Xo̱jo̱n Salmoo̱ 24
24
Ree̱ ngayeje nga̱sondiee̱
Só xi katsꞌénda Ndabii̱.
1Néná boá xi tsi̱ꞌe̱ tꞌanangii̱, ko̱jo ngayeje ni xi tjiín,
ko̱jo ti̱ Kuí tsi̱ꞌe̱ nga̱sondiee̱ ko̱jo ngayeje xota̱ xi ki̱a̱ síndoo̱.
2Ngatꞌa̱ Kuí boá xi katsꞌénda tꞌanangii̱ ki̱a̱ nga̱són ndáfoaa̱ ndáchíkoón,
kó ꞌniú íjñá ki̱a̱ nga̱soón ndáfoa xi tsꞌénmongaa̱.
3ꞌYání xi ka̱maa̱ ko̱e̱je̱ Na̱xi̱ Ndikoón Néná.
Kó, ꞌyání xi ka̱maa̱ nga ki̱a̱ kꞌuijñá ngi̱ndie xi tsjiee̱ Néná.
4Ta̱kuítsí xota̱ xi tsjie tsjaa̱, ko̱jo xi tsjie ini̱ma̱a̱, kui xi jmíjéjiín,
ko̱jo kui xi jmí tsi ta̱xkiya ndyi̱tsꞌéndíkón ni xi jmí ni chjíjiín,
ti̱nde índisojín nga sa̱ꞌínkjatjosón ngo ni.
5Kuí bí kui xotaa̱ xi sa̱ko̱ó kjo̱a̱niꞌánchikonñeé Néná,
kó ti̱ kꞌuieé kjo̱a̱kixi̱i̱ kui Néná xí tsꞌaxiéꞌaá.
6Bo̱a̱ kjiꞌi ni xi maa̱ ngayeje tji̱e̱e̱ xota̱ xi Kui ndyi̱mongase.
Kui xota̱ xi mongase kje̱n Ji, Ji Nee̱ Jakoo̱b.
7¡Chjáxꞌájnú yojojnú jún nga̱ntjo̱a̱a̱ na̱xi̱ńdáꞌniú!
¡Chjanínkꞌájnú yojojnú jún nga̱ntjo̱a̱ xi síndo ngatsjéni̱xtjin,
ngatꞌa̱ jè kꞌo̱sꞌien Re xi tsi̱ꞌe̱ ngayeje kjo̱a̱jee̱!
8Kó ꞌyání bo̱a̱ kui Re xi tsi̱ꞌe̱ ngayeje kjo̱a̱jee̱.
¡Néná boá, Kui xi tjiín ngaꞌniuú, ko̱jo xi tsakjónjín maá!
¡Néná boá, Kui xi tjiín ngaꞌniú nga kjaán!
9¡Chjáxꞌájnú yojojnú jún nga̱ntjo̱a̱a̱ na̱xi̱ńdáꞌniú!
¡Chjanínkꞌájnú yojojnú jún nga̱ntjo̱a̱ xi síndo ngatsjéni̱xtjin,
ngatꞌa̱ jè kꞌo̱sꞌien Re xi tsi̱ꞌe̱ ngayeje kjo̱a̱jee̱!
10Kó ꞌyání bo̱a̱ kui Re xi tsi̱ꞌe̱ ngayeje kjo̱a̱jee̱.
¡Néná xí tsi̱ꞌe̱ jájuún boá!
¡Kuí boá kui Re xi tsi̱ꞌe̱ ngayeje kjo̱a̱jee̱!
Currently Selected:
Xo̱jo̱n Salmoo̱ 24: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
