Xo̱jo̱n Salmoo̱ 106
106
Xota̱ na̱xi̱ńdaá Néná katsꞌénkꞌoyá yojoo̱
1¡Nganiꞌántsjaà Néná! ¡Ti̱ꞌantsjàjnúu̱ Néná, ngatꞌa̱ achichí ndaxota̱ Kui!
Ngatꞌa̱ ngatsjéni̱xtjin nga tjiín kjo̱a̱ni̱ma̱takón.
2ꞌYá xí ka̱maa̱ ku̱i̱ꞌíxki̱ kjo̱a̱ndikón yiꞌi xi katsꞌén Néná.
ꞌYá xí ka̱maa̱ nga ka̱tso̱ya kjo̱a̱niꞌántsjaà Kui.
3¡Achichíra̱ tsjaa̱ xota̱ xi tsꞌén ni xi kixi̱i̱,
ko̱jo xi ngatsjéni̱xtjin nga tsꞌénkjátjosón kjo̱a̱kixi̱i̱!
4Ji Ne, ngatjaꞌátsjiee̱n an kjiꞌanga ko̱kée̱ kjo̱a̱ndaxota̱a̱ xota̱ na̱xi̱ńdáa̱,
ndibéchinní nga ko̱ꞌna̱xiéꞌéní,
5tsi̱ꞌe̱ nga skuie an ni nda xi niꞌínje̱ Ji xota̱ xi je kachjeꞌéjin Ji,
ko̱jo nga tsja ka̱mana, kjo̱a̱a̱ kjo̱a̱tsja xi tjiín xota̱ na̱xi̱ńdáa̱,
ko̱jo nga kꞌuiéna kjo̱a̱je kjo̱a̱a̱ xota̱ xi je tse̱.
6Kiniꞌánjéjne̱ ji̱n ko̱jo xota̱ xi xchájne̱,
kó ni xi ndajín, ko̱jo ni xi ꞌniú chꞌokjiꞌi je kiniꞌánjne̱.
7Xota̱ xi xchájne̱ kamákjínjiín kjo̱a̱ndikón xí kiniꞌín Ji ki̱a̱ nangi Ejiptoo̱,
kó jaꞌátsjienjiín kjo̱a̱ni̱ma̱takón tsie xi kisꞌiee̱,
kó ta̱sá kondra̱ tse̱ kisꞌińdoni ki̱a̱ tꞌa Ndáchíkón Inií.
8Ta̱nga Néná boá xi tsꞌaxiéꞌájne̱ ta̱ngatꞌanii̱ nga tjoó Jaꞌeén,
tsi̱ꞌe̱ nga akó ngaꞌniú jèe̱.
9Katsꞌénxchánjo̱ Ndáchíkón Inií, kó kitsjiee̱n ngo ndi̱yà xi kixí
kó ki̱a̱ katsꞌénkjaꞌa yise xota̱ xi xchájne̱, ki̱a̱ nínga na̱nga̱a̱ ndáchíkoón,
kó jaꞌa xikoó tsi ngo nangi xi kixí.
10Tsꞌaxiéꞌá ngi̱ya tsja xota̱ xi katsꞌénchꞌó,
kó íchjítáꞌín nga tsꞌaxiéꞌá ngi̱ya tsja kondra̱a̱.
11Ndáfoaa̱ ndáchíkoón yíꞌmáni kondra̱a̱,
kó nde ingojín xi tsꞌangii̱ yojoo̱.
12Kósꞌe̱ xota̱ xi xchájne̱ kisꞌijii̱n eén,
kó kisiee̱ só nga katsꞌéntsjaà.
13Ta̱nga sꞌe̱ tsí chiboa ni̱xtjin jaꞌa, nga kichíyá nginií ni xi kiniꞌín Ji,
kó nde askoyájiín nga sku̱i̱e̱ ni xi ngase xi ko̱ti̱xomée̱ Ji.
14Achichí ꞌniú kamábojoó nga ki̱a̱ nangi kixií,
kó askotꞌayákón Néná, kjiꞌanga kisꞌińdo soboá.
15Kó Néná boá xi katsjaá ni xi tsíꞌaá,
ta̱nga ti̱ katsangiyaa̱ ngo chiꞌin xi tsꞌenkꞌiénná nga.
