Xo̱jo̱n Salmoo̱ 58
58
Jí boá ngo Ne xi kixi̱
Só xi katsꞌénda Ndabii̱.
1Ngo ni kosíyájnúꞌun, jún xi nendiꞌamasienjnú.
A ja̱koxi̱ boá nga ni xi kixi̱ xi ꞌmíyajnú.
A kixi̱ ndyi̱niꞌánjéjnúu̱ xota̱ nga̱sondiee̱.
2Jmí, ta̱sá ngi̱jin ini̱ma̱jnú ꞌbíjinjnú ni xi kixi̱jín,
kó ndsa̱jnú je tjikítsie maá ni xi ndajín,
xi je kjifochó ngayeje nga̱sondiee̱.
3Xota̱ xi ꞌniú ndajiín, jè kichajá ndeskande ngindiee̱ nga stse̱n,
kó xota̱ xi ndisoo̱, jè jatson ndeskande nga síndo ngi̱ya ndo̱bo̱a̱ndií na̱aa̱n.
4Kui xotaa̱ tsꞌénꞌónná eén nga chji̱a̱,
xikó maá tsi xaán ye̱ tjiín.
Xaán ye̱ xi xtiyaa̱, xi ꞌbíchjá tji̱bo̱a̱nijon,
5tsi̱ꞌe̱ nga ku̱i̱ntꞌièjiín ni xi tsó nda̱ tjiꞌee̱,
ndatsi ta̱nisién ꞌniú maá nga tsꞌén kjo̱a̱tjiꞌe.
6¡Ji Ne, chjátꞌé Jí ṉꞌni̱u̱ kui xotaa̱!
¡Ji Ne, chjátꞌé Jí ṉꞌni̱u̱ kui xandi̱je̱e̱!
7¡Ti̱ꞌincheje ji xikó má maá ndáfoaa̱,
kjiꞌanga chaja nga mindyia ngi̱ya ndsa̱!
Kjiꞌanga skji̱ní yáyojoó, ¡ti̱ꞌinkjie Ji yojoó!
8Ti̱ꞌin ji nga ka̱mańdá xikó maá cho̱na̱je̱nńñaá nga fí.
Bo̱a̱ ngatamaa̱ xikó maá ndí xtió xí bejín ndiꞌií tsꞌueé.
9Ngindiee̱ nga sku̱i̱e̱ ti̱jíjnú nga je tjítí ndaꞌyaá,
bo̱a̱ tsꞌén nga to̱kó tjíndo ngase, ko̱jo nga ndyi̱tsꞌènxchán nga skjifé tjo̱ꞌniuú.
10Achichí tsjá ka̱maa̱ xota̱ xi kixi̱i̱ nga sku̱i̱e̱ nga je kiniꞌángojo,
ko̱jo nga ki̱a̱ ko̱níjónni se jiín kui xota̱ xi ꞌniú ndajiín.
11Kósꞌe̱ bi̱ ka̱tso̱ xota̱ nga̱sondiee̱:
¡Ja̱koxi̱ boá nga ngo ni xi niꞌán tsꞌén xota̱ xi kixi̱i̱!
¡Ja̱koxi̱ boá nga tikón ngo Néná xí kixí tsꞌén tsꞌenseén xotaa̱ kui nga̱sondiee̱!
Currently Selected:
Xo̱jo̱n Salmoo̱ 58: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
