Xo̱jo̱n Salmoo̱ 46
46
Néná tsꞌénkónná
Én xí katsꞌénda xota̱ ngo ndiꞌaa̱ Koree̱.
1Néná boá xi kónná ko̱jo xi tsjangaꞌniúná,
kuí boá xi tsá bosikójoná kjiꞌanga nda̱ kjimáná.
2Kuíni nga ko̱nda̱kónjín ñá ndatsi kjo̱tsiè tꞌanangii̱,
ko̱jo ndatsi na̱xi̱i̱ ko̱e̱je̱ngandá ngamasiee̱n ndáchíkoón,
3ko̱jo ndatsi kjo̱ni̱e̱ ko̱jo tsi kjo̱ni̱e̱ngí ndáfoaa̱ ndáchíkoón,
ko̱jo ndatsi sꞌi̱tsanieyá na̱xi̱i̱ ta̱ngatꞌanii̱ ngaꞌniuú ndáfoaa̱.
4Tikón ngo ndejèꞌ xi ndáfoaa̱ tsꞌéntsjaà na̱xi̱ńdáꞌniuú Néná,
nínga tikón Ndiꞌandikoón, kui Néná xí tikón ndiꞌakꞌajmii̱.
5Néná boá xi tikón ngamasiee̱n kui na̱xi̱ńdáꞌniuú, kó jmíni̱xtjin ka̱matíyaá,
Néná boá xi ko̱síko̱jo kjiꞌanga si̱si̱eén.
6Achichí nda̱ kamaá xota̱ na̱xi̱ńdaá,
jatsiéndíkón má ngi̱ndie nínga botíxomaa̱,
nga kandaꞌyá nda̱a̱ Néná, kamáńdá má tꞌanangii̱.
7Néná xí tsi̱ꞌe̱ jájuún, ñá boá xi tikónjinná,
Néná boá xi kónná, Nee̱ Jakoo̱b.
8Ndibájnú, kó tꞌíndikónjnú ni yiꞌi xi je katsꞌén Néná,
jè íjñátiya ngayeje nga̱sondiee̱.
9Kuí boá xi tsꞌénkꞌíxió kjo̱a̱xcha̱án ngaskande nínga fetꞌanii̱ tꞌanangii̱,
kuí boá xi kjítꞌó yáchjonyaá ko̱jo yáyojoó, kó ngi̱jin ndiꞌií ꞌbítí karro̱ kjo̱a̱xcha̱án.
10Kó bi̱ katsó Néná:
Xió ti̱ndyiónjnú, kó ngatamayajnú nga Án boá xi Ne An,
kó ki̱a̱ si̱ꞌandikónna ngi̱jii̱n ngayeje na̱xi̱ńdaá,
ko̱jo xcha̱ndikónna ngayeje nga̱sondiee̱.
11Néná xí tsi̱ꞌe̱ jájuún, kꞌi̱e̱ tikónjinná,
Néná boá xi kónná, Nee̱ Jakoo̱b.
Currently Selected:
Xo̱jo̱n Salmoo̱ 46: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
