Xo̱jo̱n Salmoo̱ 65
65
Néná achichí kjo̱a̱niꞌánchikonñé tsjáná
Só xi katsꞌénda Ndabii̱.
1¡Ji Ne, to̱kó si̱ꞌantsjaàri Ji ki̱a̱ na̱xi̱ Sioo̱n!
Jí boá xi kꞌuíchjií ni xi tjiꞌmíyatjón nga si̱ꞌankjatjosoón.
2Jí xi ndaꞌyé Ji nga ndokjo̱a̱jne̱,
Jí boá xi ko̱e̱je̱koo̱n ngayeje xota̱ nga̱sondiee̱.
3Ni xi ꞌniú ndajín xi je katsꞌen an, achichí é kjimána,
ta̱nga Jí boá xi niꞌínjetakínjne̱ jé xí kiniꞌánjne̱.
4¡Achichíra̱ tsjaa̱ kui xota̱ xi Ji kachjeꞌéjin Ji,
kó nga niꞌín Ji nga ki̱a̱ kꞌuijñátꞌaa̱,
tsi̱ꞌe̱ nga ki̱a̱ kꞌuijñá ki̱a̱ ndi̱tsee̱n Ndiꞌáa̱!
Achichí nda sa̱ꞌíntsiejne̱ ni nda xi tjiín Ndiꞌáa̱, kui xi na̱ngo̱xi̱ tsjiée̱.
5¡A ni xi fíndikónná boá xi ko̱kéjne̱ kjo̱a̱a̱ kjo̱a̱kixi̱i̱, Ji Ne xi ꞌnaxiéꞌéjne̱!
¡Jí boá xi ndyi̱koya xota̱ xi síndo ngaskande nínga fetꞌanii̱ tꞌanangii̱,
ko̱jo xota̱ xi síndo ngaskande tji̱ngi̱ xi ꞌniú kjinnii̱ ndáchíkoón!
6Jí xí kiniꞌínkjín Jí ngaꞌniúu̱, nga ꞌniú ikꞌíjñí Ji na̱xi̱i̱,
kó achichí ngaꞌniú xí kisꞌiee̱ Ji.
7Kiniꞌínkꞌíxí Ji nga fonie ndáchíkoón,
kiniꞌínkꞌíxí Ji nga fonie ngaꞌniuú,
kó ti̱ kiniꞌínkꞌíxí Ji nga mindyikján xota̱ na̱xi̱ńdaá.
8Kuíni nga xota̱ na̱xi̱ńdá xí síndo ngaskande nínga fetꞌanii̱ nga̱sondiee̱,
ngaskande fotsiéndíkón má nga be kjo̱a̱ndikón yiꞌi xi kiniꞌín Ji.
¡Jí boá xi boeꞌée̱ kjo̱a̱tsja nga ndibáꞌásie̱én, ko̱jo nga ma jñoó nga!
9Jí boá xi tichìi̱n tꞌanangii̱, kó achichí tsie ndáfoa niꞌínkꞌandyi̱ni Ji,
kó boeꞌée̱ kjo̱a̱cho̱n xi tjiín Jí, nga boeꞌée̱ ndejèꞌ xi tse̱,
kó ꞌbíjñinde Ji to ndso̱ko̱a̱n ṉño̱paa̱n, kjiꞌanga Ji xi bo̱a̱ tsꞌén mejeén.
10Jí boá xi ꞌbíkitsiée̱ ndáfoa xo̱ngà nínga sitji̱e̱ nii̱,
kó ńdie xi tajaá, mindyiekaxe Ji nga niꞌínkjìn Jí stséxa̱a̱,
Kó niꞌínchikonñí Ji ꞌyo̱o̱ ni tjieé.
11Ngije ma kjie noó, ꞌbíkitsieníi̱ kjo̱a̱ndàa̱,
kó ndi̱yàa̱ achichí ni xi nda tjiín.
12Nangi kixií, ata̱ tsjákón ndi̱xcho̱o̱,
kó nínga tji̱ngi̱i̱ achichí tsjá maá,
13nínga tji̱ngi̱i̱ sꞌikitsie maá cho̱tsa̱nga̱,
kó nínga soón, sꞌikitsie maá xka̱a̱ to ndso̱ko̱a̱n ṉño̱pan.
Ngayeje xotaa̱ sie, kó kjandayà má nga tsja maa̱.
Currently Selected:
Xo̱jo̱n Salmoo̱ 65: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
