Xo̱jo̱n Salmoo̱ 32
32
Kjo̱a̱niꞌánchikonñeé kjo̱a̱niꞌánjetakoón
Só xi katsꞌénda Ndabii̱.
1¡Achichíra̱ tsjaa̱ kui xi kiniꞌánjetakoón ni xi ndajín xi katsꞌén,
ko̱jo xi kiniꞌánjetakoón jeé!
2¡Achichíra̱ tsjaa̱ kui nda̱ xi Néná jmí jé tsꞌénkáꞌájín,
ko̱jo xi ngi̱jin ini̱ma̱a̱ jmí kjo̱a̱ndisojiín!
3Tji̱e̱nga kixiyajaán jéna,
inda inda je ngaꞌniuú ńdana,
ngatꞌa̱ nga ngo ni̱xtjii̱n nga askjandá an.
4Nga jñó nga ni̱xtji̱e̱n nga ꞌniú ngase kiniꞌínjéní,
ngaskande nga je ngaꞌniúna,
xikó maá ngo naxó xi xíꞌniú nga ma cho̱ndoboaá.
5Ta̱nga kixiyaa jéna, kó iꞌmájaán ni ndajín xi katsꞌen an.
Bi̱ kixian an: Xiyàa̱ Néná ni xi ndajín xi katsꞌen an.
Kó jí boá xi kiniꞌínjetakínní kuí ni xi ndajiín jé xí katsꞌen an.
6Kuíni nga Ji ku̱i̱chji̱a̱a̱ ngayeje xota̱ xi tsjiee̱,
ni̱xtjin nga to̱kó ka̱ma sa̱kó ngasee̱ Ji,
ngatꞌa̱ ja̱koxi̱ boá nga kjiꞌanga ko̱e̱je̱nkꞌa ndáfoaa̱,
kjo̱chótꞌajiín kui xotaa̱.
7Jí boá xi ngi̱ndie nínga botíjña̱ꞌma an,
Jí boá xi xchínní kjiꞌanga nda̱ ka̱mana,
Jí boá xi kꞌuínde Ji nga ngo foaꞌatjiyajonna
xota̱ xi si̱é só xi nda nga je kamá ndé.
8Jí boá xi bi̱ kasení:
Án boá xi xiyaá, ko̱jo xi kokoyaá ndi̱yà xí chjiéngá ku̱i̱ńtje̱ ji.
Án boá xi tsjaa kjo̱a̱botíxoma, kó ngatsjéni̱xtjin nga skoon ji.
9Ngata̱ bo̱a̱jín kón niꞌín ji yojòo̱ xikoó ndi̱je̱e̱,
ko̱jo tsi xikoó ndi̱je̱tajaá, nga jmíjiín kjo̱a̱kjíntakón,
kó chjiéngá ńꞌniú si̱ꞌankjieén ko̱jo ki̱cha̱ kjoaꞌá tsꞌoa,
tsi̱ꞌe̱ nga ka̱ma kongínjoo̱ nínga tindyin ji.
10Xota̱ xi ꞌniú ndajiín achichí kjo̱a̱ni̱ma̱ kjo̱a̱ꞌatio,
ta̱nga xota̱ xi kjimaꞌniátakón Néná,
kjo̱a̱ni̱ma̱takoón boá xi kjifoaꞌatjiyajoo̱n.
11¡Tsjangatamajnú jún xota̱ xi kixi̱, ti̱ꞌantsjàjnúu̱ Néná!
¡Tsjangatꞌiéjnú nga ko̱ndàjnúu̱ Néná, jún xota̱ xi kixi̱ síndo ini̱ma̱a̱!
Currently Selected:
Xo̱jo̱n Salmoo̱ 32: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
