Xo̱jo̱n Salmoo̱ 41
41
Ti̱ꞌindaye nginí
Só xi katsꞌénda Ndabii̱.
1¡Achichíra̱ tsjaa̱ xota̱ xi nda̱ maa̱ xota̱ ni̱ma̱a̱!
Ngatꞌa̱ kjiꞌanga kji̱ndi̱bá ni̱xtjin xi ndajiín, Néná boá xi kꞌo̱xiéꞌá.
2Néná boá xi skoón, kó tsja̱á kjo̱a̱mindyion,
kó tsjatsꞌèn kꞌuijñá kui nga̱sondiee̱,
kó tsja̱ndièjín nga kondra̱a̱ ta̱ ni xi mejénrií sa̱ꞌínjo̱.
3Néná boá xi ko̱síko̱jo kjiꞌanga ka̱maꞌoo̱n,
kó sa̱ꞌíndaya ngayeje chiꞌin xi kꞌuieé.
4Kó bi̱ kixian an: Ji Ne, ngatama ni̱ma̱a̱ an,
kó ti̱ꞌindaye nginí Ji ini̱ma̱na, ngatꞌa̱ katsꞌenjé án kondra̱ tse̱.
5Bi̱ tsó kondra̱na nga chꞌo tsꞌén chji̱a̱taꞌinna:
¡Kjiꞌání nga ko̱yà, kó nga si̱ꞌankjie jaꞌeén!
6Kó tsi tjín xí ndibakátsijenna, éndísó chji̱a̱,
kó ta̱soboá én xí ndajín boá xi foaꞌátikó ini̱ma̱a̱,
kó ngije fí nginí, tsꞌéntsójó kui eén.
7Ngayeje xi chꞌoo̱ an, ꞌbitíkó xkjín, kó an chji̱a̱taꞌinna,
ndajín tsꞌénkjó, nga bi̱ tsó kondra̱ tsa̱ꞌa̱n:
8¡Nii̱ xindajín boá xi katsꞌénꞌoón!
Jè kjiꞌijñaꞌon, kó nginijánjín kjo̱stjíe̱n ngase.
9Ngaskande nda̱ xi nda ngase yaꞌa an,
kui xi ꞌniú kamáꞌniátakón an,
ko̱jo kui xi nijan iskjíni̱e̱jo an nichinie,
je kondra̱ tsa̱ꞌa̱n an je tikón.
10Ta̱nga Ji Ne, ngatama ni̱ma̱a̱ an,
ti̱ꞌin Ji nga kjo̱stjíe̱n ngiñá an, kó án tsjachjíi̱ nga tsjàa̱ ni xi tsoboaá.
11Bi̱ tsꞌén skuiéni an nga tjoó an,
kjiꞌanga jmí tsi kondra̱na xi sa̱ꞌínna.
12Kó kjo̱a̱a̱ an ki, Jí boá xi ngatsjéni̱xtjin nga tibosíke̱jení,
kó ngatsjéni̱xtjin nga ki̱a̱ kꞌuijñíní nínga tindyin Ji.
13¡Ngatamachikonñé Nee̱ xota̱ Israee̱l,
ndeskande ngasꞌe̱, ko̱jo ta̱kjiꞌání!
¡Bo̱a̱ kjiꞌi, bo̱a̱ kjiꞌi!
Currently Selected:
Xo̱jo̱n Salmoo̱ 41: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
