Xo̱jo̱n Salmoo̱ 51
51
Ji Ne, ti̱ꞌinjetakínní
Ndabii̱ katsꞌénda kui soó jaskan ngije kisꞌiejo̱ na̱ Besabee̱. Nda̱chji̱ni̱e̱ꞌén xi ꞌmí Nataa̱n katsꞌénxchánjo̱ kjo̱a̱a̱ nga Ndabii̱ katsꞌéntꞌaa̱kjo̱a̱ chjo̱ón.
1¡Ngatamani̱ma̱a̱ an Ne, xikó kjiꞌi kjo̱a̱ni̱ma̱takón xi tjiín,
kó ti̱ꞌinkjie Ji ni xi ndajín xi katsꞌen an, xikó kjiꞌi kjo̱a̱ni̱ma̱takón tsie xi tjiín!
2¡Taníjín ngase ji ni ndajín xi katsꞌen an,
kó ti̱ꞌintsjiejínní kjo̱a̱a̱ jé xí katsꞌen an!
3Ngatꞌa̱ be án ni xi ndajín xi tsꞌen an,
kó ngatsjéni̱xtjin nga kje̱n án tikón jéna.
4Ta̱ soboá kondra̱ tse̱ boá nga katsꞌenjé án,
kó ndajínkjiꞌi ni xi katsꞌen an ngindyikin Ji,
tsi̱ꞌe̱ nga xcha̱ nga kixi̱ Jí nga botíjé Jí,
ko̱jo nga tsjie boá kui kjo̱a̱kixi̱ xi niꞌín Ji.
5Ja̱koxi̱ boá nga ngi̱jii̱n ni xi ndajiín nga kamánda an,
ko̱jo nga ngi̱jii̱n jeé boá nga kamánda an ngi̱ya nga̱ntsꞌo̱a̱ na̱anna.
6Ja̱koxi̱ boá nga mejeén xche̱ ji ni xi tjiꞌmaá,
kuíni nga ꞌma ꞌma te̱ꞌéní kjo̱a̱kjínkóo̱n.
7¡Isopo̱ ti̱ꞌinkjìn jí nga ti̱ꞌintsjiejínní, kó ka̱matsjiejón an,
taníjínní, kó tiboa ngase ka̱ma an ta̱bo̱a̱jiín nchꞌaàn!
8¡Te̱ꞌéndièní nga kuintꞌièe̱ kjo̱a̱tsjaa̱ ko̱jo kjo̱a̱mojnoó,
kó tsja ka̱ma nginií kui ńda xi Ji kiniꞌínꞌíi̱n!
9¡Ngata̱ ki̱a̱jín tsitsijìi̱n jé xí katsꞌen an,
kó ti̱ꞌinkjie Ji ngayeje ni xi ndajín xi katsꞌen an!
10¡Ji Ne, ngo ini̱ma̱ xi tsjie ti̱ꞌindení,
kó ngo a̱siénni̱xtjin xi kixi̱ tꞌíjñijìnní!
11¡Ngata̱ kjinjín niꞌínkjeꞌéní ngindyikin Ji,
ti̱nde ngata̱ chjeꞌéxínjínní A̱siénni̱xtjin tsjièe̱!
12¡Te̱ꞌé nginí kjo̱a̱tsja xi tjiín kjo̱a̱ꞌnaxiéꞌáa̱,
kó ngo a̱siénni̱xtjin xi nda ngatasikójona!
13Kó bo̱a̱ tsꞌén nga ka̱ma kokoyáa̱ xota̱ xi kitikjo̱a̱a̱ ndi̱yàa̱,
kó xota̱ jeé sa̱ꞌínkꞌoyà yojoo̱, kósꞌe̱ Ji sa̱ꞌínseén ngijee̱.
14¡Ti̱ꞌindení kjo̱a̱a̱ nga ini̱ma̱ niꞌánkꞌieén,
Ji Ndi̱a̱, ko̱jo ji Ne xi ꞌboxiéꞌána,
kó najén án tsja ka̱maa̱ nga si̱é kjo̱a̱a̱ kjo̱a̱kixi̱i̱!
15Ji Ndi̱a̱ chjáxꞌé Jí ndso̱ꞌba án,
kó ndso̱ꞌba án si̱eé só nga sa̱ꞌíntsjaà.
16Ngatꞌa̱ Ji, mejénjiín kjo̱a̱tjó xi an sa̱ꞌínkꞌasꞌiee̱n katsaki,
kó tsi kjo̱a̱tjó sa̱ꞌinkꞌasꞌiee̱n, chjábéjín Ji.
17Kjo̱a̱tjó xi tsja maa̱ Néná kuí boá ngo a̱siénni̱xtjin xi ni̱ma̱kjo̱a̱ tikón.
Ji Ne, niꞌínchꞌíjín ji ngo ini̱ma̱ xi je katsꞌénkꞌoyá yojoo̱, ko̱jo xi ni̱ma̱kjo̱a̱ tikón.
18Nda ti̱ꞌinje̱ Ji na̱xi̱ńdáꞌniú Sioo̱n ta̱ngatꞌanii̱ nga nda Ji xota̱,
kó chjanínkꞌé nginí Ji xó xí foaꞌatjiyajoo̱n na̱xi̱ńdáꞌniú Jerusalee̱n.
19Kósꞌe̱ kjiꞌá boá nga tsja ka̱maa̱ nga si̱ꞌankꞌasꞌiee̱n kjo̱a̱tjó xi tjiín kjo̱a̱kixi̱i̱,
ko̱jo chji̱e̱, ko̱jo kjo̱a̱tjó xi ꞌbítí yeje,
kósꞌe̱ si̱ꞌankꞌasꞌien ki̱a̱ nga̱són ṉchàa̱n ndií cho̱yojo.
Currently Selected:
Xo̱jo̱n Salmoo̱ 51: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
