Xo̱jo̱n Salmoo̱ 116
116
Jè ka̱ma nda kjófé an
1Achichí tjóna Néna, ngatꞌa̱ tsintꞌiéna kjiꞌanga ni̱ma̱ kixiàa̱n nga tsíchji̱a̱a̱.
2Ngatꞌa̱ asiénnijonna ni xi kixiáa̱n,
kuíni nga ngayeje ni̱xtjin nga kotíjña̱ an nga̱sondie nga Kui kuichjiáa̱.
3Kjiꞌanga jaꞌatjiyajonna chja̱ya̱a̱ kjo̱a̱bo̱yaa̱,
ko̱jo nga katsoboána ndikoón nga̱tsjo̱ó,
achichí nda̱ kamána, ko̱jo kisꞌiena xi so xi ndakjan.
4Kósꞌe̱ kjiꞌá boá nga ꞌniú tsíchji̱a̱a̱ Néná, kó bi̱ kixiáa̱n:
¡Ji Ne, ngo kjo̱a̱nda, ꞌna̱xiéꞌé Ji ini̱ma̱na ngotꞌe̱ ꞌne̱!
5Kixi̱ boá Ndi̱a̱ná, kó tjínrií kjo̱a̱chiyákjo̱a̱,
jo̱o̱n, achichí ni̱ma̱ maa̱ ñá Néná.
6Néná koón xota̱ xi jmíjín kjo̱a̱nkꞌakon.
Kjiꞌanga kamáꞌónna, Kuí boá xi tsꞌaxiéꞌána.
7Ngotꞌe̱ ꞌné nga je ka̱ma nda sa̱ꞌinkjaꞌyá ini̱ma̱na,
ngatꞌa̱ Néná achichí kjo̱a̱nda je katsꞌénna.
8Jí boá xi kaꞌnaxiéꞌé Ji ini̱ma̱na ngi̱ya tsja kjo̱a̱bo̱yaa̱,
kiniꞌíntsjiejìn Ji ndándyíkón án,
kó katseꞌéndièjín Ji nga kastingí an.
9Ki̱a̱ xtji̱e̱e̱n kjuín án ngindyi̱ko̱n Néná,
ki̱a̱ nga̱sondie nínga síndo xotaa̱.
10Kisꞌijinna, kuíni nga tsíchji̱a̱ an,
ndatsi achichí ndasen tikón an.
11Kó kjiꞌanga achichí kjímaboana ta̱xkiya bi̱ kixian án:
Ngayeje xotaa̱ nga̱sondiee̱ nga ndiso.
12Kótsꞌèn ka̱mana kꞌuichjíi̱ Néná,
kjo̱a̱a̱ ngayeje kjo̱a̱nda xi je katsꞌénna.
13¡Ja̱ skjíbé án kjo̱a̱ꞌnaxiéꞌá xi tsja̱na,
kó sa̱ꞌinkaxoma an jaꞌée̱n nga tsjáa̱ ndokꞌóchji̱ì!
14Néná boá xi sa̱ꞌinkjatjosóo̱n ni xi kixiyatjóo̱n,
jo̱o̱n, kó ngindyi̱ko̱n xota̱ na̱xi̱ńdaá boá nga sa̱ꞌin an kui nii̱.
15Achichí on maá Néná, kjiꞌanga fesón xota̱ tsjiee̱ Kui.
16Ji Ne, nga ja̱koxi̱, mosòo̱ boá án,
moso̱ tse̱, ndií na̱ mosòo̱,
Jí boá xi kachjándéní nga tjitáꞌniú án.
17Jí boá xi sa̱ꞌinkꞌasꞌiee̱n kjo̱a̱tjó nga tsjaa ndokꞌóchji̱ì,
kó sa̱ꞌinkaxoma an jaꞌeén Néná.
18Néná boá xi sa̱ꞌinkjatjosóo̱n ni xi kixiyatjóo̱n,
jo̱o̱n, kó ngindyi̱ko̱n xota̱ na̱xi̱ńdaá boá nga sa̱ꞌin an kui nii̱.
19Ki̱a̱ ndi̱tsen Ndiꞌaa̱ Néná,
ki̱a̱ ngamasièe̱n ji na̱xi̱ńdáꞌniú Jerusale̱n.
¡Nganiꞌántsjaà Néná!
Currently Selected:
Xo̱jo̱n Salmoo̱ 116: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
