Xo̱jo̱n Salmoo̱ 57
57
Mejénna nga Ji xi xchínní
Ndabii̱ katsꞌénda kui soó kjiꞌanga tsangaa̱ Sauu̱l, kósꞌe̱ ngo ti̱xa̱na̱xi̱ kijíkꞌíjñaꞌma.
1¡Ngatamani̱ma̱a̱ an, Ji Ne!
¡Ngatamani̱ma̱a̱ an!
¡Ngatꞌa̱ Jí boá xi kjimaꞌniátakoón ini̱ma̱na,
kó ki̱a̱ kotíjña̱ nga xchínní ngindie tji̱nkꞌi̱e̱én nga̱a̱,
ngaskande nga kjo̱a̱ꞌa ni xi ndajiín!
2Néná xí tikón ndiꞌakꞌajmii̱ boá xi ꞌniú kuichjiáa̱,
ngatꞌa̱ Kuí boá xi ngatsjéni̱xtjin nga bosikójona.
3Kuí boá xi ndeskande nkꞌajmii̱ kꞌo̱xiéꞌána,
kjo̱a̱a̱ xota̱ xi ndajín tsꞌénjo̱na.
¡Néná boá xi sa̱ngíyá kjo̱a̱ni̱ma̱takoón ko̱jo kjo̱a̱kixi̱i̱!
4Jè ngaskande xikoó tsi ngi̱jii̱n xandi̱je̱ je tikón kjo̱a̱mindyionna,
jè ki̱a̱ kjiꞌijña an ki̱a̱ ngi̱jii̱n xota̱ xi ndiꞌí tsꞌénkjasó,
kui xi ṉꞌni̱u̱ ja̱kon yáyojó xi niꞌánkꞌién xota̱ má kon,
ko̱jo na̱je̱n ja̱kon ki̱cha̱ndojó xi yojó má kon.
5¡Ji Ne, ngachjaninkꞌa Jaꞌée̱n ndeskande nga̱soón nkꞌajmii̱!
¡Kjo̱a̱je xi tjiín Jí ngasꞌie ngayeje nga̱sondiee̱!
6Ngo chja̱ya̱ índo tsi̱ꞌe̱ nga ki̱a̱ kꞌo̱ka an nga kjo̱a̱ꞌa an,
kó ini̱ma̱na achichí nda̱ kamaá,
ngo ti̱xa̱ katsꞌénda ngindyikón án,
ta̱nga ta̱sá ti̱kuii xi ixóyà.
7Ji Ne, ini̱ma̱na jè tikónda nga mejeén si̱eé só,
kó sièe̱ só ko̱jo salmo̱.
8¡Ti̱ꞌinkjeꞌée̱ yojòo̱ ji ndí ini̱ma̱na xi tsa̱ꞌa̱n!
¡Ti̱ꞌinkjeꞌée̱ yojòo̱ ji arpaa̱ ko̱jo salterioo̱!
¡Ngatꞌa̱ an ta̱jñó kjo̱stjíe̱n an!
9Jí boá xi sa̱ꞌintsjaà ngi̱jii̱n nangii̱ Ji Ne,
kó siee salmo̱ ngi̱jii̱n na̱xi̱ńdaá.
10Ngatꞌa̱ achichí je kjo̱a̱ni̱ma̱takóo̱n nga ngaskande nkꞌajmii̱ fochó,
kó ngaskande ngi̱jin ṉdi̱i̱ fochó kjo̱a̱kixi̱i̱.
11¡Ngatamayandikoón ngaskande nga̱soón nkꞌajmii̱ Ji Ne!
¡Kó kjo̱a̱je xi tjiín ngatꞌié nga̱soón ngayeje nga̱sondiee̱!
Currently Selected:
Xo̱jo̱n Salmoo̱ 57: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
