Xo̱jo̱n Salmoo̱ 45
45
Kjiꞌanga ixán nda̱ ree̱
Én xí katsꞌénda xota̱ ngo ndiꞌaa̱ Koree̱ kjiꞌanga ixán ree̱.
1Ngi̱jin ini̱ma̱na fotjonii̱ én nda,
kó nda̱ ree̱ boá xi siée̱ sóna.
Najén án, xikónií ni xi tsꞌénꞌindóni ngo nda̱ xi tsꞌénda énkjínkón.
2Jí boá ngo nda̱ xi ꞌniú tsjákjiꞌi ngase ngi̱jii̱n ndií xota̱ nga̱sondiee̱,
achichí kjo̱a̱nda tjiín én xí ndokjo̱e̱ ji.
Kuíni nga ngatsjéni̱xtjin nga Néná tjítsꞌénchíkonñeé jí.
3¡Tjatꞌe ji ki̱cha̱ndojóo̱ ki̱a̱ ndáyáa̱, ji nda̱ chꞌokon!
¡Ngatꞌieé kjo̱a̱je ko̱jo kjo̱a̱yandikón!
4¡Ngatꞌieé kjo̱a̱yandikón, kó ti̱ꞌin ji, ta̱ngatꞌanii̱ ni xi kixi̱i̱,
ko̱jo kjo̱a̱ndaꞌyáꞌeén, ko̱jo kjo̱a̱kixi̱i̱,
Kó ngaꞌniúu̱ boá xi kjo̱joo̱ nga si̱ꞌin ji ni xi yiꞌi!
5Kjín nangi ku̱i̱xo̱ ngindie ndsa̱ki ji,
kó yáyojóo̱ kjo̱a̱ꞌaxtikjaá ini̱ma̱a̱ xota̱ xi kondra̱ manii̱ nda̱ ree̱.
6Nínga botíxome Ji Ne, ngatsjéni̱xtjin tikón, kó jmíni̱xtjin kju̱i̱e̱,
kó kjo̱a̱botíxomàa̱ ni xi tjiín kjo̱a̱kixi̱ boá.
7Kiniꞌíntjé ji kjo̱a̱kixi̱i̱, kó kiniꞌínchꞌí ji ni xi ndajiín,
kuíni nga Néná, kui xi Nèe̱ katsjáxaá,
kó ngo ndásíjee̱n kjo̱a̱tsja, tsie ngase indyiaá jí, ta̱bo̱a̱jiín já xí tsꞌentje̱je ji.
8Ngi̱jin ńjñoo̱ foaꞌándá sije̱n sije̱n mirraa̱, ko̱jo aloee̱, ko̱jo kasiaa̱,
kó ndeskande ki̱a̱ ndo̱bo̱a̱xá xí ndi̱ja̱a̱ ki̱ña̱ kamándanii̱,
ndaꞌyánii̱ soó arpa̱ xi ꞌbikítsie maá kjo̱a̱tsja.
9Ngi̱jii̱n ínchjín xí ꞌniú tsjákón ngasee̱, ki̱a̱ síndojin ndí xí ínchjiín já ree̱.
Kó ki̱a̱ xtji̱e̱e̱n ndse̱ fojnií tikóntꞌa xi ka̱ma na̱ ree̱,
xi yaꞌa ni to̱nsinié xi chji̱a̱ni na̱xi̱ńdáꞌniú Ofii̱r.
10Ndaꞌyé jí tsa̱kjìn, tsitsíjin, kó tasínijin ji,
ti̱ꞌinchíyé ji nangìi̱, ko̱jo ndiꞌaa̱ xi xcháa̱.
11Ree̱ ka̱mamejeén kjo̱a̱tsjakjiꞌii̱ yojòo̱,
che̱ndikín jí kuí, ngatꞌa̱ kuí boá xi ndi̱a̱a̱ ka̱ma.
12Kó ínchjín xí chji̱a̱ni na̱xi̱ńdáꞌniú Tiroo̱ achichí ni tsjakon kji̱ndi̱bájo̱,
kó xota̱ cho̱o̱n na̱xi̱ńdaá ni̱ma̱ ka̱tso̱ nga ku̱i̱ꞌaa̱ kjo̱a̱nda.
13Achichí ndikón kjíꞌí tsa̱kji̱ín ree̱ nga tikón ki̱a̱ ngi̱yaꞌmaa̱,
kó ngo ńjño xi to̱nsinié kamándani yajá.
14Kó kui ńjño chji̱ni̱e̱ xi to̱nsinieé yajá nga kongínjo̱ ngindyi̱ko̱n ree̱,
kó ínchjín xo̱ngo̱ò ko̱e̱je̱tji̱ngii̱,
kó ínchjín xkjín kji̱ndi̱bájo̱o̱ ji.
15Achichí kjo̱a̱tsja ko̱jo kjo̱a̱mojnó kꞌuié nga kongínjo̱,
kó kꞌo̱sꞌien ndo̱bo̱a̱xa̱á nda̱ ree̱.
16Ndíi̱ boá xi kꞌuíndo ngi̱ndiee̱ xi xcháa̱,
kó kuí boá xi ko̱tíxomaa̱ ngayeje nga̱sondiee̱.
17Kó an boá xi sa̱ꞌin an nga Jaꞌée̱n si̱ꞌankjaꞌátsjien ta̱kjiꞌání,
kó kuíni nga xota̱ na̱xi̱ńdaá ngatsjéni̱xtjin nga sa̱ꞌíntsjaà.
Currently Selected:
Xo̱jo̱n Salmoo̱ 45: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
