Xo̱jo̱n Salmoo̱ 52
52
Ni xi ka̱maa̱ xota̱ xi ndajiín
Ndabii̱ katsꞌénda kui soó, kjiꞌanga nda̱ xi xota̱ tji̱e̱e̱ Endoo̱n xi ꞌmí Ndoee̱, kijíkoón Sauu̱l nga bi̱ katsoó: Ndiꞌaa̱ Ayimelee̱k jè kijí Ndabii̱ ki.
1Ji nda̱ xi ꞌniú chꞌokon, míkjo̱a̱a̱ nga nkꞌakon ꞌnaxié yojòo̱ kjo̱a̱a̱ ni xi ndajín xi niꞌín ji.
¡Kjo̱a̱ni̱ma̱takoón Néná tikón síkijí boá!
2Ni xi tsꞌenkjiéná boá xi chji̱a̱ najen ji,
kó xikó maá ngo ndobaja̱ xi yojó má nga chji̱a̱ éndísó.
3Tjó ngase kamaá ni xi ndajín xi kiniꞌín ji, ta̱bo̱a̱jiín ni xi ndaa̱,
tjó ngase kamaá éndísoó, ta̱bo̱a̱jiín kjo̱a̱kixi̱i̱.
4Kó ji najen xi chji̱a̱ éndísó,
jè kiniꞌíntjé ji ngayeje to̱ko̱ya én xí tsꞌénꞌónná.
5Kuíni nga Néná boá xi sa̱ꞌínkjieé ngatsjéni̱xtjin,
skjifeé, kó ko̱ngatji̱ngii̱ ndiꞌàa̱,
Kuí boá xi skji̱níyánii̱ kui nga̱sondie nínga síndo xotaa̱.
6Nga sku̱i̱e̱ kui nii̱ xota̱ xo kixi̱i̱, achichí stsa̱kjonní,
kó ko̱jno̱kie kui nga bi̱ ka̱tso̱:
7¡Tsitsíjenjnúu̱ kꞌi̱e̱e̱, kui nda̱ xi jmí tsi Néná tsangase nga tsja̱angaꞌniuú,
ta̱sá kjo̱a̱cho̱n tsiee̱ xi kamáꞌniátakón,
kó ꞌniú ngase kamá nga katsꞌén ni xi ndajiín!
8Ta̱nga an, xikó maá ngo yáꞌolibo̱ xi tikón tsingá tsingá
ka̱ma nga kotíjña̱ an ki̱a̱ Ndiꞌaa̱ Néná,
ngatꞌa̱ kjo̱a̱ni̱ma̱takoón Néná boá xi ngatsjéni̱xtjin nga kjimaꞌniátakón an.
9Ji Ne, ngatsjéni̱xtjin nga tsjaa ndokꞌóchjì,
kjo̱a̱a̱ ngayeje ni xi je kiniꞌín Ji,
kó skoya sakon sakoo̱n Ji ngatsjéni̱xtjin,
ngatꞌa̱ achichí nda kui nii̱, ngindyi̱ko̱n xota̱ na̱xi̱ńdá tsjièe̱.
Currently Selected:
Xo̱jo̱n Salmoo̱ 52: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
