Xo̱jo̱n Salmoo̱ 33
33
Nganiꞌántsjaá Néná xí katsꞌénda nga̱sondiee̱
1¡Jún xota̱ xi kixi̱, tsjangatamajnú kjo̱a̱a̱ Néná!
Kjiꞌanga sie xota̱ xi kixi̱i̱, ndatsꞌèn ndaꞌyaá nga tsꞌentsjaà Néná.
2Te̱ꞌéjnúu̱ ndokꞌóchji̱ì Néná nga si̱ꞌankjaniéjnúu̱ soó arpa̱.
Ndàjnúu̱ nga si̱ꞌankjaniéjnú salterioo̱ ko̱jo arpa̱ xi tie naxá tjiín.
3Ndàjnúu̱ só tja̱tsi̱e̱ xi kji̱e̱ jmíni̱xtjin ndaꞌyà.
¡Nda ti̱ꞌánjnú kui nii̱, kó tsjangatamajnú nga si̱ꞌankjaniéjnú kui soó!
4Ngatꞌa̱ kixi̱ boá eén Néná,
kó ngayeje ni xi katsꞌénda bokó nga maꞌniátakón Kuí.
5Néná achichí tjoó kjo̱a̱kixi̱i̱, ko̱jo ni xi kixi̱i̱,
kjo̱a̱ni̱ma̱takoón Néná tjikítsie má tꞌanangii̱.
6Ta̱ngatꞌanii̱ én xí tsíchji̱a̱ Néná nga kamándani ndiꞌakꞌajmii̱,
ta̱ngatꞌanii̱ nda̱ xi jatjoo̱ tsꞌoa nga kamánda ngayeje ńñoo.
7Néná boá xi ngo ndiè ꞌbitíkó ndáfoaa̱ ngayeje ndáchíkoón,
kó ngo ni mindyiá ndáfoa xi tjín nínga ꞌniú na̱nga̱a̱.
8¡Ngayeje xota̱ xi tjín tꞌanangii̱, ngatamabendikón Néná!
¡Ngayeje xota̱ xi tjín nga̱sondiee̱, ngatjatsié má ngindyi̱ko̱n Kui!
9Ngatꞌa̱ kjiꞌanga Kui xi tsíchji̱a̱, kamánda nii̱,
katsjá ngo kjo̱a̱ Kui, kó jatjosón kui nii̱.
10Néná tsꞌenkjié ni xi botixómá na̱xi̱ńdaá,
kó ꞌbíchjaá ni ndajín xi je tjíndaa̱ nga sa̱ꞌín xota̱ na̱xi̱ńdaá.
11Ta̱nga ni xi botixómá Néná ngatsjéni̱xtjin nga tikón,
kó kjo̱a̱niꞌánkjoó tikón ta̱kjiꞌání.
12¡Achichíra̱ tsjaa̱ na̱xi̱ńdá xí Néná boá xi Nee̱!
Kui xota̱ na̱xi̱ńdá xí Néná jaꞌájin tsi̱ꞌe̱ nga Kui ku̱i̱chji̱a̱ni.
13Néná tsꞌénkotsijenni ndeskande ki̱a̱ ndiꞌakꞌajmii̱,
kó tsꞌénꞌbíndikón ngayeje xota̱ nga̱sondiee̱,
14ndeskande ngi̱ndie nínga tikón Kuí,
tsꞌénkotsijee̱n ngayeje xotaa̱ kui nga̱sondiee̱.
15Kui xi katsꞌénda ini̱ma̱a̱ ngayeje kui xotaa̱,
tjítsꞌénkjó kjo̱a̱a̱ ngayeje ni xi ndyi̱tsꞌèn.
16Jmíjín ngo re xi fotjoꞌa, tsi kjo̱a̱a̱ nga kjín jájún tjiín,
ti̱nde jmíjín ngo nda̱ chꞌokon xi fotjoꞌaa̱ yojoo̱, tsi kjo̱a̱a̱ nga ta̱nisién tjiín ngaꞌniú.
17Nde jmí ni chjíjiín ndi̱je̱e̱ tsi̱ꞌe̱ nga sa̱ꞌín ngo kjo̱a̱xchán,
ngatꞌa̱ ndatsi tjiín ngaꞌniú, májiín ꞌboxiéꞌá ngo xota̱.
18Ta̱nga Néná ngatsjéni̱xtjin nga tsꞌénkoón xota̱ xi bendikón Kuí,
ko̱jo xi ndyi̱koyaa̱ kjo̱a̱ni̱ma̱takoón.
19Tsi̱ꞌe̱ nga kꞌo̱xiéꞌáni ini̱ma̱a̱ ngi̱ya tsja kjo̱a̱bo̱yaa̱,
kó sa̱ꞌínkꞌíndora nga kjo̱chó ni̱xtjii̱n kjindiaá.
20Ini̱ma̱jne̱ boá xi ndyi̱chiyánijne̱ Néná,
Kuí boá xi konjne̱, kó Kuí boá xi ꞌbíchjaá ni xi ndajiín.
21Kuíni nga ta̱ngatꞌanii̱ Néná nga achichí tsjá ka̱maa̱ ini̱ma̱jne̱,
ngatꞌa̱ Jaꞌén tsjiee̱ boá xi kjimaꞌniátakónjne̱.
22Ji Ne, ngatꞌiéjne̱ kjo̱a̱ni̱ma̱takóo̱n
ngatꞌa̱ kuí boá kui nii̱ xi ndyi̱chiyájne̱.
Currently Selected:
Xo̱jo̱n Salmoo̱ 33: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
