Xo̱jo̱n Salmoo̱ 59
59
Jí boá xi tichínní
Ndabii̱ katsꞌénda kui soó, kjiꞌanga re Sauu̱l atíxoma tsi̱ꞌe̱ nga xchindà nga si̱ꞌankꞌien Ndabii̱.
1¡Ji Ne xi tsa̱ꞌa̱n, ꞌna̱xiéꞌéní ngi̱ya tsja kondra̱na!
Nkꞌa tꞌíjñíní, kjinnii̱ xota̱ xi an ndyi̱kjánjo̱na.
2ꞌNa̱xiéꞌéní kjo̱a̱a̱ xota̱ xi tsꞌén ni xi ꞌniú ndajiín,
ko̱jo ꞌna̱xiéꞌéní kjo̱a̱a̱ kui xota̱ xi tsꞌenkꞌién ini̱ma̱a̱.
3Ngatꞌa̱ chja̱ya̱ je íjñána kui xota̱ xi mejeén sa̱ꞌínkꞌiénna,
xota̱ xi ꞌniú ndajiín je ndyi̱ꞌbínda nga ni xi ndajín sa̱ꞌínjo̱na,
kó jmí tsi kjo̱a̱a̱ nga ndajín katsꞌén an, ko̱jo tsi katsꞌenjé an, ¡Ji Ne!
4Nde ánjín xi konna, kó ndyi̱monga má nga je síndonda nga skjánjo̱na.
Ti̱sítji̱n ji Ne, ja̱bíꞌi̱n kó tsitsíjinní.
5Ji Ne xi tsi̱ꞌe̱ jájuún, ko̱jo Ji xi Nee̱ xota̱ Israee̱l,
ti̱sítji̱n Ji, kó ti̱ꞌinjée̱ xota̱ na̱xi̱ńdaá.
Ngata̱ ni̱ma̱jín maá kui xota̱ kitikjo̱a̱ xi botiñáná.
6Kjiꞌanga kjimajñoó fochó nginí, kó kjandayàboá xikoó ńñaá,
nga foaꞌatjiyajoo̱n na̱xi̱ńdáꞌniuú.
7Achichí nkꞌa maá yojoo̱ nga ta̱ chiboa chji̱a̱,
kó nga chji̱a̱, xikó maá tsi kichiro̱ eén nga bi̱ tsó:
ꞌYá xí ntꞌiéná.
8Ta̱nga Ji Ne, Jí boá xi ko̱jne̱ Ji kjo̱a̱ kui xotaa̱,
kó ko̱jno̱che Ji ngayeje xota̱ na̱xi̱ńdaá.
9¡Jí boá xi boeꞌéní ngaꞌniú, Jí boá xi tsꞌénkoyaa̱!
¡Ngatꞌa̱ Néná kui xó xí konna!
10Néna, kui xi tjiín kjo̱a̱ni̱ma̱takoón, Kuí boá xi ko̱e̱je̱kjaꞌána.
Néná boá xi ko̱kóna kótsꞌèn sa̱ꞌìi̱n kondra̱na.
11¡Ngatꞌa̱ niꞌínkꞌínjín Ji Ne, tsi̱ꞌe̱ nga xchi̱yàjiín xota̱ na̱xi̱ńdána!
¡Ta̱sá kjin ti̱ꞌintsojoboe Ji nga si̱ꞌinkjìn Jí ngaꞌniúu̱, ko̱jo ti̱ꞌin ni̱ma̱kjo̱a̱ Ji.
Ji Ne, Jí boá xi ꞌbíchjée̱ ni xi ndajiín!
12Xki̱ nga kjíxꞌá tsꞌoa, tsꞌénjé nga chji̱a̱,
ti̱kuii xi ngatixóyà chja̱ya̱a̱ kjo̱a̱nkꞌakoo̱n,
ko̱jo kjo̱a̱a̱ ni ndiso, ko̱jo ni xi ndajín xi ndyi̱chji̱a̱.
13¡Ti̱ꞌinkjie Ji nga si̱ꞌinxchín Ji Ne,
ti̱ꞌinkjie Ji tsi̱ꞌe̱ nga ka̱makjínjín ngase!
¡Kó ngatamaya ngaskande nínga fetꞌanii̱ tꞌanangii̱,
nga Jí boá xi botíxomée̱ xota̱ tji̱e̱e̱ Jakoo̱b!
14¡Ndibá nginíjnú nga ka̱majñoó,
kó chaꞌayàboájnú xikoó ńñaá,
kó ti̱tjatjíyajónjnúu̱ na̱xi̱ńdáꞌniuú!
15¡Ti̱ńtja̱boájnú xikoó xota̱ xi tjimásón nga mongase nichinie,
kó nga tsiejínjnú kui ni̱xtji̱e̱e̱n, ko̱jo chaꞌayàjnú!
16Ta̱nga án boá xi siée̱ ngaꞌniúu̱.
Nga ta̱jño̱ó kuíꞌá an kjo̱a̱ni̱ma̱takóo̱n,
ngatꞌa̱ Jí boá xi kichínní, ko̱jo akasíke̱jení ni̱xtjin nga nda̱ kamána.
17¡Jí boá xi boeꞌéní ngaꞌniú, Jí boá xi siee salmo̱!
Ngatꞌa̱ Jí boá xi tichínní, ko̱jo Jí boá Ne xi ni̱ma̱ maa̱ an.
Currently Selected:
Xo̱jo̱n Salmoo̱ 59: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
