Xo̱jo̱n Salmoo̱ 107
107
Néná achichí nda̱ tsꞌénjo̱ xota̱ na̱xi̱ńdaá
1¡Ti̱ꞌantsjàjnúu̱ Néná ngatꞌa̱, achichí ndaxota̱ Kui,
ngatꞌa̱ ngatsjéni̱xtjin nga tjiín kjo̱a̱ni̱ma̱takón!
2Bo̱a̱ nga tsó xota̱ xi Néná je íchjíngí,
kui xi je ikꞌíchjíngí nga kondra̱a̱ xi botixómaá katsaki,
3kó ki̱a̱ je ítikó nga kjindibáni nangi xi kjii̱n,
ndeskande nangi xí síndo xtji̱e̱e̱n nínga fotjo tsꞌueé,
ko̱jo xi síndo xtji̱e̱e̱n nínga ꞌbosꞌien tsꞌueé,
ko̱jo xi síndo xtji̱e̱e̱n ta̱ꞌin, ko̱jo xi síndo xtji̱e̱e̱n na̱ngi.
4Ta̱xkiya kisꞌiṉtso̱ma soboá ki̱a̱ nangi kixií, kó kasakojiín ngo ndi̱yà,
ti̱nde kasakojiín ngo na̱xi̱ńdáꞌniú nínga ka̱ma kꞌuíndo.
5Kamá bojó, ko̱jo kamá xíndaá,
kó je mejeén makjisón ini̱ma̱a̱ katsaki.
6Ta̱nga kjiꞌanga achichí nda̱ kamaá, tsíchji̱a̱a̱ Néná,
kó Néná jaꞌáxiín kui kjo̱a̱ni̱ma̱a̱.
7Kó kijíjo̱ ngo ndi̱yà xí kixi̱,
tsi̱ꞌe̱ nga kjo̱chó na̱xi̱ńdáꞌniú nínga ma mindyion.
8¡Te̱ꞌéjnúu̱ ndokꞌóchjì Néná ta̱ngatꞌanii̱ kjo̱a̱ni̱ma̱takoón,
ko̱jo ta̱ngatꞌanii̱ ni xi fíndikónná xi katsꞌén nganda tsi̱ꞌe̱ xota̱ nga̱sondiee̱!
9Ngatꞌa̱ Néná boá xi foaꞌáxín xíndaá ini̱ma̱a̱ xotaa̱,
kó tsie ni xi nda tsjaá ini̱ma̱a̱ xota̱ xi bojoó.
10Tjín kuí xotaa̱ xi nínga jñoó, ko̱jo tsi nínga tjín kjo̱a̱bo̱ya kisꞌiṉtso̱ma,
xota̱ xi síndoꞌniú nga kisꞌiee̱ kjo̱a̱ndasen, ko̱jo nga ńꞌniúki̱cha̱ ikítꞌaꞌniú kamá,
11ngatꞌa̱ katsꞌénsénjiín ni xi atíxoma Néná,
kó ta̱sá katsꞌénchꞌo ni xi atíxoma kui Néná xí tikón ndiꞌakꞌajmii̱.
12Kuíni nga Néná katsꞌén ni̱ma̱kjo̱a̱ ini̱ma̱a̱ nga katsjaá xá xí ꞌniú,
kó nga kastingí, nde ngojín xi asíko̱jo nga katsꞌénkjastjíe̱n.
13Ta̱nga ngije achichí nda̱ kamaá, tsíchji̱a̱a̱ Néná,
kó Néná tsꞌaxiéjinni kjo̱a̱ni̱ma̱ xi ndyi̱foaꞌatio,
14kó tsꞌaxiéjinni nínga jñó ko̱jo ndi̱ya̱à kjo̱a̱bo̱ya nínga kisꞌiṉtso̱ma,
kó katsꞌéndéní kui ńꞌniúki̱cha̱ xi kisitꞌaꞌniú.
15¡Te̱ꞌéjnúu̱ ndokꞌóchjì Néná ta̱ngatꞌanii̱ kjo̱a̱ni̱ma̱takoón,
ko̱jo ta̱ngatꞌanii̱ ni xi fíndikónná xi katsꞌén nganda tsi̱ꞌe̱ xota̱ nga̱sondiee̱!
16Ngatꞌa̱ akján nga̱ntjo̱a̱ xi ki̱cha̱ bronse̱ kamándanii̱,
kó iskjiníyá ki̱cha̱ xi ꞌbíchjájo̱ni.
17Achichí ndasen kisꞌiṉtso̱ma, ta̱ngatꞌanii̱ nga kitikjo̱a̱ kamá,
kó jaꞌa kjindiá, ta̱ngatꞌanii̱ ni xi ndajín xi katsꞌén.
18Chꞌo kamaá ini̱ma̱a̱ ngayeje ni xi nda chiniee̱,
nga je mejeén jesón katsaki.
19Ta̱nga ngije ꞌniú nda̱ kamaá, tsíchji̱a̱a̱ Néná,
kó Néná tsꞌaxiéjinni kjo̱a̱ni̱ma̱ xi jaꞌatio.
20Néná katsangiyaa̱ eén, kó katsꞌéndaya,
kó tsꞌaxiéꞌáni ngi̱ya tsja kjo̱a̱bo̱yaa̱.
