Xo̱jo̱n Salmoo̱ 30
30
Kjo̱a̱tsja kiniꞌín ji kjo̱a̱ndasenna
Só xi katsꞌénda Ndabii̱ kjiꞌanga kiniꞌánkꞌasꞌien na̱ngo̱xi̱i̱.
1Tsjaa kjo̱a̱je Ji Ne, ngatꞌa̱ Jí boá xi kiniꞌínkjastji̱nní,
kó tiboeꞌéndièjín Ji nga ndyi̱mojnókiena kondra̱na.
2¡Ji Ne xi tsa̱ꞌa̱n!
Jí boá xi ni̱ma̱ kixiaan nga tsíchji̱a̱joo, kó kiniꞌíndayéní.
3¡Ji Ne, Jí boá xi kaꞌnaxié Ji ini̱ma̱na ki̱a̱ kjo̱a̱bo̱yaa̱,
kó kjiꞌanga je kjo̱tjajen an nga̱tsjo̱ó katsaki, kiniꞌínkꞌijñí nginíní.
4Jún xi xota̱ tsjiee̱ Néná, ndàjnúu̱ salmo̱ Néná,
kó te̱ꞌéjnúu̱ ndokꞌóchji̱ì kjo̱a̱a̱ kjo̱a̱tsjie xi tjiín.
5Ngatꞌa̱ ta̱ ngotjón tsí bo̱a̱ nga tsꞌénxchán,
ta̱nga ngatsjéni̱xtjin nga ndaxota̱ ma.
Xchaꞌára̱ nga ni̱xtji̱e̱e̱n,
ta̱nga nga kamángindyiojoón jè tsjá kꞌuiéna.
6Kjiꞌanga nda kisꞌijña an, bi̱ tsꞌén katsꞌenkjó án:
Jmíni̱xtjin nga tjín xí sa̱ꞌíntíyána.
7Ngatꞌa̱ ta̱ngatꞌanii̱ kjo̱a̱ndàa̱ Ji Ne,
nga ꞌniú ikꞌíjñíní xikoó ngo na̱xi̱ xi ꞌniú tikón.
Kjiꞌanga ikꞌíjñiꞌmíní kje̱n Ji, achichí nda̱ kamána.
8Kósꞌe̱ Ji tsíchji̱a̱a̱, Ji Ne.
Kó Néná achichí ni̱ma̱ tsíchji̱a̱a̱, nga bi̱ kixiaan:
9Mí ni xi nda ka̱ma tsi ko̱yà án,
kjiꞌanga si̱ꞌankjatjajenna ki̱a̱ ngi̱ya nga̱tsjo̱ó.
A sa̱ꞌíntsjaàri chojoo̱, kó a ku̱i̱chji̱a̱ kjo̱a̱a̱ kjo̱a̱kixi̱i̱.
10Ji Ne, ndaꞌyéní, kó ngatamani̱ma̱a̱ an.
¡Ji Ne, Jí boá xi tasíke̱jechiíní!
11Jí boá xi akasíkje Ji kjo̱a̱ndasenna, kó kjo̱a̱chá kiniꞌín Ji.
Kachjeꞌéxín Ji ńjño xa̱ꞌya̱ xi yajà an,
sꞌe̱ ńjño xi chajá nga ma sꞌué kiniꞌínkajéní,
12tsi̱ꞌe̱ nga najén án si̱eé salmo̱, kó nga jmíni̱xtjin nga xió kꞌuijñá ngase.
¡Ji Ne tsa̱ꞌa̱n, ngatsjéni̱xtjin nga ji xi sa̱ꞌintsjaà!
Currently Selected:
Xo̱jo̱n Salmoo̱ 30: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
