Xo̱jo̱n Salmoo̱ 44
44
Kjo̱a̱ndé xí je jaꞌa ko̱jo kjo̱a̱chjatꞌayákón xi kjima ngotꞌe̱
Én xí bokoyáná ngo ni, xi katsꞌénda xota̱ ngo ndiꞌaa̱ Koree̱.
1Ji Ne, tji̱bo̱a̱nijón má ji̱n xi je tsintꞌié,
kó xota̱ xi xchájne̱ je bo̱a̱ katsóyàjne̱,
ni xi fíndikónná xí kiniꞌín ji ni̱xtjin nga kisꞌińdo kui, ni̱xtjin xchá jàn.
2Jí má bo̱a̱ xi ikiyitji̱ngìi̱ kui xota̱ na̱xi̱ńdaá,
tsi̱ꞌe̱ nga ki̱a̱ ikꞌínde Ji xota̱ xi xchájne̱ kui ngi̱ndiee̱,
kiniꞌínkjié ndo̱jò ndójo̱ jí kui xota̱ na̱xi̱ńdaá,
kó katseꞌéndièe̱ nga ki̱a̱ kisꞌiee̱ ja̱ma̱ xota̱jne̱.
3Jmí tsi ki̱cha̱ndojoó xi katsꞌénkjién nga kasakoo̱ kui tꞌanangii̱,
ti̱nde jmí tsi tsja xi tjiín ngaꞌniú xí katsꞌénkjién nga katsꞌén.
Ngaꞌniuú ndse̱ kixi̱ ko̱jo kui tjiàa̱ xi tjiín ngaꞌniú boá xi katsꞌénni,
ko̱jo ndiꞌí xí akóni kje̱n Ji boá,
ngatꞌa̱ kiniꞌíntjé ji kui xotaa̱.
4Jí boá xi Rena ko̱jo xi Néna Ji.
¡Te̱ꞌékjo̱e̱ Ji nga ko̱ꞌna̱xiéꞌá xota̱ tji̱e̱e̱ Jakoo̱b!
5Tsi Ji xi ko̱si̱ke̱jejne̱ ka̱majne̱ si̱ꞌanjne̱ kondra̱jne̱,
Jaꞌée̱n boá xi si̱ꞌankjiénjne̱ nga ko̱jna̱niéjné kui kondraa̱.
6Ka̱maꞌniátakónjín an yáchjonyána ko̱jo yáyojóna,
ti̱nde kuijín ki̱cha̱ndojóna xi sa̱ꞌinni an.
7Ngatꞌa̱ Jí boá xi ꞌnaxiéꞌéjne̱, kjo̱a̱a̱ xota̱ xi tsꞌénkjáꞌatiojne̱ kjo̱a̱ni̱ma̱,
ko̱jo Jí boá xi niꞌínkjeꞌe Ji kjo̱a̱soboá xota̱ xi tsꞌenchꞌójne̱.
8Néná boá xi ko̱e̱ꞌéjne̱ kjo̱a̱je nga ngo ni̱xtjii̱n.
Kó ngatsjéni̱xtjin nga si̱ꞌantsjajne̱ Jaꞌée̱n.
9Ta̱nga ngotꞌe̱ ꞌne̱ jè kiniꞌínchꞌíjne̱ ko̱jo kiniꞌíntsobejinjne̱.
Jè ngiti̱ nijan ꞌmije̱jín Ji jájúnjne̱.
10Jí boá xi niꞌín Ji nga miyondikónjne̱ kondraa̱,
kó xota̱ xi chꞌoo̱ ji̱n foaꞌáxínjne̱ ngayeje ni xi tjínjne̱.
11Kiniꞌínkꞌasꞌinjne̱ xikó maá cho̱tsa̱nga̱ xi tjífíniꞌánkꞌién,
kó kiniꞌíntsojoboejne̱ ngi̱jii̱n na̱xi̱ńdaá.
