Xo̱jo̱n Salmoo̱ 66
66
Si̱ꞌantsjàa̱ Néná kjo̱a̱a̱ ni xi fíndikónná xi katsꞌén
Só.
1¡Chaꞌayàmájnú nga tsjangatamajnú kjo̱a̱a̱ Néná,
jún xota̱ xi chji̱a̱ni ngayeje kui nga̱sondiee̱!
2Ndàjnúu̱ salmo̱ kjo̱a̱a̱ kjo̱a̱je xi tjiín Jaꞌeén.
Te̱ꞌéjnúu̱ kjo̱a̱je nga ko̱ndájnúu̱.
3Bi̱ tꞌínjnúu̱ Néná:
¡Achichí fíndikónná ngayeje ni xi je kiniꞌínde ji!
Ta̱ngatꞌanii̱ nga tsie ngaꞌniú xí tjiín,
kuíni nga kondra̱a̱ ki̱a̱ kꞌuíndo ngindie ndsa̱ki ji.
4¡Ngayeje xota̱ nga̱sondiee̱ ko̱siéntikoó ngindyikin ji, kó sa̱ꞌíntsjaà nga si̱eé só!
¡Si̱eé salmo̱ ta̱ngatꞌanii̱ Jaꞌée̱n!
5Ndibájnú kó tꞌíndikónjnú ni xi je katsꞌén Néná.
Achichí fíndikónná ni xi katsꞌén ngandaa̱ xota̱ nga̱sondiee̱.
6Ndáchíkoón tꞌanangi kixí katsꞌén,
kó xotaa̱ jaꞌayise nga jaꞌaxtikjá ndejeèꞌ.
¡Ki̱a̱ boá nínga tsja ngatamaná kjo̱a̱a̱ ngayeje ni xi katsꞌén Kuí!
7Ta̱ngatꞌanii̱ ngaꞌniú xí tjiín, nga Kuí boá xi botixómáná ngatsjéni̱xtjin.
Kui boá xi konda ngayeje na̱xi̱ńdaá.
Ngata̱ nkꞌajín ꞌboxié yojoo̱ xota̱ xi kitikjo̱a̱a̱.
8Ngayeje jún xota̱ na̱xi̱ńdá, nda ndókjo̱a̱jnú kjo̱a̱a̱ Néná.
Te̱ꞌéndièjnú nga ko̱nda̱ꞌyaá só xi niꞌántsjájnúu̱ Kui.
9Néná boá xi katsjaá nga tikón nga̱sondie ini̱ma̱ná,
kó tsjandièjín nga mongajon ndsa̱kó.
10Ji Ne, Jí boá xi kachjatꞌayékínjne̱,
kó bo̱a̱ kiniꞌínje̱jne̱ xikoó to̱ntiboaa̱ nga ndiꞌí niꞌántsjieni.
11Katseꞌéndiè Ji nga ikixóyájne̱ chja̱ya̱a̱,
kó achichí é kamá ni xi ikꞌíjñisén Ji nga̱xtonjne̱.
12Katseꞌéndiè Ji nga kjín ndi̱je̱ katsjánié tokojne̱.
Ikitjajinjne̱ ndiꞌí, ikitjaxtíkjájne̱ ndáfoa,
sꞌe̱ jaskan kꞌinje̱jne̱ ngi̱ndie nínga tsie nichinie tjín.
13Kꞌosꞌi̱e̱n an ki̱a̱ Ndiꞌáa̱ nga kjóchojo̱ an kjo̱a̱tjó xi ndikón nganda tse̱,
kó bo̱a̱ tsꞌén kꞌuichjií ni xi kixiyatjoón,
14ni xi tsíchji̱a̱ ndso̱ꞌba án kjiꞌanga nda̱ kamána.
15Cho̱ xi ꞌniú yiꞌi boá xi kjóchojo̱ an nga sa̱ꞌinkꞌasꞌiee̱n kjo̱a̱tjó,
ko̱jo cho̱tsa̱nga̱ xi jaꞌatji ndi̱ja̱a̱ nijan kꞌuítií,
sa̱ꞌinkjiesoón cho̱yojo xi̱ꞌin, ko̱jo tindso̱ xi̱ꞌin nga.
16Ndibájnú, kó ndaꞌyájnú, jún xi yandikónjnú Néná,
kó xiyàjnúꞌun ni xi Néná katsꞌénjo̱ ini̱ma̱na.
17Ndso̱ꞌba án boá xi katsꞌenkjién án nga tsíchji̱a̱a̱ Kui,
kó najén án boá xi katsꞌentsjàa̱ Jaꞌeén.
18Tsi ndajínkjiꞌi ni xi kisꞌijñajii̱n ini̱ma̱na,
nde tsintꞌiéjínrana Néná,
19ta̱nga ja̱koxi̱ boá nga Néná tsintꞌiéna,
kó katsꞌénsénna nga ni̱ma̱ kixian an nga tsíchji̱a̱a̱.
20¡Ngatamachikonñé Néná, ngatꞌa̱ tsaꞌaxki̱ kjiꞌanga tsíchji̱a̱a̱,
kó ni̱ma̱ kamaá an!
Currently Selected:
Xo̱jo̱n Salmoo̱ 66: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
