Xo̱jo̱n Salmoo̱ 35
35
Néná ntꞌié nga ndokjo̱a̱a̱
Só xi katsꞌénda Ndabii̱.
1¡Ji Ne, ndokjo̱e̱tije̱ Ji xi an ndyi̱chji̱a̱tijo̱na!
¡Ti̱xkénje̱ Ji xi an ndyi̱kjánjo̱na!
2¡Chjábé jí ni xi ꞌbíchjaá ni xi ndajiín,
ko̱jo ńjño ki̱cha̱ xi chajaá, ti̱sítji̱n ji, kó ndibékasíke̱jení!
3ꞌNaxié ji yáyojoó, kó tꞌíchjée̱ xota̱ ndyi̱mongatji̱ngina.
Tꞌíyetjée̱n ini̱ma̱na nga Jí boá ko̱ꞌna̱xiéꞌéní.
4Ti̱ꞌinkjeꞌe ji kjo̱a̱soboá ko̱jo ti̱ꞌintsobéjìi̱n xota̱ xi mejeén sa̱ꞌínkꞌiénna,
ti̱ꞌinkjí nginí ji nga̱xto̱n ko̱jo ti̱ꞌintsobéjìi̱n xota̱ xi mejeén nga ndajín ka̱mana.
5Bo̱a̱ ngatamaa̱ xikó maá xtjié xí fíjo̱ tjo̱o̱.
Kó ndítsjiee̱ Néná tsá ngatangatji̱ngii̱.
6Ngatamajñó ndi̱ya̱à, ko̱jo ńdó ngatama.
Kó ndítsjiee̱ Néná ngatangatji̱ngii̱.
7Ngatꞌa̱ nde jmí kjo̱a̱jiín nga chja̱ya̱ íjñána,
ko̱jo nde jmí kjo̱a̱jiín nga ngo ti̱xa̱ katsꞌéndaa̱ ini̱ma̱na.
8Ngatjandibánié ni xi ndajín ngindiee̱ nga sku̱i̱e̱.
Ngatꞌákayà ti̱kuii chja̱ya̱ xi kui íjñá,
kó ki̱a̱ ngatꞌákayà nga on ka̱maa̱.
9Achichí tsjá ka̱maa̱ ini̱ma̱na kjo̱a̱a̱ Néná,
achichí tsjá ka̱maa̱ kjo̱a̱a̱ kjo̱a̱ꞌnaxiéꞌaá.
10Ngayeje ńdana, bi̱ ka̱tso̱:
Ji Ne, jmíjín ingo Ne xi xikoó Jí.
Ji xi ꞌnaxiéꞌé Ji xota̱ xi indaa̱,
kjo̱a̱a̱ xota̱ xi ꞌniú ngasee̱,
ko̱jo ꞌnaxiéꞌé Ji xota̱ ni̱ma̱a̱ ko̱jo xi jmí nijiín,
kjo̱a̱a̱ xota̱ xi foaꞌáxiín ni xi tjiín.
11Fostjíe̱n chistiko̱ xi ndajiín xi ndyi̱ꞌbindísótaꞌinna,
kó ni xi nde bejín an bosíyána.
12Ndajín tsꞌén ndyi̱ꞌbíchjína kjo̱a̱a̱ ni nda xi katsꞌée̱n,
kó achichí ndasen kjimaa̱ ini̱ma̱na kjo̱a̱a̱ kui nii̱.
13Ta̱nga kjiꞌanga kamáꞌoón kui,
ngaskande ńjño tokjuie tsajá an,
kó katsꞌenkjaꞌa an kjindiá ini̱ma̱na nga ndasen kamána,
sꞌe̱ ni̱ma̱ kixian an nga tsíchji̱a̱a̱ Néná,
ngaskande nga jatjosón ni xi tsíꞌáa̱.
14Bo̱a̱ katsꞌenjo̱ an xikó niꞌánjo̱ ngo nda̱ xi nda yaꞌaná,
ko̱jo tsi xikó niꞌánjo̱ ngo ntsꞌié,
askjandátjé an xikó má tsꞌén ngo xi kjandátjé nga ꞌme na̱aa̱n,
ndasen ko̱jo ni̱ma̱kjo̱a̱ ijñá an yojona.
