Xo̱jo̱n Salmoo̱ 50
50
Néná boá xi bongítaꞌin xota̱ xi ndajín
Só xi katsꞌénda Asaa̱f.
1Néná, Kui Néná xí tjiín kjo̱a̱jee̱,
tsꞌénchji̱a̱a̱ xotaa̱ kui nga̱sondiee̱,
ndeskande nínga fotjo tsꞌueé,
kó ngaskande nínga ꞌbosꞌien.
2Ndeskande na̱xi̱ńdáꞌniú Sioo̱n,
kui na̱xi̱ńdá tsjákjiꞌi ko̱jo xi ꞌniú ndaa̱,
Néná tsjandiè nga ya ndiꞌií.
3¡Jè ndibá Néná! Ta̱nga jmí tsi xió tsꞌén tsꞌéndibá:
Ngo ndiꞌí xi tjítsꞌénkjié ngayeje nii̱ tsꞌéndibátjoón,
nga ngo foaꞌatjiyajoo̱n Kui, tsꞌéndibá ngo tjo̱ꞌniú.
4Ndeskande nkꞌa jàn tsꞌéntsóyaà nkꞌajmii̱ ko̱jo tꞌanangii̱,
tsi̱ꞌe̱ nga kui xi sa̱ꞌínjeé xota̱ na̱xi̱ńdaá.
5Kó bi̱ tsó:
¡Tꞌítikójnúꞌun xota̱ tsjiena!
Kui xota̱ xi ngo ni je índajo̱na, kó je katsꞌénkꞌasꞌienna kjo̱a̱tjó.
6Nkꞌajmii̱ ka̱tso̱yà kjo̱a̱kixi̱i̱ Néná,
ngatꞌa̱ Néná boá xi Nendiꞌamasiee̱n.
7Ti̱ kuíní Néná xi bi̱ katsó:
Tasiénijónjnúꞌun jún xota̱ na̱xi̱ńdána Israee̱l,
ndaꞌyájnú, ngatꞌa̱ Án boá xi kongítaꞌínjnúꞌun jún,
Án boá xi Néná, kui xi Nejnú.
8Tsꞌenxchánjo̱jínjnúꞌun kjo̱a̱a̱ cho̱ xi niꞌánkꞌasꞌiénjnúꞌun,
ko̱jo kjo̱a̱a̱ cho̱ xi ngatsjéni̱xtjin nga ꞌbítíjnú ngindyikón Án,
9ta̱nga skjíbéjín an ndií cho̱yojo xi chji̱a̱ni ndiꞌajnú,
ko̱jo tsi ndií tindso̱ xi síndo ki̱a̱ nchꞌoájnú,
10ngatꞌa̱ Án tsa̱ꞌa̱n ngayeje cho̱ tamá xí tjín ngi̱jin kꞌijñaá,
ko̱jo ngayeje mi̱ cho̱ xi tjín ngi̱jin na̱xi̱i̱.
11Jè be An ngayeje cho̱ xi tjiín tsja̱nga̱ xi tjín ngi̱jin na̱xi̱i̱,
kó ngayeje xi tsꞌéntíyà ngi̱jin kꞌijñaá, Án tsa̱ꞌa̱n nga.
12Tsi An xi bojóna, nde jmí nichinie kuíꞌájínjnúꞌun,
ngatꞌa̱ Án tsa̱ꞌa̱n ngayeje nga̱sondiee̱, ko̱jo ni xi tjiín.
13A sꞌijinjnú nga yojoo̱ cho̱yojo toro̱ xi kjíni̱e̱ An,
ko̱jo nga jiín ndií cho̱tsa̱nga̱ xi ꞌbi An.
14¡Ndibájo̱jnúꞌun kjo̱a̱tjó xi niꞌánkꞌasꞌien nga niꞌántsjaà Néná!
¡Kó ti̱ꞌankjatjosónjnúu̱ Néná xi tsi̱ꞌe̱ ndiꞌakꞌajmii̱, ni xi ko̱ndókjo̱a̱tjónjnúu̱ nga si̱ꞌánjnú!
15Kósꞌe̱ ndókjo̱a̱jnúꞌun ni̱xtjin nga nda̱ ka̱majnú,
kó An kꞌoxiéꞌájnúꞌun, sꞌe̱ jún si̱ꞌandikónjnúꞌun ngijee̱.
16Ta̱nga Néná, bi̱ tsoó xota̱ xi ndajiín:
ꞌYá jií bo̱a̱ nga ji kon xi ko̱ndókjo̱e̱ ji kjo̱a̱kitina,
ko̱jo nga ji kon xi ko̱ndókjo̱e̱ ji kjo̱a̱ꞌbíndana.
17Ji xi chꞌoo̱ nga si̱ꞌanchji̱ni̱e̱e̱, kó niꞌínsénjíi̱n ji énna.
18Nga tsi ye ji ngo xota̱ xi chejé, miyí má ji nga ki̱a̱ ꞌmitji̱ngíi̱,
ko̱jo nga xota̱ xi ndyi̱tsꞌèntꞌaa̱kjo̱a̱ xkjín, ki̱a̱ niꞌínkamaje̱ ji.
19Kjo̱a̱a̱ ni xi ndajiín boá xi niꞌínkjìn jí ndso̱ꞌbe,
kó najen ji éndísó boá xi chji̱a̱.
20Ngaskande mindyin má ji nga ndokjo̱e̱taꞌin ji ntsꞌie,
kó ꞌbíndisetaꞌin ji ndií ti̱kuii na̱áa̱n.
21Kuí bí kui nii̱ xi je kiniꞌín ji,
kó a xió kotíjña̱ An.
A kiniꞌínkjé jí nga bo̱a̱ kon An xikoó jí.
Sa̱ꞌinxchánjo̱ñaá, kó koko An jée̱ ti̱ ki̱a̱a̱ ngindyikin ji.
22Nda má ngatamakjínjnú kui nii̱ jún xi niꞌánchíyájnú Néná,
ngatꞌa̱ tsita̱ sa̱ꞌínxi̱jnú, kó nde jmíjín xi kꞌo̱xiéꞌájnú.
23Kui xi tsja̱ana ngo kjo̱a̱tjó xi niꞌánkꞌasꞌien nga boeꞌé ndokꞌóchjì,
kuí boá xi tsꞌéndíkónna,
kó kui xi kixi̱ ku̱i̱ꞌíndonda ndi̱yà xí tsoꞌbá,
kuí boá xi kokóo̱ kjo̱a̱ꞌnaxiéꞌaá Néná.
Currently Selected:
Xo̱jo̱n Salmoo̱ 50: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