16Kamáꞌonkon kjo̱a̱a̱ Moisee̱ nga kisꞌińdo ki̱a̱ ndiꞌańjñoo̱,
ko̱jo kjo̱a̱a̱ Aaroo̱n nga, kui nda̱ xi je katsꞌéntsi̱ꞌe̱ Néná,
17kó katjoxꞌá tꞌanangii̱, sꞌe̱ katjéjén Ndataa̱n,
kó ti̱ katjéjén Abiraa̱n, kui xota̱ kitikjo̱a̱ xi tsoꞌbájo̱ nga,
18ndiꞌí xi tjítíngá kjindibánié kui xota̱ xi tjimátji̱ngii̱,
kó kui ndiꞌií xi katsꞌénkjié kui xota̱ xi tjiín jeé.
19Ngo ndií cho̱yojo katsꞌénda ki̱a̱ na̱xi̱ Oree̱b,
kó asieén tikoó kuí a̱si̱én xí kiniꞌánńdaá.
20Asíkjo kjo̱a̱jena, kó ta̱sá ngo a̱sie̱én ngo cho̱ xi kjién kꞌijñá katsꞌéndikón.
21Katsꞌénchíyà Néná, kui xi tsꞌaxiéꞌá,
Kui xi achichí kjo̱a̱ndikón xí katsꞌén ki̱a̱ nangi Ejiptoo̱,
22ko̱jo ni xi fíndikónná xí katsꞌén ki̱a̱ nangi Kaa̱n,
ko̱jo ni xi ndakon má má xí katsꞌén ki̱a̱ tꞌa Ndáchíkón Inií.
23Kósꞌe̱ katsꞌénkjó nga ta̱sá tsí ta̱ bo̱a̱a̱ katsꞌénkjié,
ta̱nga Moisee̱, kui nda̱ xi jaꞌájin Néná, tsíchji̱a̱tjé kui xotaa̱,
sꞌe̱ jaskan jaꞌajenda Néná, tsi̱ꞌe̱ nga ngiti̱ katsꞌénkjiéjínni ngijee̱.
24Ta̱nga kui xotaa̱ kamámejénjiín kui tꞌanangi tsjakjiꞌi xi Néná katsjaá,
kó katsꞌénsꞌijinjín én xi katsóyàtjón Néná nga sa̱ꞌín.
25Ta̱sá ki̱a̱ ngi̱ya ndiꞌańjñoo̱ tsíchji̱a̱taꞌin Néná,
kó kamámejénjiín tsintꞌiéꞌeén nda̱a̱ Néná.
26Kó Néná iskjininkꞌa tsja nga katsóyàtjoón nga ki̱a̱ kju̱i̱e̱són nangi kixií,
27ko̱jo nga ki̱a̱ kju̱i̱e̱són xota̱ tji̱e̱e̱ ki̱a̱ ngi̱jii̱n na̱xi̱ńdaá,
kó nga sa̱ꞌíntsojoboa ngayeje tꞌanangii̱.
28Ta̱nga kui xotaa̱, ta̱sá mosoo̱ ne Baa̱l kamá,
kó iskjinie nichinie xi niꞌánkꞌasꞌiee̱n a̱sie̱én kui ne xi je jesoón.
29Kó ta̱ngatꞌanii̱ kui ni xi katsꞌeén, nga katsꞌénkjaán kjo̱a̱xcha̱án Néná,
kó ngo chiꞌin xi tsꞌenkꞌiénná katsangiya ngi̱jii̱n kui xotaa̱.
30Ta̱nga nda̱ xi ꞌmí Finee̱, tsíchji̱a̱tjé ngandaa̱ kui xotaa̱,
kó kui chiꞌii̱n ngiti̱ kijítsiejín ngase.
31Kuíni nga Néná tsaꞌaxki̱ ni xi katsꞌén kui nda̱a̱,
kó ngatsjéni̱xtjin nga ngayeje tji̱e̱e̱ xotaa̱ xi sa̱ꞌínkjaꞌátsjien.