15Ta̱nga nga kamábe nga ndajín kamána,
achichí tsjá kamaá, kó nijan kamátikó ko̱jo kje̱ꞌe xota̱,
kui xi nde bejín an ꞌyá kuií bo̱a̱,
kó ta̱soboá án ndyi̱tsꞌènxtína.
16Xikó maá xota̱ xi ndajín, nga chꞌo tsꞌén ndyi̱mojnókiena,
kó ngaskande kjinieya má ṉꞌni̱u̱ nga chꞌo maa̱ an.
17Ji Ndi̱a̱, ngaskande kjiꞌání nga to̱kó stsitsíjìi̱n kui nii̱.
¡ꞌNa̱xiéꞌéní tsi̱ꞌe̱ nga sa̱ꞌínkjiéjínna,
ꞌna̱xiéꞌé Ji ini̱ma̱na kjo̱a̱a̱ kui xota̱ xi ja̱kon xandi̱je̱ má koón!
18An tsjaa ndokꞌóchjì ngindyi̱ko̱n ngayeje xota̱ na̱xi̱ńdáa̱ nga ka̱matikó,
an sa̱ꞌintsjaà ngi̱jii̱n kui xota̱ na̱xi̱ńdáa̱ xí achichí kjín maá.
19Ngata̱ mojnókiejínna kui xi nde jmí kjo̱a̱jiín nga kondra̱na kjimaa̱,
ti̱nde ngatꞌa̱ ꞌbíchjándsójín ndyi̱ko̱n kui xi nde jmí kjo̱a̱jiín nga an sa̱ꞌínchꞌóna.
20Jmí tsi kjo̱a̱a̱ kjo̱a̱xió xi chji̱a̱, ta̱sá éndísó tsꞌénda,
kondraa̱ xota̱ xi ntꞌiéꞌén xi síndo nga̱sondiee̱.
21Kjíxꞌá tiyá tiyá tsꞌoa nga bi̱ tsó kondra̱ tsa̱ꞌa̱n:
¡Ja, ja, ja, ndyikón má ji̱n xi ndyi̱be!
22¡Ji Ne! Ti̱ tiye Jí kui nii̱ nga, kuíni nga: ¡Ngata̱ xiójín mindyin Ji!
¡Ji Ndi̱a̱, ngata̱ niꞌínkjinjínní yojòo̱!
23¡Tindyie ndyikin Ji, kó ti̱ndyinde Ji nga ko̱ꞌna̱xiéꞌéní!
¡Ji Ne, Ji Ndi̱a̱, tꞌenjindaje̱ní kjo̱a̱a̱ ni xi kjimana!
24Ji Ne xi tsa̱ꞌa̱n, kjo̱a̱kixi̱i̱ ti̱ꞌinkjìn Jí nga tatíjéní.
Ngata̱ boeꞌéndièjíi̱n nga ko̱jno̱kiena kui.
25Ngata̱ bi̱jín ꞌmíjnú ngi̱jin ini̱ma̱jnú:
¡Jè jatjosón ni xi kamámejénná!
¡Jé kiniꞌánkjié ndo̱jò ndójo̱ò ꞌne̱!
26Ngatjaꞌa kjo̱a̱soboá, ko̱jo ngatama sibéjón yojoo̱
ngayeje xota̱ xi tsja maa̱ nga ndajín kjimana,
soboá ngatamaa̱ ko̱jo ngatama tsobéjii̱n
kui xi yiꞌi ngase maá yojoo̱, kó ta̱kjo̱a̱ maa̱ an.
27Nga sie só, ko̱jo tsjangatamaa̱ kui xi tsja maa̱, xikótsꞌèn kixi̱ tjíniꞌánjo̱na an.
Kó ngatsjéni̱xtjin nga bi̱ nga tsó:
¡Achichí kjo̱a̱je tjiín Néná,
ngatꞌa̱ mongase nga nda tsꞌén kꞌuijñá xota̱ xi mosoo̱!
28Kó najen án ku̱i̱chji̱a̱ kjo̱a̱a̱ kjo̱a̱kixi̱i̱,
kó nga ngo ni̱xtjii̱n nga Ji sa̱ꞌintsjaà.
Currently Selected:
Xo̱jo̱n Salmoo̱ 35: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