21¡Te̱ꞌéjnúu̱ ndokꞌóchjì Néná ta̱ngatꞌanii̱ kjo̱a̱ni̱ma̱takoón,
ko̱jo ta̱ngatꞌanii̱ ni xi fíndikónná xi katsꞌén nganda tsi̱ꞌe̱ xota̱ nga̱sondiee̱!
22Ti̱ꞌantsjàjnúu̱ Néná nga ko̱e̱ꞌéjnúu̱ ndokꞌóchjì,
kó tsjangatamajnú nga ko̱ndàjnú nga kꞌuiyájnú ni xi je katsꞌén Kuí.
23Kó tjotso yiꞌi katsꞌénkjién nga kijí ngi̱jin ndáchíkoón,
nga atíñá, ko̱jo nga tsꞌatsie ni ki̱a̱ ngi̱jii̱n kui ndáfoa tsiee̱.
24Kó askotsijee̱n ni xi katsꞌénda Néná,
kó kamábe ni xi fíndikónná xí tjín ki̱a̱ nínga na̱nga̱a̱.
25Kó Néná katsjá ngo kjo̱a̱ nga kjindibá ngo tjo̱ꞌniú,
kó iskjininkꞌa ngaꞌniuú ndáfoaa̱.
26Kó katjoninkꞌa ngaskande nkꞌajmii̱,
sꞌe̱ kijíjaya ngaskande nínga na̱nga̱a̱, kó ini̱ma̱a̱ kamátsꞌe̱ maá,
27jaꞌatjiya má, kó kijí kꞌi̱e̱, kijí jàn xikoó tsi chꞌi̱,
kó nde jmí chjí kamájiín, ndatsi ꞌniú kamaá nga kiniꞌánxájo̱ tjotso yiꞌii̱.
28Ta̱nga ngije achichí nda̱ kamaá, tsíchji̱a̱a̱ Néná,
kó Néná tsꞌaxiéjinni kjo̱a̱ni̱ma̱ xi jaꞌatio,
29kó katsꞌénkꞌíxió kui tjo̱ꞌniuú,
kó kixixió tjo̱o̱ ndáchíkoón.
30Kó achichí tsjá kamaá ngije kixixió kui tjo̱ꞌniuú,
kó Néná kijíjo̱ ki̱a̱ tꞌa ndáchíkón, nínga kamámejeén jachó.
31¡Te̱ꞌéjnúu̱ ndokꞌóchjì Néná ta̱ngatꞌanii̱ kjo̱a̱ni̱ma̱takoón,
ko̱jo ta̱ngatꞌanii̱ ni xi fíndikónná xi katsꞌén nganda tsi̱ꞌe̱ xota̱ nga̱sondiee̱!
32Cha̱ndikónjnú nga ka̱matikó xota̱ na̱xi̱ńdaá,
kó ti̱ꞌantsjàjnúu̱ nga ka̱matikó xota̱ xi xchaá.
33Néná boá xi ndejèꞌ tsꞌén nangi kixií,
kó ngi̱ndie nínga tjín ndáńchꞌií, nangi kixí tsꞌén,
34kó tꞌanangi xi ndaa̱, nangi xi jmí ni tsjájín tsꞌén,
ta̱ngatꞌanii̱ ni xi ꞌniú ndajín xi tsꞌén kuí xota̱ xi ki̱a̱ síndoo̱.
35Kui boá xi nangi kixií, ngi̱ndiò tsꞌén,
kó tꞌanangi xi kixií, ndáńchꞌi̱ tsꞌén.
36Kó ki̱a̱ tsꞌénkꞌíndo xota̱ xi bojoó,
tsi̱ꞌe̱ nga kꞌuieé ngo na̱xi̱ńdáꞌniú nínga ma mindyion.
37Ítji̱e̱ ni tjié, ítji̱e̱ tostsi̱je̱è,
kó achichí nda kamá ni tjieé.
38Néná katsꞌénchikonñé, kó achichí kamá ndií,
kó katsjandièjín nga kamá chiboa cho̱ tji̱e̱é.
39Ta̱nga kjiꞌanga nga xá ikꞌíniéꞌniuú, kamá chiboa,
ta̱ngatꞌanii̱ kjo̱a̱ni̱ma̱, ko̱jo kjo̱a̱ndasen xi kiniꞌánjo̱.
40Néná katsꞌénchꞌó kui xota̱ xi ngito̱ko̱o̱,
kó ki̱a̱ tsꞌénchájá ngi̱jii̱n ngo ngi̱ndie nínga jmí ndi̱yàjín.
41Xota̱ xi ni̱ma̱a̱ ꞌboxiéjin ngi̱jii̱n kjo̱a̱ni̱ma̱ xi foaꞌajin,
kó tsꞌénkjín xota̱ xi ngo ndiꞌaa̱, xikó maá cho̱ tjieé.
42Kjiꞌanga xota̱ xi kixi̱i̱ sku̱i̱e̱, achichí tsjá ka̱maa̱,
ta̱nga xota̱ xi ꞌniú ndajiín, ta̱ xió tsí kꞌuíndo.
43Xota̱ xi kjínkoón ngatsꞌénkjátjosón kui nii̱,
kó ka̱makjiín kjo̱a̱ni̱ma̱takón tsiee̱ Néná.
Currently Selected:
Xo̱jo̱n Salmoo̱ 107: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
