Xo̱jo̱n Salmoo̱ 37
37
Nga tsꞌén xota̱ xi ndaa̱, kó ngachaja xota̱ xi ndajiín
Só xi katsꞌénda Ndabii̱.
1Ngata̱ niꞌínxchínjín ji ta̱ngatꞌanii̱ xota̱ xi ndajiín,
ti̱nde ngata̱ maꞌónjíntakín kjo̱a̱a̱ xota̱ xi ni xi ꞌniú ndajiín ndyi̱tsꞌèn,
2ngatꞌa̱ bo̱a̱ si̱ꞌanjo̱ xikoó kꞌijñaá, nga tsá ku̱i̱chá,
ko̱jo bo̱a̱ ka̱maa̱ xikoó kꞌijñá xí sa̱si̱e̱e̱ nga tsá xí.
3Néná ti̱ꞌinꞌnítakín ji, ko̱jo ni xi nda ti̱ꞌin ji,
ti̱ndyin ji kui tꞌanangii̱, kó ni xi ja̱koxi̱i̱ ti̱ꞌinꞌnítakín ji.
4Tsjangatamaa̱ ngatꞌaa̱ Néná,
kó Kuí boá xi tsja̱á ni xi mejeén ini̱màa̱.
5Ngi̱ya tsja Néná tꞌíjñí ji ndyi̱yà nínga tsꞌentje̱ ji,
ti̱ꞌinꞌnítakín Kui, kó Kuí boá xi sa̱ꞌín ngayeje nii̱.
6Ku̱i̱ꞌíjñá tsijen kjo̱a̱kixi̱i̱, xikó maá nínga tsijee̱n,
kó kjo̱a̱ndàa̱ ku̱i̱ꞌíjñá tsijen xikó maá nga ma masien ndisꞌueé.
7Ngata̱ ndokjo̱e̱jín ji ngindyi̱ko̱n Néná,
kó chiyé sakon sakòo̱n nga ko̱síko̱joo̱,
ngata̱ niꞌínxchínjín ji ta̱ngatꞌanii̱ xota̱ xi tjoninkꞌaa̱ yojoo̱,
ko̱jo kjo̱a̱a̱ xota̱ xi ni xi ndajín ꞌbíndaa̱.
8Tꞌíjñímasin ji kjo̱a̱xtindaa̱, kó kjin tjajmi ji kjo̱a̱tamaá,
ngata̱ niꞌínxtíjíi̱n yojòo̱ nga ni xi ꞌniú ndajín xi si̱ꞌin ji.
9Ngatꞌa̱ xota̱ xi ndajiín si̱ꞌankjie,
ta̱nga xota̱ xi Néná ndyi̱koyaa̱, kuí boá xi sa̱ko̱ó tꞌanangii̱.
10Jè ta̱ chiboa tsí ni̱xtjin chajaa̱ nga ngiti̱ kꞌuiéjín ngase xota̱ xi ndajín,
ji stsitsíjin cha̱n cha̱a̱n ngi̱ndie nínga kisꞌińdo, ta̱nga jè ngiti̱ ki̱a̱jín kꞌuíndo.
11Ta̱nga xota̱ xi ntꞌiéꞌeén, sa̱ko̱ó tꞌanangii̱,
xi achichí tsjá ka̱maa̱ kjo̱a̱a̱ kjo̱a̱xió tsie xi kꞌuieé.
12Xota̱ xi ndajiín tsꞌénkjó ni xi ndajín xi mejeén sa̱ꞌínjo̱ xota̱ xi kixi̱i̱,
kó ngaskande kjinieya má ṉꞌni̱u̱ kondraa̱ xota̱ xi kixi̱i̱,
13ta̱nga Néná ta̱ mojnókie tsí kui xotaa̱,
ngatꞌa̱ jè be nga je makjachó ni̱xtjii̱n.
14Xota̱ xi ꞌniú ndajiín ꞌboxié ki̱cha̱ndojoó,
kó ꞌbíndonda yáchjonyaá ko̱jo yáyojoó,
tsi̱ꞌe̱ nga kꞌo̱jmingí xota̱ ni̱ma̱a̱, ko̱jo xota̱ xi ni chjieén,
ko̱jo tsi̱ꞌe̱ nga sa̱ꞌínkꞌién kui kixi̱ síndoo̱.
15Ta̱nga ti̱kuii ki̱cha̱ndojoó xi kjo̱a̱ꞌaxtikjaá ini̱ma̱a̱,
kó chjátꞌó yáchjonyaá.
16Nda ngase nda ni chií xi tjiín xota̱ xi kixi̱i̱,
ta̱bo̱a̱jiín ni tsie xi tjiín kjín xota̱ xi ꞌniú ndajín.
17Ngatꞌa̱ chjátꞌó tjiaa̱ xota̱ xi ꞌniú ndajiín,
ta̱nga Néná boá xi kjiꞌiꞌniuú xota̱ xi kixi̱i̱.
18Be Néná ni̱xtjii̱n xota̱ xi kixi̱i̱,
kó ni xi katsóyàtjoón Néná nga tsja̱á,
ngatsjéni̱xtjin nga kui tsi̱ꞌe̱ ka̱ma.
19Kjiꞌanga kji̱ndi̱bá ni̱xtjin xi ndajiín, jmí kjo̱a̱soboá kjo̱a̱ꞌajín,
kó kjiꞌanga kji̱ndi̱bá ni̱xtjii̱n kjindiaá, sa̱ko̱ó nichinie.