12Ta̱kjo̱a̱ndaní nga akatíñí Ji xota̱ na̱xi̱ńdáa̱,
kó nde jmí chjí kichjiéꞌéjín Ji kjo̱a̱a̱ kui.
13Jí boá xi kiniꞌín Ji nga tsajnókiejne̱ xota̱ xi síndotꞌajne̱,
kó kjo̱a̱mojnóchaá ko̱jo kjo̱a̱soboaá xota̱ xi síndo nga ngo foaꞌatjiyajonjne̱ je kamájne̱.
14Jí boá xi kiniꞌín Ji nga énkjín katsꞌéndataꞌinjne̱ xota̱ na̱xi̱ńdaá,
xikó maá ni xi mojnóchà kjimajne̱ ngi̱jii̱n kui xota̱ na̱xi̱ńdaá.
15Ndyiojón ndyiojón nga achichí soboá mána,
kó nde ngiti̱ mejénjínna koko an kje̱n án,
16ta̱ngatꞌanii̱ nga kjandayàjo̱na kui xi mojnókiena ko̱jo xi bendikónjínna,
ko̱jo ta̱ngatꞌanii̱ kondraa̱ ko̱jo xi tsꞌéngojoo̱.
17Ngayeje kui nii̱ xi je kjindibániéjne̱
ta̱nga kji̱e̱ niꞌánchíyájínjne̱ Ji,
kó to̱kó kjimaꞌniátakónjne̱ kjo̱a̱ꞌbíndàa̱,
18ini̱ma̱jne̱ kji̱e̱ ngo ndi̱yà fíni nga̱xto̱n,
ti̱nde ndsa̱kojne̱ kji̱e̱ ngo ndi̱yà ndyi̱ꞌbijñámasien ndi̱yàa̱.
19Kó ndatsi bo̱a̱ kjiꞌi ni xi je kamájne̱, jè kiniꞌínni̱ma̱kjo̱a̱jne̱,
kó ki̱a̱ ikꞌíndejne̱ xikoó ngindiee̱ cho̱ chakaa̱l,
kó ngi̱ndie nínga jñoó kjo̱a̱bo̱yaa̱ je ikꞌíjñiníjne̱.
20Tsi je kiniꞌánchíyájne̱ Jaꞌeén Nejne̱,
ko̱jo tsi kje̱ꞌe ne je kiniꞌántsjájne̱ nga kachjaninkꞌajne̱ ndsa̱jne̱,
21kó Néná, a mí tsí je kamákjiín kui nii̱ tsobo̱a̱,
ngatꞌa̱ Kui jè be ni xi tjiꞌmaá ini̱ma̱a̱.
22Ta̱nga ta̱ngatꞌanií Ji nga ndyiojón ndyiojón niꞌánkꞌiénjne̱,
kó bo̱a̱ mataꞌinjne̱ xikoó cho̱tsa̱nga̱ xi mongínjo̱ nínga niꞌánkꞌién.
23¡Ti̱ꞌinkjeꞌée̱ yojòo̱ Ndi̱a̱! ¡Ánní nga titsjafé kon Ji!
Tindyiendyikin Ji, kó ngata̱ ꞌbíjñímasínjínjne̱ ngatsjéni̱xtjin.
24Ánní nga mindyinꞌmí kon Ji.
Ánní nga niꞌínchíyé kon Ji kjo̱a̱ndasenjne̱,
ko̱jo kjo̱a̱ni̱ma̱ xi ndyi̱bitjatiójne̱.
25Ngatꞌa̱ ini̱ma̱jne̱ jè jenda, kó ngaskande tꞌanangii̱ je kjiꞌijña,
jè ngaskande tꞌanangii̱ ndyi̱ꞌbíféjne̱ yojojne̱.
26¡Ti̱sítji̱n Ji, kó ndibékasíke̱jejne̱ ꞌne̱,
ꞌna̱xiéꞌéjne̱ ta̱ngatꞌanii̱ kjo̱a̱ni̱ma̱takóo̱n!
Currently Selected:
Xo̱jo̱n Salmoo̱ 44: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
