Xo̱jo̱n Salmoo̱ 60
60
¡Te̱ꞌéndiè Ji nga ji̱n xi si̱ꞌanjne̱!
Ndabii̱ katsꞌénda kui soó, tsi̱ꞌe̱ nga kui xi ko̱ko̱yaá xotaa̱. Kjiꞌa boá nga katsꞌénda nga askjanjo̱ xota̱ aramea̱ xi kisꞌińdo xtji̱e̱e̱n ta̱ꞌin, ko̱jo nínga ꞌbosꞌien tsꞌueé ki̱a̱ nangi Mesopotamia̱, ko̱jo ki̱a̱ ngamasiee̱n nangi Siria̱. Kui ni̱xtjin jàn Joaa̱b je kjindibáꞌoyá nginí nga je katsꞌeén jó mi̱ xota̱ tji̱e̱e̱ Endoo̱n ki̱a̱ nínga ꞌmí Nangisoón Na̱xa̱a̱.
1¡Ji Ne! Jí boá xi kiniꞌínchꞌíjne̱,
kó nga kiniꞌínxchín Jí, kiniꞌínkjié Ji kjo̱a̱ kui xi ꞌboxiéꞌájne̱.
¡Ndibéchin nginíjne̱ ngotꞌe̱ ꞌne̱!
2Jí boá xi kiniꞌínkjeꞌe Ji ngo kjo̱a̱ndi̱ko̱n tꞌanangii̱,
kó katjoxꞌá kꞌi̱e̱ katjoxꞌá ján,
¡ngo kjo̱a̱nda, ti̱ꞌindaye nginí Ji, ngatꞌa̱ jè kjibixóndó!
3Achichí ni xi ꞌniú, xí je akakèe̱ xota̱ na̱xi̱ńdáa̱,
Jí boá xi katseꞌéjne̱ nga kiꞌyójne̱ bino̱ xi katsꞌén nga kastingíjne̱.
4Ta̱nga xota̱ xi ꞌniátakóo̱n, kuí boá xi katseꞌée̱ ngo ńjño bandera̱
tsi̱ꞌe̱ nga ku̱i̱jén ta̱ngatꞌanii̱ kjo̱a̱kixi̱i̱.
5Tsi̱ꞌe̱ nga ka̱mandé xota̱ xi tjoó Jí,
¡ti̱ꞌinkjìn Jí ngaꞌniúu̱, tsi̱ꞌe̱ nga kjo̱tjojne̱, kó ti̱ꞌinsénjne̱!
6Ndeskande Ndiꞌandikoón Néná, katsꞌénsénjne̱ nga bi̱ katsó:
¡Achichí tsjá ka̱mana!
Án boá xi sa̱ꞌinkabisóo̱n xota̱ na̱xi̱ńdána tꞌanangii̱ nangi Sikee̱n,
kó kꞌochi̱bo̱a̱ An tꞌanangii̱ nangi soón Sukoo̱t.
7Tsa̱ꞌa̱n boá tꞌanangii̱ nangi Ngalaa̱nd,
ko̱jo tsa̱ꞌa̱n boá tꞌanangii̱ nínga síndo xota̱ tji̱e̱e̱ Manasee̱,
tꞌanangi xi chji̱a̱ni xota̱ tji̱e̱e̱ Efraii̱n,
xikónií tsi kui xi ngo ni xi ꞌbiyá An tokó Án kjimana,
kó tꞌanangii̱ xi chji̱a̱ni xota̱ tji̱e̱e̱ Jundáa̱,
xikónií tsi kui xi ngo ki̱cha̱ xi foyatsja ngo nda̱ re kjimana.
8Xota̱ tji̱e̱e̱ Moaa̱b boá, xi xikoó tsi kui xi kjimana
ngo ni xi mindyia An ndáfoa nga moniéjón An ndsa̱ Án,
kó xota̱ tji̱e̱e̱ Endoo̱n boá, xi xikoó tsi nga̱soón
nínga bosiensón An ndsa̱ko Án,
kó xota̱ Filisteaa̱ boá, xi xikoó tsi kui xi ka̱ma ngi̱ndie
nínga skjandáyà An nga je katsꞌen An.
9ꞌYá xí kjo̱jona ngaskande na̱xi̱ńdá xí xó tjíchjáꞌyánii̱.
ꞌYá xí ko̱kóna ndi̱yà xí fochó nangii̱ xota̱ tji̱e̱e̱ Endoo̱n.
10Ji Ne, a Jijín boá xi je kiniꞌínchꞌíjne̱.
Ji Ne, a jè ngiti̱ kꞌuínje̱jín Ji jájúnjne̱ nga ko̱e̱je̱ kján.
11¡Tasíke̱jejne̱ tsi̱ꞌe̱ nga si̱ꞌanjne̱ kondraa̱!
¡Ngatꞌa̱ ta̱kjo̱a̱ndaní bo̱a̱ kjo̱a̱bosíko̱joo̱ xota̱ nga̱sondiee̱!
12¡Ta̱ngatꞌanií Néná nga ni xi yiꞌi si̱ꞌán,
Kuí boá xi tsja̱nié kondra̱ná!
Currently Selected:
Xo̱jo̱n Salmoo̱ 60: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
