Xo̱jo̱n Salmoo̱ 27
27
Jí boá xi tichínní
Só xi katsꞌénda Ndabii̱.
1Néná boá ndiꞌí xí tsꞌentsíjenna ko̱jo xi ꞌboxiéꞌána.
ꞌYá xí stsakjòo̱n.
Néná boá xi tsjangaꞌniúna nga tikón an nga̱sondie.
ꞌYá xí ku̱i̱ndyiándikónna.
2Kjiꞌanga ítikó yojoo̱ xota̱ xi ndajiín,
ko̱jo kondra̱na, tsi̱ꞌe̱ nga sa̱ꞌínkjiéna katsaki,
ta̱sá kuí xi kastingí, kó ixó.
3Ndatsi ngo xtín jájún kjo̱a̱ꞌatjiyajonna,
nga ka̱ma mejeén skjánjo̱na, stsa̱kjonjín ini̱ma̱na,
kó ndatsi tjín xí mejeén kjo̱a̱xchán sa̱ꞌínjo̱na,
ta̱nga an, jè be an ꞌyání xi ꞌniáko̱n an.
4Ta̱ ngo tsí ni xi je tsíꞌáa̱ Néná,
kó kuí boá ni xi kongase an:
Nga ki̱a̱ kotíjña̱ an Ndiꞌaa̱ Néná
ngayeje ni̱xtjin nga kotíjña̱ an nga̱sondie,
tsi̱ꞌe̱ nga skuie an kjo̱a̱tsjakjiꞌii̱ Néná,
ko̱jo nga ki̱a̱ sa̱ꞌinkjó án ki̱a̱ na̱ngo̱xi̱i̱.
5Ngatꞌa̱ kjiꞌanga kji̱ndi̱bá ni̱xtjin xi ndajiín,
Kuí boá xi skónna ki̱a̱ ngi̱ndie nínga tikón,
kó ki̱a̱ ku̱i̱ꞌíjñaꞌmana nínga tikón Ndiꞌandikoón,
kó ki̱a̱ nkꞌaa̱ ngo ndi̱jo̱je ku̱i̱ꞌíjñasónna.
6Sꞌe̱ skjinínkꞌá tokó án, nga an xi sa̱ꞌìi̱n kondra̱na,
kó ki̱a̱ Ndiꞌandikoón sa̱ꞌinkꞌasꞌièe̱n kjo̱a̱tjó nga tsjakꞌuiéna,
kó siee só, jo̱o̱n, sièe̱ só Néná.
7¡Ji Ne, ndaꞌyéní kjiꞌanga Ji xi kuichjiaá!
¡Ngatamani̱ma̱a̱ an, kó ti̱ꞌinsénní!
8Ngo ni tsíchji̱a̱ ini̱ma̱na nga bi̱ katsó kjo̱a̱a̱ Ji:
¡Ti̱ndyi̱sé ji kje̱n án!
Kuíni nga an, Ji boá xi kongasee, Ne tsa̱ꞌa̱n.
9Ngata̱ ꞌbíꞌmíjínní kje̱n Ji,
ti̱nde ngata̱ niꞌínxchínjín Ji nga si̱ꞌinchꞌi Ji kui mosòo̱ xi̱ꞌbi̱.
Jí boá xi tibosíke̱jení, ngata̱ ꞌbíjñísoboéjínní.
Ji Ne xi ꞌboxiéꞌána.
10Ndatsi ku̱i̱ꞌíjñámasienna na̱ꞌmina ko̱jo na̱anna,
ta̱nga Néná boá xi ndí xí tsi̱ꞌe̱ sa̱ꞌínna.
11Ji Ne, takoyèní ndi̱yàa̱, kó ngo ndi̱yà xí kixi̱ tꞌenje̱ní,
ta̱ngatꞌanii̱ kui kondra̱ xi ndyi̱kondaꞌmana.
12Ngata̱ boeꞌéndièjín Ji nga kondra̱na ta̱ ni xi mejénrií sa̱ꞌínjo̱na.
Ngatꞌa̱ chistiko̱ ndisoo̱ ko̱jo xota̱ xi tsꞌén ni xi ndajiín,
je jatjokjà kondra̱ tsa̱ꞌa̱n.
13Ta̱nga sꞌijinna nga skuie an kjo̱a̱ndaa̱ Néná,
ki̱a̱ ngi̱jii̱n xota̱ xi síndo ngasee̱.
14Kuíni nga chiyékjo̱e̱e̱ Néná.
¡Ti̱ꞌingaꞌní jí, kó te̱ꞌéngaꞌníi̱ ini̱màa̱!
¡Jo̱o̱n, chiyékjo̱e̱e̱ Néná!
Currently Selected:
Xo̱jo̱n Salmoo̱ 27: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
