Xo̱jo̱n Salmoo̱ 42
42
Néná boá xi kjimaꞌniátakón an
Én xí bokoyáná ngo ni, xi katsꞌénda xota̱ ngo ndiꞌaa̱ Koree̱.
1Xikó má maá nga ma xíndaá ngo ndi̱kꞌijñá,
nga ma mejeén ndáfoaa̱ xo̱ngàndántꞌieé,
bo̱a̱ má tsꞌén mongasee̱ ini̱ma̱na Ji Ne.
2Ini̱ma̱na xíndaá nga mejeén sku̱i̱e̱ Néná,
kui Néná xí tikoón.
Kjiꞌání nga kjuín án na̱ngo̱xi̱i̱, kó kjóchó an ngindyikin ji.
3Ndándyíkón án boá xi kamá ni chiniena, ko̱jo ni xi katsꞌe an nga ni̱xtjin ni̱xtji̱e̱n,
tji̱e̱nga nga ngo ni̱xtjii̱n nga bi̱ kiꞌmína:
¡Ñá tikón Nèe̱ ngotꞌe̱ ꞌne̱!
4Kjiꞌanga foaꞌátsjienna kui nii̱, achichí ni xi maa̱ ngi̱jin ini̱ma̱na,
kó foaꞌátsjienna kjiꞌanga nijan kijíjo̱ an xota̱ kjiín ki̱a̱ Ndiꞌaa̱ Néná,
kó askjandáyátsjá má xota̱ na̱xi̱ńdaá nga katsjaá ndokꞌóchjì, nga kamá sꞌué ndikoón.
5Míkjo̱a̱a̱ nga ngiti̱ kjimaꞌniútakínjín ji ndí ini̱ma̱.
Míkjo̱a̱a̱ nga nda̱ kjimaa̱ ngi̱jin yojona.
Chiyéràa̱ Néná, ngatꞌa̱ to̱kó sa̱ꞌintsjáñáa̱.
¡Néná boá xí ꞌboxiéꞌána, kó kuí boá xi Ne xi tsa̱ꞌa̱n!
6Achichí ni xi nda̱ kjimaa̱ ini̱ma̱na ngi̱jin yojona,
kuíni nga jaꞌátsjienna ji ndeskande tꞌanangii̱ ndejèꞌ Jorndaa̱n,
ko̱jo ndeskande na̱xi̱ Ermoo̱n, ko̱jo na̱xi̱ Misaa̱r.
7Ngo nínga nkꞌa, chji̱a̱a̱ kje̱ꞌe nínga nkꞌa
ngandaꞌyaá xikótsꞌèn fonie ngo ndejèꞌ sijén xi ꞌniú ꞌbóka ndáfoaa̱.
Ngaꞌniuú ndáfoàa̱ an jaꞌaniéna.
8Nga ni̱xtjii̱n Néná tsangiya kjo̱a̱ni̱ma̱takoón,
kó nga jñoó kuintꞌièe̱ soó.
Bi̱ tsꞌén chjiáa̱ Néná xí tsi̱ꞌe̱ kjo̱a̱mindyionna:
9Bi̱ xiáa̱n kui: Ji xi ndi̱jo̱ jena.
Míkjo̱a̱a̱ nga je kiniꞌínchíyéní.
Míkjo̱a̱a̱ nga tikón xa̱ꞌya̱ an, ta̱ngatꞌanii̱ nga kondra̱na ndajín tjítsꞌénjo̱na.
10Kondra̱na tsꞌénkjánjo̱na xikó maá xi kjítꞌó ńdaná,
kó ndyiojón ndyiojón bi̱ ndyi̱tsóna:
¡Ñá tikón Nèe̱ ngotꞌe̱ ꞌne̱!
11Míkjo̱a̱a̱ nga ngiti̱ kjimaꞌniútakínjín ji ndí ini̱ma̱.
Míkjo̱a̱a̱ nga achichí ni xi kjimaa̱ ngi̱jin yojona.
Chiyéràa̱ Néná, ngatꞌa̱ to̱kó sa̱ꞌintsjáñáa̱.
¡Néná boá xí ꞌboxiéꞌána, kó kuí boá xi Ne xi tsa̱ꞌa̱n!
Currently Selected:
Xo̱jo̱n Salmoo̱ 42: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
