Xo̱jo̱n Salmoo̱ 40
40
Néná boá xi ꞌbijñándéna
Só xi katsꞌénda Ndabii̱.
1Askoyá sakon sakòo̱n Néná,
kó asiénnijonna nga tsintꞌié nga ni̱ma̱ kixiáa̱n nga tsíchji̱a̱a̱.
2Kó tsꞌaxiéna nga tsꞌénkayà an ki̱a̱ ti̱xa̱ nínga nda̱ máná,
ki̱a̱ ngi̱jin ndásee̱ chi̱ndyiaa̱.
Kuí boá xi ngo ndi̱jo̱je asiénsón ndsa̱ko án,
kó ꞌniú nda katsꞌénkjítsoꞌbána.
3Kósꞌe̱ ngo só tja̱tsi̱e̱ íjñá ngi̱ya ndso̱ꞌba án,
ngo só xi nda nga niꞌántsjaà Néná.
Achichí má xota̱ xi sku̱i̱e̱ kui nii̱, kó stsa̱kjon,
kó kamáꞌniátakón Néná.
4¡Achichíra̱ tsjaa̱ kui nda̱ xi Néná kjimaꞌniátakón!
Kui xi ki̱a̱jín kotsijee̱n xota̱ xi nkꞌakoo̱n,
ko̱jo ki̱a̱jín kotsijee̱n xota̱ xi ki̱a̱ fítji̱ngi kjo̱a̱ndisoo̱.
5¡Ji Ne xi tsa̱ꞌa̱n, jè kiniꞌín kjín ngase Ji ni xi fíndikónná xi kiniꞌín Ji!
Ko̱jo ni xi kiniꞌín Ji nganda tsa̱ji̱n nga!
¡Jmíjín xi kjo̱chótji̱ngii̱ xikó kón Ji!
Tsi xiyà an ngayeje kui nii̱, nde jmíjín xi ka̱maxki̱i̱.
6Tsjájín maá Jí kjo̱a̱tjoó ko̱jo ni xi niꞌánkꞌasꞌiee̱n.
Jè kachjéxꞌé Jí tji̱bo̱a̱nijón án,
kichjiéꞌéjín Ji nga cho̱ kꞌuítií,
ko̱jo tsi chji̱e̱ xi niꞌánkꞌasꞌien kjo̱a̱a̱ jeé.
7Kuíni nga bi̱ kixian an: Kꞌi̱e̱ tikón an kꞌi̱e̱e̱.
Jè kjitꞌa ki̱a̱ chꞌo̱ xo̱jo̱o̱n nínga bi̱ tsó kjo̱a̱a̱ an:
8Ji Ne tsa̱ꞌa̱n, nga tsꞌenkjatjosón an ni xi mejeén Jí,
kuí nii̱ xi tsie ngase kjo̱a̱tsja tsjána,
kó kjo̱a̱kitìi̱ ngi̱jin ini̱ma̱na tikónjin.
9Jè kixiya an éntja̱tsi̱e̱ xi chji̱a̱ kjo̱a̱a̱ kjo̱a̱kixi̱i̱,
ngindyi̱ko̱n xota̱ kjín xi kamátikoó.
Jè ye Ji Ne, nga yikjojín an ndso̱ꞌba án.
10Ti̱nde iꞌmajín an kjo̱a̱kixi̱i̱ ngi̱jii̱n ini̱ma̱na,
jè kixiya an kjo̱a̱ꞌniátakóo̱n, ko̱jo kjo̱a̱ꞌnaxiéꞌáa̱,
kó ngindyi̱ko̱n xota̱ kjiín tsꞌénꞌbijñáꞌmájín kjo̱a̱ni̱ma̱takóo̱n ko̱jo kjo̱a̱kixìi̱.
11Kó Ji Ne, te̱ꞌéní kjo̱a̱ni̱ma̱takóo̱n,
ko̱jo kjo̱a̱ndàa̱, ko̱jo kjo̱a̱ꞌniátakóo̱n ngatsjéni̱xtjin.
12Ngatꞌa̱ achichí má ni xi ndajín xi je jaꞌatjiyajonna,
jè katsꞌénna kui ni xi ndajiín,
kó nde ngiti̱ májín kjininkꞌá an ndyikón án,
kjín ngase ma kui nii̱ ta̱bo̱a̱jiín xikó kjiꞌi ma tsja̱ tokó án,
kó ini̱ma̱na je ngiti̱ chikjo̱a̱jiín.
13¡Ji Ne, ngo kjo̱a̱nda míꞌaá, ꞌna̱xiéjinní kuí nii̱!
¡Ji Ne, ngo kjo̱a̱nda míꞌaá, tsá ndibékasíke̱jechiíní!
14¡Ti̱ꞌintsobéjìi̱n ko̱jo te̱ꞌée̱ kjo̱a̱soboá
ngayeje xota̱ xi mejeén sa̱ꞌínkꞌiénna!
¡Ti̱ꞌin ji nga ko̱nga nga xcha̱ja
ngayeje xota̱ xi mejeén nga ndajín ka̱mana!
15¡Ta̱bi̱ta̱ ngatamaa̱ kjo̱a̱a̱ kjo̱a̱soboaá,
kui xota̱ xi ndyi̱mojnókiena nga éa éa ndyi̱tsó!
16¡Tsjangatamaa̱, kó tsjangatꞌieé ngatꞌaa̱ Ji ngayeje xi Ji ndyi̱mongasee̱!
Ngatsjéni̱xtjin nga bi̱ nga tsó xota̱ xi tsja maa̱ kjo̱a̱ꞌnaxiéꞌáa̱:
¡Achichí kjo̱a̱je tjiín Néná!
17Kó an ki, ndatsi ndasen tikón an,
ko̱jo ndatsi ni chjiénna,
Néná boá xi kjo̱a̱ꞌátsjiee̱n an.
Ji Ne, Jí boá xi bosíke̱jení, Jí boá xi ꞌnaxiéꞌéní,
¡Ji Ne xi tsa̱ꞌa̱n, ngata̱ niꞌínkꞌandíyejín Ji, ngo kjo̱a̱nda!
Currently Selected:
Xo̱jo̱n Salmoo̱ 40: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
