Xo̱jo̱n Salmoo̱ 31
31
Jí boá xi tichínní
Só xi katsꞌénda Ndabii̱.
1Ji Ne, Jí boá mongasee̱ tsi̱ꞌe̱ nga xchínní,
nga jmíni̱xtjin niꞌínkjeꞌéní ngo kjo̱a̱soboá.
ꞌNa̱xiéꞌéní, ngi̱yaa̱ kjo̱a̱kixi̱i̱.
2Tasínijìnní, kó tsá ꞌna̱xiéꞌéní.
¡Jí boá xí ngatama Ji xikoó ngo ndi̱jo̱je,
ko̱jo xikoó ngo xó nkꞌa xi kꞌo̱xiéꞌána!
3Ngatꞌa̱ jí boá xi ndi̱jo̱jena, ko̱jo xi tsjangaꞌniúna.
Ta̱ngatꞌanii̱ Jaꞌée̱n nga ko̱kéní ndi̱yà,
kó kꞌuiyéní nínga kjuín án.
4¡ꞌNa̱xiéní ki̱a̱ ngi̱ya chja̱ya̱ nínga je tsꞌénkayà an,
ngatꞌa̱ Jí boá xi tichínní!
5Ngi̱ya ndse̱ Ji ꞌbijñá an ini̱ma̱na.
Ji Ne, Jí boá ngo Ne xi ja̱koxi̱ Ji,
Jí boá xi kaꞌnaxiéꞌéní.
6Chꞌóna xota̱ xi ne xi jmí ni chjíjiín kjimaꞌniátakón,
ta̱nga an ki, Néná boá xi tsꞌénkoyàa̱.
7Achichí tsjá ka̱mana kjo̱a̱a̱ kjo̱a̱ni̱ma̱takóo̱n,
ngatꞌa̱ kamáyè Ji kjo̱a̱ndasen xi jaꞌatio an,
kó jè kichꞌé Ji xki̱ kjiꞌanga nda̱ kjimaa̱ ini̱ma̱na.
8Ki̱a̱jín kiniꞌínkꞌasꞌínní ngi̱ya tsja kondra̱na,
ta̱sá ngo ngi̱ndie xi tiyá ikꞌíjñí ji ndsa̱ko án.
9Ji Ne, ngatamani̱ma̱a̱ an, ngatꞌa̱ achichí nda̱ kjimana,
kjo̱a̱ndasee̱n tjítsꞌénkjié ndyikón án,
ko̱jo ini̱ma̱na, ko̱jo ngayeje ngi̱yaa̱ yojona.
10Ngayeje ni̱xtjin nga tikòn an, nga kjo̱a̱ndasen tsꞌénfoaꞌatio an,
ngayeje ni̱xtjin nga tikòn an nga tsꞌénkjandá án,
ta̱ngatꞌanii̱ ni xi ndajín xi katsꞌen an nga je ngiti̱ jmí ngaꞌniújínna,
kó ńdana je kjife ngaꞌniuú nga.
11Ta̱ngatꞌanii̱ ngayeje kondra̱na nga tjímojnóchána,
kó xota̱ tꞌa ndiꞌana ko̱jo xota̱ xi bena tsakjón mána,
nga bena ngi̱ya ndi̱yàtié mongaboaꞌána.
12Jè kiniꞌánchíyána xikoó ngo xota̱ xi je kꞌien,
xi ngiti̱ jmíjín xi foaꞌátsjien ngasee̱.
Jè xikó maá tsi ngo boso̱ xi je kamáxi̱ je kamá an.
13Ntꞌièe̱ nga achichí má xota̱ xi chꞌo tsꞌén ndyi̱chji̱a̱taꞌinna,
kó ni xi ndajín kjimana ta̱jñà ngi̱ndiení.
Ngayejee̱ nga ndyi̱ꞌbíkjo yojoo̱ kondra̱ tsa̱ꞌa̱n,
kó ndyi̱ꞌbínda nga mejeén sa̱ꞌínkꞌiénna.
14Ta̱nga Jí Ne, jí boá xi kjimaꞌniátakoón.
Jè bi̱ kixian an: Jí boá xi Néna ma Ji.
15Ngi̱ya ndse̱ boá nínga tikón ni̱xtjinna,
ꞌna̱xiéꞌéní ngi̱ya tsja kondra̱na ko̱jo xota̱ xi ndyi̱mongatji̱ngina.
16Take ꞌna̱ ꞌna̱ kje̱n Ji kui mosòo̱ xi̱ꞌbi̱.
¡ꞌNa̱xiéꞌéní ta̱ngatꞌanii̱ kjo̱a̱ni̱ma̱takóo̱n!
17Ji Ne, ngata̱ jmí kjo̱a̱soboá niꞌínkjeꞌejínní,
ngatꞌa̱ Jí boá xi tsíchji̱a̱a̱.
¡Ngatjaꞌa kjo̱a̱soboá xota̱ xi ndajiín,
kó ki̱a̱ tjajmiyé Ji ti̱xa̱nga̱tsjo̱ó!
18Takje Ji tsꞌoa xota̱ xi ndisoo̱,
kui xi achichí ndikón tsꞌén ndyi̱chji̱a̱ kondraa̱ xota̱ xi kixi̱i̱,
nga ndyi̱tsꞌènkjién kjo̱a̱nkꞌakoo̱n ko̱jo kjo̱a̱niꞌánchꞌoó.
19¡Achichí je kjo̱a̱ndaxota̱ xi tichjeꞌétjé Ji kjo̱a̱a̱ xota̱ xi tsakjoón Jí,
ko̱jo xi tiꞌbíjñinde Ji, kjo̱a̱a̱ xota̱ xi Ji kjimaꞌniátakoón,
ngindyi̱ko̱n ngayeje xota̱ nga̱sondiee̱!
20Ki̱a̱ nínga tindyin Ji, ki̱a̱ kꞌuijñíꞌmí Ji,
tsi̱ꞌe̱ nga jmí ni sa̱ꞌínjiín ni xi ndajín xi ꞌbínda xota̱ nga̱sondiee̱,
ngo ngi̱ndie chje̱ꞌétjé Ji, tsi̱ꞌe̱ nga jmí ni sa̱ꞌínjiín ni ta̱xkiya xi chji̱a̱ na̱je̱n xotaa̱.
21¡Ngatamachikonñé Néná, ngatꞌa̱ je akóna kjo̱a̱tsjakjiꞌii̱ kjo̱a̱ni̱ma̱takón,
xikó maá ngo na̱xi̱ńdáꞌniú xi ꞌniú tikón!
22Achichí nda̱ kamána, nga ngaskande bi̱ tsꞌén katsꞌenkjó án:
¡Jè ngiti̱ mejénjiín nga ki̱a̱ kjuínkasién ngase an ngindyikin Ji!
Ta̱nga kandaꞌyé Ji nda̱na nga ni̱ma̱ kixian an kjiꞌanga tsíchji̱a̱a̱.
23Ti̱ꞌantjójnú Néná, ngayeje jún xi xota̱ xi tsjiee̱,
Néná kónrií xota̱ xi kjimaꞌniátakón Kuí,
ta̱nga xota̱ xi nkꞌakoo̱n, tsjáchjírií nga tsjaá ni xi tsoboaá.
24¡Ti̱ꞌangaꞌniújnú ngayeje jún xi ndyi̱chiyájnúu̱ Néná,
kó te̱ꞌéngaꞌniújnúu̱ ini̱ma̱jnú!
Currently Selected:
Xo̱jo̱n Salmoo̱ 31: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
