Xo̱jo̱n Salmoo̱ 38
38
¡Ndibékasíke̱jení!
Só xi katsꞌénda Ndabii̱, xi nda nga niꞌánkꞌasꞌien kjo̱a̱tjoó ni sije̱e̱n.
1Ji Ne, tsi tiniꞌínxchín Jí, ngata̱ niꞌínxchínje̱jínní,
kó tsi xtii̱, ngata̱ niꞌínjéjínní.
2Ngatꞌa̱ án boá xi kasatiena yáyojóo̱,
kó ti̱ án boá xi je kiniꞌínkjìnní ndse̱ Ji.
3Nde ngiti̱ chiíjiín nínga nda ngase yojona,
ta̱ngatꞌanii̱ nga achichí ꞌniú tiniꞌínxchín Jí,
jè ngiti̱ ndajín ńdana, ta̱ngatꞌanii̱ jé xí katsꞌen an.
4Ngatꞌa̱ ni xi ꞌniú ndajín xi katsꞌen an je kamáꞌniúnié an,
kó xikó maá tsi ngo chꞌià é kjimá xi ngiti̱ chikjo̱a̱jínna.
5Nínga onna je chꞌoje̱n, kó je tjitjoó ndátjítsi̱é, ta̱ngatꞌanii̱ kjo̱a̱tsobéna.
6Jè tjitíkoyá má yojona, jè ni̱ma̱kjo̱a̱ tikòn an,
nga ngo ni̱xtjii̱n nga ndasen tsoꞌbá an.
7Ngatꞌa̱ achichí je bojójón yojoyìtsꞌe̱n an,
kó nde ngiti̱ jmíjiín nínga nda ngase yojona.
8Jè kamáꞌinda an, kó achichí jè onna,
ni̱ma̱ tꞌíxián an, ta̱ngatꞌanii̱ ni xi kjimaa̱ ini̱ma̱na.
9¡Ji Ne, ngindyikin Ji je tikón ngayeje ni xi mejénna,
kó tjiꞌmájiín kjo̱a̱chaꞌána!
10Ini̱ma̱na ꞌniú tsꞌénkjínkꞌá, jè ngiti̱ jmí ngaꞌniújínna,
kó ndiꞌí ndyikón án je tjichájá.
11Amingo̱na ko̱jo xota̱ xi nda yaꞌana,
jè katsꞌénkjinna yojoo̱ ta̱ngatꞌanii̱ nínga onna,
ko̱jo xota̱ xingi̱ án, ti̱ je katsꞌénkjinna yojoo̱ nga.
12Xota̱ xi mejeén sa̱ꞌínkꞌiénna, chja̱ya̱ ndyi̱ꞌbijñána,
xota̱ xi mejeén nga ndajín ka̱mana, chꞌo tsó kondra̱na,
kó nga ngo ni̱xtjii̱n nga ndyi̱ꞌbínda ni xi ndiso.
13Ta̱nga an ntꞌiejáa̱n, xikoó tsi xtiya an,
ko̱jo kjíxꞌájín an ndso̱ꞌba án, xikoó tsi ni̱ma̱ an.
14Kjénní nga xikoó tsi ngo nda̱ xi ntꞌiéjín je kamá an,
ko̱jo ngo nda̱ xi jmíjiín ni xi ka̱tso̱.
15Ngatꞌa̱ Jí boá xi tsꞌénkoyaa̱ Ji Ne.
Ji Ne, Ji Ndi̱a̱ Jí boá xi ko̱ndókjo̱e̱jení.
16Kuíni nga bi̱ xian an: Ngata̱ tsjajín májnú kjo̱a̱a̱ an,
kó tsi ko̱ngajon an, ngata̱ ánjín mojnóchàjnúꞌun.
17Ngatꞌa̱ jè mejeén kꞌo̱ka an,
ngatꞌa̱ kui xi so xi ndakjaa̱n ngiti̱ xixiójín.
18Kuíni nga chjiéngá xiyaá ni xi ndajín xi katsꞌen an.
Kó ndasen kotíjña̱ an kjo̱a̱a̱ jé xí katsꞌen an.
19Kondra̱na to̱kó síndo boá, kó achichí ngaꞌniú tjiín,
kó achichí jè kamákjín xi chꞌoo̱ an kjo̱a̱a̱ ni xi kjimana.
20Ndajín ndyi̱ꞌbíchjína ni nda xi katsꞌée̱n,
kó kondra̱na kjima, ngatꞌa̱ ni xi ndaa̱ boá xi tsꞌénfítji̱ngi an.
21¡Ji Ndi̱a̱, ko̱jo Ji Ne xi tsa̱ꞌa̱n, ngata̱ ꞌbíjñímasínjínní,
kó ngata̱ kjinjín niꞌínní yojòo̱!
22¡Tsá tasíke̱jechiíní, Ji Ne, Jí boá xi kjo̱a̱ꞌnaxiéꞌána!
Currently Selected:
Xo̱jo̱n Salmoo̱ 38: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
