Xota̱ Filipo̱ 4

Bi̱ tsꞌén íni̱jmì Pabloo̱ kjo̱a̱a̱ nga ngatsjéni̱xtjin tsja ngatamajnú kjo̱a̱a̱ Ndi̱a̱ná

1Kuíni nga jún bo̱a̱ ndí ntsꞌie xi achichí mejénna nga skuie an ko̱jo xi tjóna, jún boá xi kjo̱a̱tsjana ko̱jo chjií xá xi je katsꞌen an. Jún ndí ntsꞌie xi tjóna, ꞌniú ti̱ndyiàjnú ngatꞌaa̱ Ndi̱a̱ná.

2ꞌNiú míꞌáa̱ na̱ Ebondiaa̱ ko̱jo na̱ Síntikee̱, tsi̱ꞌe̱ nga ti̱kuii ni xi sa̱ꞌínkjó nga joó ngatꞌaa̱ Ndi̱a̱ná. 3Kó ji ꞌniú míꞌaá, ji xi ꞌniátakoón nga nijan ndyi̱niꞌánxá, tsi̱ꞌe̱ nga ko̱si̱ke̱je ji kui ínchjiín, kui xi nijan katsꞌénxájo̱na nga ini̱jmi án éntjatsi̱e̱e̱ Néná, ko̱jo Klementee̱ ko̱jo xota̱ xi ngase xi nijan katsꞌénxájo̱na. Kui xi je kjitꞌa jaꞌeén xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjii̱n.

4Tsjangatamajnú ngatsjéni̱xtjin ngatꞌaa̱ Ndi̱a̱ná. Ingo ndi̱yà bo̱a̱ xian nginíjnúꞌun: ¡Tsjangatamajnú! 5Ngayeje xota̱ xi ngatamabejnú nga xota̱ xi ndaxota̱jnú. Ndi̱a̱ná je tikón tiña.

6Ngata̱ jmíjín ni xi nda̱ ngatamajnú, ta̱sá ngayeje ni xi machjiénjnú tꞌíyájnúu̱ Néná nga ko̱ndókjo̱a̱jnúu̱. Chji̱a̱ꞌajnúu̱, kó ti̱ bo̱a̱ ti̱ tsꞌén te̱ꞌéjnúu̱ ndokꞌóchjì kjo̱a̱a̱ ni xi tsꞌéntsjájnú. 7Kó kjo̱a̱xioó Néná, kui kjo̱a̱xió xi foaꞌatjoón ngayeje kjo̱a̱kjíntakoón, skoón ini̱ma̱jnú ko̱jo kjo̱a̱kjíntakónjnú ngatꞌaa̱ Kristo̱ Kjisoo̱.

Bi̱ tsꞌén akóyá Pabloo̱ kjo̱a̱a̱ ni xi si̱ꞌankjójnú

8Kó nga fetꞌaa̱ já ntsꞌie, kuí nii̱ xi ti̱ꞌankjójnú: ngayeje ni xi ja̱koxi̱, ngayeje ni xi yandikón ngindyi̱ko̱n Néná, ngayeje ni xi kixi̱, ngayeje ni xi tsjie, ngayeje ni xi ꞌniú nda, ko̱jo ngayeje ni xi tjiín jaꞌén xi nda. Tsi tjín ni xi nda ko̱jo ni xi tsoboaá nga niꞌántsjá, kuí nii̱ xi ti̱ꞌankjójnú.

9Ti̱ꞌankjatjosónjnú ni xi kamájnú nga akoyájnúꞌun, ni xi je kachjábéjnú, ni xi je kandaꞌyájnú ko̱jo ni xi kitsitsijenjnúu̱ nga katsꞌen an, kuí nii̱ xi ti̱ꞌánjnú. Bo̱a̱ tsꞌén nga kui Néná xi tjiín kjo̱a̱xioó kꞌuijñájinjnú.

