Xo̱jo̱n Salmoo̱ 36
36
Achichí ndaxota̱ Néná
Só xi katsꞌénda Ndabii̱, ngo nda̱ xi kixi̱ katsꞌénxátꞌaa̱ Néná.
1Ni xi ꞌniú ndajín xi tsꞌén xota̱ xi tsꞌénjeé,
tsꞌénkjó ngi̱jin ini̱ma̱a̱, nga chjiénjín nga stsa̱kjonní Néná.
2Tsꞌénkjiín kon nga jé xí katsꞌén, jmíjín xi sku̱i̱e̱,
ko̱jo nga jmíjín xi chꞌo ka̱maa̱ kui nii̱.
3Én xí chji̱a̱ tsꞌoa, ni xi ndajín ko̱jo kjo̱a̱ndiso boá,
jè ngiti̱ bo̱a̱jín tsꞌén xikoó ngo xota̱ xi nda tsꞌénkjó,
tsi̱ꞌe̱ nga ni xi ndaa̱ sa̱ꞌín.
4Ndeskande ndatsi to̱kó kjiꞌijña ngase,
nga ta̱soboá ni xi ndajiín boá xi tsꞌénkjó,
jmí tsi ndi̱yà xí ndaa̱ xi tsoꞌbá,
ngatꞌa̱ ma chꞌójiín ni xi ndajín xi tsꞌén.
5Ji Ne, kjo̱a̱ni̱ma̱takóo̱n ngaskande ndiꞌakꞌajmi jàn fochó,
kó kjo̱a̱ꞌniátakóo̱n ngaskande nínga tikón ṉdi̱i̱ fochó.
6Kjo̱a̱kixi̱ xi niꞌín Ji, bo̱a̱ má kón xikoó na̱xi̱i̱ Néná,
kó kjo̱a̱botíjée̱, bo̱a̱ má tsꞌén je xikoó nínga na̱nga̱a̱ ndáchíkoón.
Jí Ne, Jí boá xi tichìi̱n tsi̱ꞌe̱ nga síndo xota̱ nga̱sondiee̱ ko̱jo cho̱o̱.
7Ji Ne, ¡Achichí tsjákjiꞌi kjo̱a̱ni̱ma̱takóo̱n!
Kuíni nga xota̱ nga̱sondiee̱ ki̱a̱ ꞌbíndongí ngindie nkꞌieén nga̱a̱.
8Kui nichinie tsie xi tjín ndiꞌàa̱ boá xi nda sa̱ꞌíntsiee̱,
kó ki̱a̱ ko̱e̱ꞌée̱ ni xi kꞌuí, ki̱a̱ ndejèꞌ xi tjiín ndáfoa xi ndaꞌyoó.
9Ngatꞌa̱ Jí boá xi tikoón ndáńchꞌi̱ nínga tikón kjo̱a̱mindyioo̱n,
kó kjo̱a̱a̱ kui ndiꞌí xí tikoón nga ka̱maxcha̱nijne̱ ndiꞌií.
10Takèe̱ kjo̱a̱ni̱ma̱takóo̱n xota̱ xi bee Ji,
kó takèe̱ kjo̱a̱kixi̱i̱ xota̱ xi kixi̱ síndo ini̱ma̱a̱.
11Ngata̱ boeꞌéndièjín Ji nga xota̱ xi nkꞌakoo̱n tsja̱nié tsja̱fena.
Ti̱nde ngata̱ boeꞌéndièjín Ji nga xota̱ xi ndajiín ta̱ ni xi mejénrií sa̱ꞌínjo̱na.
12Kósꞌe̱ kjiꞌá boá nga ku̱i̱xo̱ xota̱ xi tsꞌén ni xi ꞌniú ndajiín,
ku̱i̱xo̱ tꞌanangi, kó ngiti̱ kjo̱stjíe̱njín ngase.
Currently Selected:
Xo̱jo̱n Salmoo̱ 36: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
