Xo̱jo̱n Salmoo̱ 6
6
Bi̱ tsꞌén ndokjo̱a̱a̱ Néná nga tjibítja ngo kjo̱a̱niꞌin
Só xi katsꞌénda Ndabii̱.
1Ji Ne, ngata̱ niꞌínxchínje̱jínní kjiꞌanga xtii̱,
ti̱nde ngata̱ botíjéjínní kjiꞌanga ꞌniú tiniꞌínxchín Jí.
2¡Ngatamani̱ma̱a̱ an Ne, ngatꞌa̱ jè kjiꞌme an!
Ti̱ꞌindayení ji Ne, ngatꞌa̱ ngayeje ńdana je kjifotsié má,
3kó ini̱ma̱na achichí ni xi kjimaa̱,
ngaskande kjiꞌání nga ko̱si̱ke̱jení Ji Ne.
4Tsitsíjin nginí, kó ꞌna̱xiéꞌé ji ini̱ma̱na.
Ta̱ngatꞌanii̱ kjo̱a̱ni̱ma̱takóo̱n, ꞌna̱xiéꞌéní.
5Ngatꞌa̱ jmíjín xi kjo̱a̱ꞌátsjiee̱n Ji ki̱a̱ nínga síndo xota̱ xi je jesoón,#6:5 Nínga síndo xota̱ xi je jesoónNga én ebreo̱ Xeoo̱l Tsó ko̱jo tsi Ngi̱ndie nínga síndo xota̱ xi je jesoón. Xota̱ Israee̱l xi kisꞌie ngasꞌe̱ katsó nga kui ngi̱ndiee̱, ngi̱ndie jñó xò bo̱a̱, kó ki̱a̱ xò kisꞌijña nínga ꞌniú na̱nga̱a̱ tꞌanangii̱ (Joo 10:21; Xsl 63:9). Ki̱a̱ kui «nga̱sondie xi kjiꞌixioó» (Xsl 115:17) Xota̱ xi je jesoón ngiti̱ jmíjín ni xi ka̱ma sa̱ꞌín ngase, ti̱nde ka̱májín sa̱ꞌíntsjaà Néná (Xsl 30:9; 88:4-6,10-11; Isa 38:18-19) Sájín ngase, kui kjo̱a̱xcha̱á kui xotaa̱ kasasikjoyá kó kjo̱a̱sꞌijin, ko̱jo kjo̱a̱chiyá kamá tsi̱ꞌe̱ ni̱xtjin nga kjo̱a̱ꞌáꞌyá nginií xota̱ xi je jesoón nga kju̱i̱e̱tꞌa ni̱xtjin.
kó ki̱a̱ nga̱tsjo̱ó, ꞌyá xí sa̱ꞌíntsjaà Jí.
6Jè jenda an nga ta̱soboá tsꞌénkjandá án.
Xki̱ jñó xki̱ jñó ni̱ma̱ kjandá án,
kó ndándyíkón án tsꞌénkꞌándyi̱ má ṉchanna.
7Nde ngiti̱ ndajín tsijenna, ta̱ngatꞌanii̱ kui kjo̱a̱ni̱ma̱a̱,
jè kjima ti̱ka̱ má an, ta̱ngatꞌanii̱ ngayeje kondra̱na.
8¡Jún xota̱ xi ꞌniú ndajín, kjin ti̱ꞌankjaꞌájnúꞌun yojojnú,
ngatꞌa̱ Néná jè tsintꞌié nga tsꞌénkjandá án!
9Néná jè tsintꞌié nga ni̱ma̱ tꞌíxián an,
Néná jè iskjíbé énna nga tsꞌénchji̱a̱a̱.
10Ngayeje kondra̱na, kjo̱a̱soboá si̱ꞌankjaꞌa ko̱jo si̱ꞌantsobéjii̱n.
Ko̱nga, kó ta̱niján ma kji̱ndi̱bá nga kjo̱a̱ꞌa kjo̱a̱soboá.
Currently Selected:
Xo̱jo̱n Salmoo̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
