Xo̱jo̱n Salmoo̱ 48
48
Na̱xi̱ńdáꞌniuú Néná
Só xi katsꞌénda xota̱ ngo ndiꞌaa̱ Koree̱.
1¡Achichí ngaꞌniú xí tjiín Néná, kó tsoboárií nga ꞌniú si̱ꞌantsjaa̱!
Ki̱a̱ na̱xi̱ńdáꞌniuú Néná, ki̱a̱ na̱xi̱ ndikoón.
2Achichí tsjákjiꞌi kui na̱xi̱ nkꞌaa̱, kui xi kjo̱a̱tsjaa̱ ngayeje nga̱sondiee̱,
Na̱xi̱ Sioo̱n, ki̱a̱ nínga fetꞌanii̱ xtji̱e̱e̱n ta̱ꞌii̱n,
kuí boá xi na̱xi̱ńdáꞌniuú kui Re xi tjiín ngaꞌniuú.
3Néná ngi̱jii̱n kui ndo̱bo̱a̱xa̱á, ya xikoó ngo tarié xi ꞌniú.
4Re xi tjín nga̱sondiee̱ je katsꞌéngo yojoo̱,
tsi̱ꞌe̱ nga skjánjo̱ xota̱a̱ na̱xi̱ńdáꞌniuú,
5ta̱nga ngije kamábe na̱xi̱ńdáꞌniuú, kijíndikoón,
kó nde ngiti̱ kamábejín ni xi sa̱ꞌín,
kó achichí katsakjónní nga tsangandikón.
6Kó ki̱a̱a̱ kjindibánié ngo kjo̱a̱ndi̱ko̱n,
achichí on kamaá xikó maá tsi̱ndi̱o̱o̱ nga je stse̱n ngo ndí.
7Xikoó tjo̱ xi ndibání xtji̱e̱e̱n na̱ngi,
nga akakjen Ji tjotso yiꞌii̱ nangi Tarsii̱.
8Xikótsꞌèn kandaꞌyájne̱ kui nii̱, bo̱a̱ má tsꞌén kamáyàjne̱,
ki̱a̱ na̱xi̱ńdáꞌniuú Néná xí tsi̱ꞌe̱ jájuún, ki̱a̱ na̱xi̱ńdáꞌniuú Nejne̱,
kuí boá xi sa̱ꞌín, nga kui na̱xi̱ńdáꞌniuú ꞌniú kꞌuijñá.
9Jaꞌátsjienjne̱ kjo̱a̱ni̱ma̱takóo̱n Ji Ne,
ki̱a̱ ngamasiee̱n na̱ngo̱xi̱i̱.
10Xikoó Jaꞌée̱n Ji Ne, bo̱a̱ má kjiꞌi kjo̱a̱yandikóo̱n,
kui xi fochó ngaskande nínga fetꞌanii̱ nga̱sondiee̱,
kó ndse̱ kixi̱ Ji tjikítsie maá kjo̱a̱kixi̱.
11¡Tsjangatamaa̱ na̱xi̱ Sioo̱n!
¡Tsjangatamaa̱ xota̱ tji̱e̱e̱ Jundáa̱, ta̱ngatꞌanii̱ nga kixi̱ niꞌínjé Jí!
12Tangínjnú nga ngo foaꞌatjiyajoo̱n na̱xi̱ńdá Sioo̱n,
kó tsitsíjenjnúu̱ kótjín má tarié xi tjiín.
13Tsitsíjen ndá ndájnúu̱ xó xí tjíchjáꞌyáni,
kó tꞌíndikónjnú ndiꞌa yiꞌi xi tjiín,
tsi̱ꞌe̱ nga kꞌuiyàjnúu̱ xota̱ tji̱e̱ xi jaskan kꞌuieé.
14Nga bo̱a̱ kjiꞌi ni xi tsꞌén Néná, ngatsjéni̱xtjin ko̱jo ta̱kjiꞌání.
¡Néná boá xi kꞌuíjñatjónná ngaskande nínga kjín ngasenii̱ kjo̱a̱bo̱yaa̱!
Currently Selected:
Xo̱jo̱n Salmoo̱ 48: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
