Xo̱jo̱n Salmoo̱ 105
105
Ni xi katsꞌén Néná ngandaa̱ xota̱ Israee̱l
1¡Ti̱ꞌantsjàjnúu̱ Néná, kó ti̱ꞌankaxomájnú Jaꞌeén Kuí!
Tꞌíyájnúu̱ xota̱ na̱xi̱ńdaá, ngayeje ni xi je katsꞌén Kuí.
2¡Ndàjnúu̱, ndàjnúu̱ salmo̱!
Ti̱ꞌankjójnú ngayeje ni xi fíndikónná xí je katsꞌén.
3Tsjangatamajnú kjo̱a̱a̱ Jaꞌén tsjiee̱
tsjangatamaa̱ ini̱ma̱a̱ xota̱ xi mongase Néná.
4Ti̱ndyi̱séjnú Néná, ko̱jo ngaꞌniú xí tjiín,
kó ngatsjéni̱xtjin nga ti̱ndyi̱séjnú kje̱n.
5Ngatjaꞌátsjienjnú ni xi fíndikónná xí katsꞌén Néná,
ngatjaꞌátsjienjnú kjo̱a̱ndikón xí katsꞌén,
ko̱jo kjo̱a̱botíxoma xi je katsjájnú.
6¡Jún xi xota̱ tji̱e̱e̱ Abraa̱n kui xi mosoo̱ Néná kamá,
ko̱jo jún xi xota̱ tji̱e̱e̱ Jakoo̱b, kui nda̱ xi jaꞌájin Kui, ndaꞌyájnúꞌun!
7Kuí boá xi Néná, kó ngayeje tꞌanangii̱ nga tikón kjo̱a̱kixi̱i̱.
8Ngatsjéni̱xtjin nga foaꞌátsjiee̱n ni xi índa,
kui ni xi katsóyàtjón nga sa̱ꞌínjo̱ mi̱ tji̱e̱e̱ xota̱.
9Kui kjo̱a̱ꞌbínda xi katsꞌénjo̱ Abraa̱n,
ko̱jo ni xi katsóyàtjoón Isaa̱ nga sa̱ꞌinkjatjosón.
10Kó ꞌniú íjñaá Jakoo̱b nga katsꞌénkjién ngo kjo̱a̱kiti,
kó xota̱ Israee̱l íjñaá ngo kjo̱a̱ꞌbínda xi kꞌuijñá ngatsjéni̱xtjin,
11nga bi̱ katsoó:
Jún boá xi tsjajnúꞌun nangi Kanaa̱n, xikoó ngo chikjan ni xi katsoboájnú jún.
12Kjiꞌa boá nga bo̱a̱ katsó, kjiꞌanga kjín jín kamá kui xotaa̱,
achichí chiboa kamá, kó xota̱ xi xín nangi chji̱a̱ni kamá.
13Ngatꞌa̱ xki̱ na̱xi̱ńdá, xki̱ na̱xi̱ńdá,
xki̱ ngi̱ndie nínga botíxoma, xki̱ ngi̱ndie nínga botíxoma kisꞌiṉtso̱masón.
14Kó Néná katsjandièjín nga tjín xí katsꞌénxtíjnú,
kó ta̱ngatꞌanii̱ kui xotaa̱, nga bi̱ tsꞌén atíxomaa̱ já ree̱:
15Ngata̱ jmí ni niꞌánjo̱jínjnú na̱xi̱ńdá xí Án je jaꞌajin An,
ngata̱ jmí ni xi ndajín niꞌánjo̱jínjnú jáchji̱ni̱e̱ꞌénna.
16Achichí kjindiá jeꞌejo̱ kui tꞌanangii̱,
kó katsꞌénkjatsón ngi̱ndie nínga tjitjíe̱ to ndso̱ko̱a̱n ṉño̱paa̱n.
17Ta̱nga ngo nda̱ katsangiyatjoón kui xotaa̱,
kó Kosiee̱ boá, kui nda̱ xi akatíñá xikoó tsi ngo moso̱.
18Kó já Ejiptoo̱ katsꞌénꞌoón se Kosiee̱ nga ítꞌa ńꞌniúki̱cha̱,
kó ndo̱bo̱a̱yà íjñaꞌya,
19ngaskande ni̱xtjin nga jatjosón ni xi katsóyàtjón Kuí nga ka̱ma,
Néná askotꞌayákón Kosiee̱.
20Kósꞌe̱ nda̱ ree̱ nangi Ejipto̱ katsjákjo̱a̱ nga ikꞌíjñandé,
kó kui nda̱ xi botixómaá tsꞌaxiéni ndo̱bo̱a̱ya̱à.
21Kó katsꞌén nga kui xi atíxomaa̱ ndiꞌaa̱,
ko̱jo nga xtitjón katsꞌén, kjo̱a̱a̱ ngayeje ni xi kisꞌiee̱,
22tsi̱ꞌe̱ nga akóyaá xota̱ xi tjiín xaá, xikótsꞌèn kamámejeén kui,
ko̱jo nga ko̱kóyaá kjo̱a̱kjíntakoón xota̱ xi xchaá.
