞌénkjién,
kó ti̱ jè tikóndaa̱ yáyojoó xi tjítokóni ndiꞌií.
14Tsitsíjenjnúu̱ nga xota̱ xi ꞌniú ndajiín, xikoó tsi ndí jè kiniꞌánkaꞌa,
sꞌe̱ kui ni xi ndajiín, kuí boá xi ndí kamá ngi̱ya nga̱ntso̱a̱,
kó kjo̱a̱ndisoo̱ boá xi katsee̱n.
15Ngo ti̱xa̱ xi ꞌniú na̱nga̱ katsꞌénda,
¡ta̱nga ti̱kuíní bo̱a̱ xi kꞌo̱kayà kui ti̱xa̱a̱!
16Ni xi ꞌniú ndajín xi tsꞌén, ti̱kuíní xi ndajín sa̱ꞌiín,
kó kjo̱a̱tamaá, ti̱kuíní to̱ko̱ xi kꞌo̱kanieé.
17¡Ta̱nga an ki, sa̱ꞌintsjáa̱ Néná, ta̱ngatꞌanii̱ kjo̱a̱kixi̱i̱!
¡Kó sièe̱ só Jaꞌeén kui Néná xí tikón ndiꞌakꞌajmii̱!
Currently Selected:
Xo̱jo̱n Salmoo̱ 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
