Xo̱jo̱n Salmoo̱ 49
49
Ngata̱ kjo̱a̱cho̱o̱njín ꞌnítakín ji
Só xi katsꞌénda xota̱ ngo ndiꞌaa̱ Koree̱.
1Ndaꞌyájnú kui nii̱, ngayeje jún xota̱ na̱xi̱ńdá.
Ndaꞌyájnú jún xota̱ xi chji̱a̱ni kui nga̱sondiee̱.
2Ko̱jo jún xota̱ xi ni̱ma̱ tindyiónjnú,
ko̱jo jún xota̱ xi ni̱ma̱kjo̱a̱,
ko̱jo jún xota̱ xi cho̱n,
ko̱jo jún xota̱ xi tjiín ngaꞌniú,
¡ndaꞌyájnúꞌun nga!
3Én xí tjiín kjo̱a̱kjíntakón boá xi ku̱i̱chji̱a̱ ndso̱ꞌba án,
kó ni xi tjiín kjo̱a̱kjínkón boá xi sꞌi̱jin ngi̱jin ini̱ma̱na.
4Kosiennijòo̱n énkjínkoón,
kó tji̱e̱nga kjifonie arpaa̱ xiyàjnúꞌun mí nii̱ bo̱a̱.
5Míkjo̱a̱a̱ nga stsakjon an ni̱xtjin xi niꞌii̱n,
kjiꞌanga je jaꞌatjiyajonna ni xi ndajín xi mejeén sa̱ꞌínjo̱na kondra̱na,
6kui xi kjo̱a̱cho̱o̱n boá xi kjimaꞌniákón,
kó nkꞌa ꞌboxié yojoo̱, kjo̱a̱a̱ to̱n xi bo̱a̱ nda tjiín.
7Nde ngojín kui xotaa̱ xi ka̱maa̱ kꞌo̱xiéꞌá ngo ntsꞌi̱e̱,
ti̱nde ka̱májiín ku̱i̱ꞌíchjií Néná tsi̱ꞌe̱ nga kꞌo̱xiéꞌá,
8ngatꞌa̱ kjo̱a̱ꞌnaxiéꞌaá kjo̱a̱mindyioo̱n achichí chjí,
kó nde ngojín to̱n xi ka̱ma ku̱i̱je̱nnii̱,
9tsi̱ꞌe̱ nga kꞌuijñá ngatsjéni̱xtjin, kó nga jmíni̱xtjin kjo̱tsòn.
10Ngatꞌa̱ sku̱i̱e̱ nga ngaskande xota̱ xi kjínkoón fesón nga,
kó ti̱ fesón xota̱ xi jmí ni bejín, ko̱jo xi kitikjo̱a̱a̱ nga,
kó kjo̱a̱cho̱o̱n kje̱ꞌe xota̱ ꞌbijñaá.
11Katsꞌénkjó nga ndiꞌaa̱ ngatsjéni̱xtjin nga kꞌuijñá,
ko̱jo nga ngi̱ndiee̱ kꞌuijñá ta̱kjiꞌání,
kó ngaskande tꞌanangii̱ jaꞌeén je índoo̱.
12Ta̱nga xota̱ nga̱sondiee̱ jmí tsi ngatsjéni̱xtjin nga xcha̱ndikón,
ngatꞌa̱ xikónií cho̱o̱, nga fesón nga.
13Kjo̱a̱kitikjo̱a̱ boá xi ndi̱ya̱à kui,
kó xota̱ xi yajángií kui, tsja maa̱ ni xi tsó.
14Ti̱ kuíní bo̱a̱ xi je síndonda xikoó ngo xtín cho̱tsa̱nga̱ nga fí nga̱tsjo̱ó,
kó kjo̱a̱bo̱yaa̱ boá xi fotsoꞌbátjoón,
kó fí kixi̱ kixi̱ nga̱tsjo̱ó, kósꞌe̱ chaja yojoo̱,
nga̱tsjo̱ó boá nínga ndiꞌaa̱ ka̱ma.
15Ta̱nga Néná boá xi kꞌo̱xiéꞌá kjo̱a̱mindyionna ngi̱ya tsja kjo̱a̱bo̱yaa̱,
ngatꞌa̱ Kuí boá xi ko̱e̱je̱jona.
16Ngata̱ nda̱jín maá kjiꞌanga tjín xí kjimacho̱n,
ko̱jo kjiꞌanga ꞌbikítsie maá ni tsjakon ndiꞌaa̱,
17ngatꞌa̱ ta̱jmìjín ni xi ko̱e̱je̱jo kjiꞌanga ko̱yà,
ti̱nde kjo̱a̱cho̱o̱n ko̱e̱je̱jojín ki̱a̱ nga̱tsjo̱ó.
18Ndatsi tji̱e̱nga tikón ti̱kuii ini̱ma̱a̱ sa̱ꞌínchikonñé,
kó ndatsi nda ko̱ndókjo̱a̱ kjo̱a̱a̱ kui ngatꞌa̱ katjoninkꞌaa̱ yojoo̱,
19ta̱nga nga kjo̱chó ni̱xtjin, ki̱a̱ ko̱e̱je̱ nínga síndo xi xchaá,
kó ngiti̱ nginijánjín sku̱i̱e̱ ndiꞌií.
20Kui nda̱ xi yandikoón, kó makjínjín kui nii̱,
ti̱ kuínií xikoó cho̱ xi fesoón.
Currently Selected:
Xo̱jo̱n Salmoo̱ 49: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