23Jaskan jachó xota̱ Israee̱l ki̱a̱ nangi Ejiptoo̱,
kó xota̱ tji̱e̱e̱ Jakoo̱b ki̱a̱ kisꞌińdo ki̱a̱ nangi Kaa̱n.
24Néná katsꞌén nga kamákjín xota̱ na̱xi̱ńdaá,
kó ꞌniú ngase katsꞌén, ta̱bo̱a̱jiín xota̱ xi kondra̱a̱.
25Kó asíkjo ini̱ma̱a̱ xota̱ Ejiptoo̱, tsi̱ꞌe̱ nga katsꞌénchꞌó xota̱ na̱xi̱ńdaá,
kó kui xotaa̱ katsꞌénkjién kjo̱a̱mañaa̱ nga katsꞌén ni xi ndajín kondra̱a̱ mosoo̱.
26Ta̱nga Néná katsangiya Moisee̱, kui xi mosoo̱ ma,
ko̱jo Aaroo̱n, kui nda̱ xi Kui jaꞌájin.
27Kó kui jaá katsꞌénkjién nga katsjaá eén ko̱jo nga katsꞌén chi̱bo̱a̱,
ko̱jo ni xi fíndikónná ki̱a̱ nangi Kaa̱n.
28Néná katsangiya ngo jñó, kó achichí ꞌniú kisꞌiejñó,
ta̱nga xota̱ Ejiptoo̱ nde katsꞌénsénjiín eén.
29Néná jín katsꞌén ndáfoaa̱,
kó katsꞌénkjiesón ngayeje tji̱o̱o̱.
30Ngayeje nangi Ejipto̱ kisꞌikitsieni xkji̱e̱,
ngaskande ngi̱yaꞌmaa̱ já ree̱ kisꞌie xkji̱e̱.
31Sꞌe̱ Néná katsjá ngo kjo̱a̱,
kó ngayeje na̱xi̱ńdaá kisꞌikitsieni chisien ko̱jo ńtí.
32Néná ndókoá katsangiyaa̱ xikoó tsi stsé,
kó katsangiyaa̱ ndiꞌí xí tjítíngá kui tꞌanangii̱.
33Kó katsꞌénkjié nínga kjiꞌii̱ tostsi̱je̱è, ko̱jo yáꞌingoo̱,
kó iskjítꞌó yá xí tjín ki̱a̱ na̱xi̱ńdaá.
34Ta̱ ngo tsí kjo̱a̱ katsjá, kó kjindibá achichí kjín chjo̱bo̱a̱,
35xi katsꞌénkjié ngayeje xka̱ xi tjín kuí tꞌanangii̱,
kó iskjinie ngayeje to xi tsjá tꞌanangii̱.
36Kó katsꞌénꞌoón nga katsꞌénkꞌién ngayeje ndí xí tjoón xotaa̱ kui tꞌanangii̱,
katsꞌénkꞌién ndí xí kamá to xi tjoón ngaꞌniú xí kisꞌiee̱.
37Ta̱nga Néná tsꞌaxiéni ki̱a̱a̱, nga ndyi̱yaꞌa ni to̱ntiboa ko̱jo ni to̱nsinié,
kó ngi̱jii̱n xota̱ tji̱e̱e̱, nde ngojín xi kastingí.
38Xota̱ Ejiptoo̱ achichí tsjá kamaá nga je jatjo,
ngatꞌa̱ katsakjónní ni xi ndajín xi kjindibánié.
39Néná ngo ṉdi̱ katsꞌénkjién nga ni̱xtjii̱n xi askoo̱n kui xotaa̱,
kó nga jñoó ngo ndiꞌí katsꞌéntsijennii̱.
40Kui xotaa̱ tsíꞌá nichinie,
kó Néná katsangiyaa̱ ni̱sie tosafoá,
kó katsꞌénkꞌíxió bojoó, nga katsjaá pan xi kjindibáni ndiꞌakꞌajmii̱.
41Kó jó tjín katsꞌén ngo ndi̱jo̱, kó ki̱a̱ jatjonii̱ ndáfoa,
xi kamá xikoó tsi ngo ndejèꞌ xi tsꞌénmonga xtji̱e̱e̱n nangi kixií.
42Ngatꞌa̱ Néná jaꞌátsjiee̱n én tsjiee̱,
kui xi katsjaá Abraa̱n, nda̱ xi mosoo̱ kamá.
43Kó bo̱a̱ tsꞌén tsꞌaxié xota̱ na̱xi̱ńdaá nga tsja kamaá,
kó kui xota̱ na̱xi̱ńdá xí Néná jaꞌájii̱n, kisie má nga tsja kamaá,
44kó katsjaá tꞌanangii̱ xota̱ xi chji̱a̱ni na̱xi̱ńdaá,
kó iskjíbé ni tjié, xi je kje̱ꞌe xota̱ na̱xi̱ńdá katsꞌénxá ngíni.
45Tsi̱ꞌe̱ nga sa̱ꞌínkjatjosón kjo̱a̱botíxomaa̱, ko̱jo nga sku̱i̱e̱ndikón kjo̱a̱kitii̱.
¡Nganiꞌántsjaà Néná!
Currently Selected:
Xo̱jo̱n Salmoo̱ 105: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
