Xo̱jo̱n Salmoo̱ 115
115
Néná boá xi chjiéngá si̱ꞌandikón
1Jmí tsi ji̱n, Ji Ne, jmí tsi ji̱n,
Jaꞌée̱n boá xi tsoboaá nga si̱ꞌantsjaa̱,
ta̱ngatꞌanii̱ kjo̱a̱ni̱ma̱takóo̱n ko̱jo ni xi ja̱koxi̱i̱.
2Ngatꞌa̱, a mí tsí bi̱ ka̱tso̱ xota̱ na̱xi̱ńdá xí ngasee̱: Ñá tikón Nejnú ꞌne̱.
3Ta̱nga Nejne̱ ki̱a̱ tikón ki̱a̱ nkꞌajmii̱,
kó ngayeje ni xi mejeén sa̱ꞌin, tsꞌén.
4Ni xi ne ndyi̱tsoó kui xota̱ na̱xi̱ńdaá,
ni xi to̱nsinié ko̱jo ni xi to̱ntiboa boá,
ni xi katsꞌénda xota̱ nga̱sondiee̱ boá.
5Tjín tsꞌoa, ta̱nga májiín chji̱a̱,
tjín ndyi̱ko̱n, ta̱nga májiín be,
6tjín tji̱bo̱a̱nijon, ta̱nga májiín ntꞌié,
tjín ṉtjo̱n, ta̱nga májiín kjiendá,
7tjín tsja, ta̱nga májiín tsꞌénjo̱ná,
tjín sé, ta̱nga májiín fí,
tjiín na̱xo̱, ta̱nga nde ngo én fotjojiín tsꞌoa.
8Bo̱a̱ má kón xikoó kui nii̱, kui xota̱ xi katsꞌéndaa̱,
ko̱jo ta̱ꞌyaní xi kui nii̱ kjimaꞌniátakón.
9¡Jún xota̱ na̱xi̱ńdá Israee̱l, ti̱ꞌanꞌniátakónjnú Néná!
Kuí boá xi bosikójojnú, ko̱jo xi kónjnú.
10¡Jún xota̱ tji̱e̱e̱ Aaroo̱n, ti̱ꞌanꞌniátakónjnú Néná!
Kuí boá xi bosikójojnú, ko̱jo xi kónjnú.
11¡Jún xi yandikónjnú Néná, ti̱ꞌanꞌniátakónjnú Kuí!
Kuí boá xi bosikójojnú, ko̱jo xi kónjnú.
12Néná jaꞌátsjiee̱n ñá, kó Kuí boá xi sa̱ꞌínchikonñéná.
Sa̱ꞌínchikonñé xota̱ tji̱e̱e̱ Israee̱l,
sa̱ꞌínchikonñé xota̱ tji̱e̱e̱ Aaroo̱n.
13Sa̱ꞌínchikonñé xota̱ xi tsꞌéndíkón Néná,
xi xchá ko̱jo xí kjindí.
14Néná ngatsꞌénchíkonñé ngasejnú jún ko̱jo ndíjnú.
15Néná ngatsꞌénchíkonñéjnú jún,
kui Néná xí katsꞌénda nkꞌajmii̱ ko̱jo tꞌanangii̱.
16Ngayeje ndiꞌakꞌajmii̱, nga ndiꞌakꞌajmii̱ Néná boá,
kó Kuí boá xi katsjaá tꞌanangii̱, ndií xota̱ nga̱sondiee̱.
17Xota̱ xi je jesoón, jè ngiti̱ sa̱ꞌíntsjàjiín Néná,
ko̱jo kui xota̱ xi je kijí ki̱a̱ nga̱sondie nínga je xió kjiꞌii̱.
18Ta̱nga ñá boá xi nda tsꞌén ndokjo̱a̱ kjo̱a̱a̱ Néná,
ndeskande ngotꞌe̱, ko̱jo ta̱kjiꞌání.
¡Nganiꞌántsjaà Néná!
Currently Selected:
Xo̱jo̱n Salmoo̱ 115: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