20Ta̱nga xota̱ xi ndajiín kju̱i̱e̱ boá,
kó xota̱ xi kondra̱a̱ Néná, kju̱i̱e̱, xikótsꞌèn fe xinieé cho̱tsa̱nga̱a̱,
kó xcha̱ja ngi̱jinꞌa̱sie̱èn xikó maá ṉdi̱i̱.
21Xota̱ xi ndajiín míyá, kó tsꞌénsónjín ni xi tsjiee̱n,
ta̱nga xota̱ xi kixi̱i̱, tjiín kjo̱a̱ni̱ma̱takón, kó tsie ni xi tsjá.
22Ngatꞌa̱ xota̱ xi Néná jè katsꞌénchikonñé, kuí boá xi sa̱ko̱ó tꞌanangii̱,
ta̱nga xota̱ xi Néná jè bo̱a̱ katsó nga ndajín ka̱maa̱, si̱ꞌankjie.
23Néná boá xi nda tsꞌénkjí nínga fí,
kui nda̱ xi Néná tsjá maá ndi̱yà nínga tsoꞌbá.
24Kó ndatsi kꞌo̱ka, ta̱nga kjo̱stjíe̱n nginí,
ngatꞌa̱ Néná boá xi kjiꞌiꞌniuú tsja.
25Jè jaꞌá nga kamáxo̱ngò án, kó jè xchá án ngotꞌe̱,
ta̱nga kji̱e̱ sa bejín an nga xota̱ xi kixi̱i̱, síndomasien,
ti̱nde kji̱e̱ sa bejín nga nichinie ndyi̱míꞌasón ndií.
26Ngatsjéni̱xtjin nga tjiín kjo̱a̱ni̱ma̱takón, kó tsꞌénkíyà ni,
kó ndií, kjo̱a̱niꞌánchikonñé maá kje̱ꞌe xota̱.
27Ti̱xínboeꞌée̱ ni xi ndajiín, kó ni xi ndaa̱ ti̱ꞌin ji,
kó ngatsjéni̱xtjin ki̱a̱ kꞌuieé ngi̱ndie nínga ku̱i̱ndyin ji.
28Achichí tsjá maá Néná ni xi kixi̱i̱,
kó jmíni̱xtjin nga ꞌbijñámasien xota̱ xi kui ꞌniátakón.
Ngatsjéni̱xtjin nga Kui skoón.
Ta̱nga xota̱ tji̱e̱e̱ xota̱ xi ndajiín, si̱ꞌankjie.
29Xota̱ xi kixi̱i̱ boá xi sa̱ko̱ó tꞌanangii̱,
kó ngatsjéni̱xtjin nga ki̱a̱ kꞌuíndo.
30Tsꞌoa xota̱ xi kixi̱i̱ kjo̱a̱kjíntakón boá ni xi chji̱a̱,
kó na̱je̱n kjo̱a̱kixi̱ boá xi chji̱a̱.
31Kjo̱a̱kitii̱ Nee̱ ki̱a̱ tikónjin ngi̱jin ini̱ma̱a̱,
kuíni nga jmíni̱xtjin mongajon se.
32Xota̱ xi ndajiín kotsijenꞌmaá xota̱ xi kixi̱i̱,
kó mején maá nga tsꞌenkꞌién,
33ta̱nga Néná tsja̱ndièjín nga ngi̱ya tsja xota̱ xi ndajiín kꞌo̱ka,
ti̱nde tsja̱ndièjín nga si̱ꞌanjeé ni̱xtjin nga ko̱ti̱je̱é.
34Chiyéràa̱ nga ko̱síko̱joo̱ Néná, kó tꞌenra ji ndi̱ya̱à kui,
ngatꞌa̱ Kuí boá xi nkꞌa ku̱i̱ꞌíjñaá kjiꞌanga tsja̱á kui tꞌanangii̱,
kó jí má xi xche̱ ji, kjiꞌanga si̱ꞌankjie xota̱ xi ndajiín.
35Án má xi je kamábe an nga xota̱ xi ndajiín nkꞌa ꞌboxié yojoo̱,
kó ma je xikó maá ngo yá xí tsingá tikón ki̱a̱ tꞌanangii̱.
36Ta̱nga kjiꞌanga ki̱a̱ bitja tꞌa nínga tikón,
jè ngiti̱ ki̱a̱jín tikón, tsangase an, ta̱nga ngiti̱ kasakojínna.
37Nda nda má ti̱ꞌinkjé jí ko̱jo tsitsíjìi̱n xota̱ xi kixi̱i̱,
ngatꞌa̱ achichí nda fetꞌani ni̱xtjii̱n kui nda̱ xi tjiín kjo̱a̱xioó,
38ta̱nga xota̱jeé, ta̱ ngo ndi̱yà si̱ꞌankjie ngayejee̱,
kó ni xi sa̱ko̱ó nga kju̱i̱e̱tꞌani, kuí boá nga kju̱i̱e̱ ndo̱jò ndójo̱.
39Néná boá xi tsjaá kjo̱a̱ꞌnaxiéꞌá xota̱ xi kixi̱i̱.
Néná boá xi tsja̱angaꞌniuú ni̱xtjin xi ndajiín.
40Néná boá xi bosikójo, ko̱jo xi tsꞌéndé,
tsꞌéndé ngi̱ya tsja xota̱ xi ndajiín, kó ꞌboxiéꞌá,
ngatꞌa̱ Néná boá xi askoo̱n, kó Kuí boá xi kamáꞌniátakón.
Currently Selected:
Xo̱jo̱n Salmoo̱ 37: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