32Ti̱ katsꞌénxtií Néná ki̱a̱ nínga katjo ndáfoa ki̱a̱ Meribaa̱,
kó ta̱ngatꞌanii̱ kui xotaa̱, nga Moisee̱ ndajín kamátaꞌin,
33ngatꞌa̱ achichí ꞌniú kamáxtií Moisee̱,
kó ta̱xkiya tsíchji̱a̱ ni xi katsó.
34Katsꞌénkjiéjín xota̱ na̱xi̱ńdá xí atíxoma Néná nga si̱ꞌankjie.
35Ta̱sá ki̱a̱ katsꞌénkꞌájii̱n yojoo̱ kui xota̱ xi bejín Néná,
kó ki̱a̱ jaꞌángií kjo̱a̱xchá xí katsꞌén kui xotaa̱,
36kó ki̱a̱ katsꞌénxátꞌaa̱ ni xi ne katsoó,
kó kui nii̱ xi xikoó tsi ngo chja̱ya̱ kamaá.
37Katsꞌénkꞌasꞌien ndí xíꞌiín, ko̱jo ndí ínchjiín,
xikoó tsi ngo kjo̱a̱tjó, tsi̱ꞌe̱ xindajín.
38Iskjitjón jiín xota̱ xi jmí jéjiín,
kui jiín ndí xí xi̱ꞌii̱n, ko̱jo ndí xí ínchjiín,
kui xi katsꞌénkꞌasꞌiee̱n kjo̱a̱tjó kui ni xi ne katsoó xi chji̱a̱ni nangi Kanaa̱n,
kó tꞌanangii̱ kamándándí kjo̱a̱a̱ kui jé xí chji̱a̱ni kui jiín.
39Kó bo̱a̱ tsꞌén katsꞌénndándí ni xi katsꞌén,
kó katsꞌénmasien yojoo̱ nga kijítji̱ngi kui nee̱.
40Kuíni nga Néná achichí ꞌniú katsꞌénxchánjo̱ xota̱ na̱xi̱ńdaá,
kó katsꞌénchꞌó kui xota̱ xi je Kui chji̱a̱ni.
41Kó ki̱a̱ katsꞌénkꞌasꞌien ngi̱ya tsja xota̱ xi bejín Néná,
kó kui xota̱ xi katsꞌénchꞌoó, kui atíxomaa̱,
42kó kui kondra̱a̱ ndajín katsꞌénjo̱,
kó ni̱ma̱kjo̱a̱ índo nga atíxomaa̱.
43¡Kótjín ndi̱yà nga katsꞌéndé!
Ta̱nga kui xotaa̱, ngatsjéni̱xtjin nga kitikjo̱a̱ kamá,
kó saꞌniú saꞌniú ngase katsꞌénjé.
44Kó ndatsi bo̱a̱ kjiꞌi ni xi katsꞌén, Néná kamábe nga achichí nda̱ kamaá,
kó tsintꞌieé nga ni̱ma̱ katsó,
45kó jaꞌátsjiee̱n ni xi índajo̱,
sꞌe̱ ni̱ma̱ kamaá, xikó kjiꞌi kjo̱a̱ni̱ma̱takón tsie xi tjiín.
46Kó Néná katsꞌén nga kondra̱a̱ ni̱ma̱ kamaá,
ngayeje xota̱ xi ndyi̱a̱ꞌniuú.
47Ji Ne, Ji xi Nejne̱, ꞌna̱xiéꞌéjne̱,
kó chjábé nginíjne̱, tsi̱ꞌe̱ nga kongín nginíjne̱ nangijne̱,
tsi̱ꞌe̱ nga si̱ꞌantsjajne̱ Jaꞌén tsjiée̱,
ko̱jo tsi̱ꞌe̱ nga kꞌuiéjne̱ kjo̱a̱je nga si̱ꞌantsjajne̱ Ji.
48¡Ngatamachikonñé Néná, kui xi Nee̱ xota̱ Israee̱l,
ndeskande ngotꞌe̱ ko̱jo ta̱ kjiꞌání!
Kó ngayeje xota̱ na̱xi̱ńdaá, bi̱ nga tsó: ¡Bo̱a̱ kjíꞌí!
¡Nganiꞌántsjaà Néná!
Currently Selected:
Xo̱jo̱n Salmoo̱ 106: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