Pabloo̱ bi̱ tsꞌén katsjaá ndokꞌóchjì xota̱ na̱ngo̱xi̱ xi chji̱a̱ni Filipo̱, ngatꞌa̱ asíko̱jo

10Achichí tsja mana ngatꞌaa̱ Ndi̱a̱ná nga jachó ni̱xtjin nga jún kiniꞌánkjó nginíjnúꞌun. Kjénní nga kiniꞌánkjójnúꞌun, ta̱nga kisꞌiejínjnú ngi̱ndie kótsꞌèn ko̱si̱ko̱jójnúꞌun. 11Jmí tsi kui nii̱ tꞌíxiánjnúꞌun kjo̱a̱a̱ nga ngo ni chjiénna, ngatꞌa̱ je be an kótsꞌèn nga chjiéngá tsja ka̱mana ta̱ xikótsꞌèn tikòn an. 12Je be an kótsꞌèn mindyión nga xota̱ ni̱ma̱, kó ti̱ je be an kótsꞌèn mindyión nga tsie ni tjínná. Je kamána nga jaꞌajin an ta̱jmì niní, ta̱ bo̱a̱a̱ tsi kitsiena ko̱jo tsi bojóna, ko̱jo tsi tsꞌatio tjínna ko̱jo tsi ta̱ jmíjín ni xi tjínna. 13Kristoo̱ xí tsjangaꞌniúna, tsi̱ꞌe̱ nga xchíkjo̱a̱na ta̱jmì niní. 14Ta̱nga jún, nda kiniꞌánjnú nga kamándasénjnú kjo̱a̱a̱ kjo̱a̱ni̱ma̱na.

15Kó xikótsꞌèn nga je yàjnú jún, xota̱ xi chji̱a̱ni Filipo̱, nga kjiꞌanga ítsꞌi̱yañáa̱ nga ini̱jmi án éntjatsi̱e̱e̱ Néná, kjiꞌanga jatjoni an nangi Masendonia̱, nde ngojín xota̱ na̱ngo̱xi̱ xi katsjá ko̱jo tsi asíko̱jona, ta̱ jún chií xi bo̱a̱ kiniꞌánjnú. 16Ngatꞌa̱ nga kisꞌijña an na̱xi̱ńdá Tesalónika̱, ngo jó ndi̱yà kanangiyajnúꞌun ni xi kamáchjiénna. 17Jmí tsi chji̱e̱ xi tsꞌénmongase an, ta̱sá tsꞌénmongase an nga tsie ngase kjo̱a̱cho̱n kꞌuiéjnú ngindyi̱ko̱n Néná. 18Ngayeje ni xi kanangiyajnúꞌun je kiniꞌánkꞌasꞌienna, kó ngaskande tsꞌatio tjínna ngotꞌe̱. Epafronditoo̱ katsꞌénkꞌasꞌienna ni xi kanangiyajnúꞌun, kó kui nii̱ xi katsꞌéndo̱jò ni xi kamáchjiénna. Kuí nii̱ xi xikoó ngo kjo̱a̱nda xi tjiín nisije̱n, ngo kjo̱a̱tjó xi tsja maa̱ Néná nga kjíbé. 19Kui Néná xi tsꞌénxájo̱ an tsja̱ajnú jún ngayeje ni xi chajajnú, xikó kjiꞌi kjo̱a̱cho̱o̱n kjo̱a̱je xi tjiín Kristo̱ Kjisoo̱. 20Néná xí Na̱ꞌmii̱ kui tsi̱ꞌe̱ ngatama kjo̱a̱jee̱ ngatsjéni̱xtjin. Bo̱a̱ kjiꞌi.

Pabloo̱ bi̱ tsꞌén katsꞌénkjietꞌa xo̱jo̱o̱n

21Tinde bo̱a̱ tꞌínjnú ngayeje xota̱ tsjiee̱ Kristo̱ Kjisoo̱. Já ntsꞌie xi nijan síndojo̱na tinde xò bo̱a̱ tsó. 22Ti̱ bo̱a̱ ti̱ tsꞌén tinde xò bo̱a̱ tsó ngayeje xota̱ tsjiee̱ Néná. Ti̱ tsꞌentíndejnú kui xota̱ xi ndyi̱tsꞌènxá ndiꞌaa̱ nda̱ xtitjoón xi ꞌmí Sesaa̱.

23Nga tꞌíjñajinjnú kjo̱a̱ndaa̱ Ndi̱a̱ná Jesukristoo̱. Bo̱a̱ kjiꞌi.

Currently Selected:

Xota̱ Filipo̱ 4: MAIX

Highlight

Compare

Copy