Xo̱jo̱n Salmoo̱ 25
25
Tasíke̱jejne̱ kó chínjne̱
Só xi katsꞌénda Ndabii̱.
1Ji bo̱a̱ Ne, Jí boá xi kjinikꞌaa ini̱ma̱na.
2¡Ji Ne tsa̱ꞌa̱n, Jí boá xi ꞌniákoo̱n!
Mejénjínna nga kjo̱a̱soboá kjo̱a̱ꞌa an,
mejénjínna nga an ko̱jno̱kiena kondra̱na.
3Ja̱koxi̱ boá nga nde ngojín xota̱ xi Ji kjimaꞌniátakoón xi kjo̱a̱soboá kjo̱a̱ꞌa,
kuí boá xi ngatjaꞌa kjo̱a̱soboá, kui xi nde jmí kjo̱a̱jiín nga Ji ndyi̱kjánjo̱o̱.
4Ji Ne, takéní ndi̱yàa̱,
takoyèní ndi̱yà xí mejeén nga kjuín án.
5Ki̱a̱ tꞌenje̱ní nínga tikón kjo̱a̱kixi̱i̱,
kó takoyèní, ngatꞌa̱ Jí boá Ne xi ꞌboxiéꞌána.
Jí boá xi tsꞌénkoyaa̱ nga ngo ni̱xtjii̱n.
6Ngatjaꞌátsjieen an, Ji Ne,
nga ngatsjéni̱xtjin nga tjiín kjo̱a̱tjó ko̱jo kjo̱a̱ni̱ma̱takón Jí.
7Ti̱ꞌinchíyé Ji jé xí katsꞌen an, ko̱jo kjo̱a̱bixkán xi katsꞌen an nga kamá xo̱ngò án.
Ji Ne, ta̱ngatꞌanii̱ kjo̱a̱ni̱ma̱takóo̱n, ko̱jo kjo̱a̱ndàa̱ nga ngatjaꞌátsjieen an.
8Ndaxota̱ ko̱jo kixi̱ boá Néná,
kuíni nga, Kuí boá xi ko̱kóyaá xota̱ jeé ndi̱yà xí ndaa̱.
9Kuí boá xi sa̱ꞌín nga ndi̱yà xí kixi̱i̱ ko̱e̱je̱ xota̱ xi ni̱ma̱kjo̱a̱a̱,
kó ko̱kóyaá xota̱ xi ntꞌiéꞌeén ndi̱yà xí ko̱e̱je̱.
10Kjo̱a̱ni̱ma̱takón ko̱jo kjo̱a̱kixi̱ boá, ngayeje ndi̱ya̱à Néná,
kó kuí boá ni xi sa̱ko̱ó xota̱ xi sa̱ꞌínkjatjosón kjo̱a̱ꞌbíndaa̱,
ko̱jo xi ku̱i̱ntꞌiéꞌeén kjo̱a̱botíxomaa̱.
11Ta̱ngatꞌanii̱ kjo̱a̱tjó xi tjiín Ji Ne,
ti̱ꞌinjetakínní jé ꞌniú xí katsꞌen an.
12ꞌYání bo̱a̱ kui xota̱ xi bendikón Néná.
Kuí boá xi ko̱ko̱ó ndi̱yà xí kjo̱a̱ꞌájin.
13Tji̱e̱nga tjíndo, nda ko̱e̱je̱e̱,
kó xota̱ tji̱e̱e̱ sa̱ko̱ó tꞌanangi.
14Ni xi tjiꞌmaá Néná, kuí boá sa̱ko̱ó xota̱ xi bendikón Kuí,
kó kuí boá xi ko̱ko̱ó kjo̱a̱ꞌbíndaa̱.
15Ngatsjéni̱xtjin nga Néná tsꞌenkjó án nga kjíxꞌá án ndyikón án,
ngatꞌa̱ Kuí boá xi kꞌo̱xié ndsa̱ko án ki̱a̱ nínga tikón chja̱ya̱a̱.
16Tsitsíjinní, kó ni̱ma̱ ngatamaa̱ an,
ngatꞌa̱ tikón so̱bo̱a̱ án, kó achichí ndasen tikòn an.
17Achichí nda̱ kjimaa̱ ini̱ma̱na, kó kjima ꞌniú ngase kui nii̱.
¡Chje̱ꞌéxínní kuí kjo̱a̱ndasee̱n!
18Tsitsíjìi̱n kjo̱a̱ndasenna, ko̱jo nga achichí je jenda an,
kó chje̱ꞌéxínní ngayeje jé xí jè katsꞌen an.
19¡Tsitsíjìi̱n kótjín kondra̱ tjínna,
kó tsitsíjìi̱n kótsꞌèn nga ta̱nisién chꞌoo̱ an!
20¡Chínní, kó ꞌna̱xiéꞌé Ji ini̱ma̱na kjo̱a̱a̱ kui xotaa̱!
Mejénjínna nga kjo̱a̱soboá kjo̱a̱ꞌa an,
ngatꞌa̱ Jí boá xi mongasee̱ nga xchínní.
21Jí boá xi tsꞌénkoyaa̱.
Kjo̱a̱kixi̱na ko̱jo kjo̱a̱a̱ nga jmíjínna jé,
kuí boá kui nii̱ xi sa̱ꞌín nga sa̱ꞌin an.
22¡Ji Ne, ꞌna̱xiéꞌé Ji xota̱ na̱xi̱ńdá Israee̱l,
kjo̱a̱a̱ nga achichí nda̱ kjimaa̱!
Currently Selected:
Xo̱jo̱n Salmoo̱ 25: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
