Xota̱ Kolosa̱ 1

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Kolosa̱

1Án boá xi ꞌmína Pabloo̱, nda̱ apostroo̱#1:1 “Xi kanangiyaa̱” tsó “nda̱ apostro̱” axa̱ “já apostro̱” nga én ngriengo̱. Jesukristoo̱ ngatꞌa̱ bo̱a̱ tsꞌén kamámejeén Néná, ko̱jo nda̱ ntsꞌié xí ꞌmí Timoo̱, 2niꞌántindejne̱ jún xi xota̱ tsjiee̱ Néná, ko̱jo xi sꞌijinjnú Kristo̱ Kjisoo̱ xi tindyiónjnú na̱xi̱ńdáꞌniú Kolosa̱. Néná xí Na̱ꞌminá, ko̱jo Ndi̱a̱ná Jesukristoo̱ ngatsjájnú kjo̱a̱ndaa̱ ko̱jo kjo̱a̱xioó.

Bi̱ tsꞌén tsíꞌatjé Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Kolosa̱

3Ngatsjéni̱xtjin nga ndokjo̱a̱tjéjne̱ jún, boeꞌéjne̱ ndokꞌóchjì Néná, Na̱ꞌmii̱ Ndi̱a̱ná Jesukristoo̱. 4Ngatꞌa̱ jè kandaꞌyájne̱ kjo̱a̱a̱ nga sꞌijinjnú Kristo̱ Kjisoo̱, ko̱jo kjo̱a̱a̱ nga tjójnú ngayeje xota̱ tsjiee̱ Néná. 5Jún, bo̱a̱ ndyi̱niꞌánjnú, ngatꞌa̱ ndeskande nga kandaꞌyájnú én xí ja̱koxi̱ xi yaꞌa éntjatsi̱e̱e̱ Néná, ndyi̱chiyájnúu̱ ni xi Néná tikóntjoó ndiꞌakꞌajmii̱ xi tsja̱ajnú.

6Kui éntjatsi̱e̱ xi kandaꞌyájnú, jè tjíꞌbíni̱jmì ngayeje són nga̱sondiee̱, kó nda tjítsꞌeén xotaa̱, xikó kamá ngi̱jinjnú ni̱xtjin nga kamáyà ja̱koxi̱jnú kjo̱a̱ndaa̱ Néná. 7Kuí eén xi kamájnú nga akóyájnú nda̱ ntsꞌié xi tjóná xi ꞌmí Epafraa̱, kui nda̱ xi kixi̱ fíjo̱ xaá, nga tjítsꞌén xaá Jesukristoo̱ nganda tsa̱jún. 8Kuí boá xi katsóyàjne̱ kjo̱a̱a̱ jún, ko̱jo kjo̱a̱a̱ nga A̱si̱énni̱xtjii̱n Néná xí katsꞌén nga ndyi̱niꞌántjójnú xingi̱jnú.

9Kuíni nga ji̱n ndeskande koó nga kandaꞌyájne̱, ngatsjéni̱xtjin ndyi̱ndokjo̱a̱tjéjne̱ jún, ko̱jo ndyi̱chjiáꞌájne̱ Néná tsi̱ꞌe̱ nga ko̱kó cha̱n cha̱njnú ni xi mejeén nga si̱ꞌánjnú jún, ko̱jo tsi̱ꞌe̱ nga tsja̱ajnú ngayeje to̱ko̱ya kjo̱a̱kjínkón, ko̱jo nga A̱si̱énni̱xtjii̱n xi tsja̱ajnú nga ka̱makjínjnú ni xi tsi̱ꞌe̱ Néná. 10Bo̱a̱ ngatama tsi̱ꞌe̱ nga nda si̱ꞌánjnú xikó tsꞌén xota̱ xi tsi̱ꞌe̱ Ndi̱a̱ná, ko̱jo nga si̱ꞌánjnú ni xi tsja maa̱ Néná, ko̱jo nga si̱ꞌánjnú ngayeje to̱ko̱ya ni xi nda, ko̱jo nga nda ngase xcha̱jnú kókón Néná. 11Ngasakó ngasejnú ngaꞌniú, xikó kjiꞌi kui ngaꞌniú xí tjiín kui Néná xí tjiín kjo̱a̱jee̱, tsi̱ꞌe̱ nga xchíkjo̱a̱jnú ta̱jmì niní, kó ngatꞌiéjnú kjo̱a̱chiyákjo̱a̱. 12Tsjangatꞌiéjnú nga ko̱e̱ꞌéjnúu̱ ndokꞌóchjì Na̱ꞌmii̱, ngatꞌa̱ kuí Na̱ꞌmii̱ xi je íjñandaná, tsi̱ꞌe̱ nga sa̱kóná ngi̱ndie xi sakoó xota̱ tsjie xi chji̱a̱ni ngi̱ndie nínga tsijee̱n. 13Néná boá xi xín katsꞌénkjaꞌaboaꞌáná ngaꞌniuú ngi̱ndie nínga jñoó, kó jè kijíjo̱ná nínga tsꞌénbotixómá ndí tjoó, 14kui xi íchjítjéná, tsi̱ꞌe̱ nga jatjoꞌa ñá, ko̱jo nga kiniꞌánjetakoón jéná.

Bi̱ tsꞌén akóyá Pabloo̱ ni xi katsꞌén Kristoo̱ nganda tsa̱ñá

15Kjiꞌanga ndyi̱yà kókón Kristoo̱, ja̱ Néná xi májín yaa̱ xí ndyi̱yà kókón. Kristoo̱ boá xi ndií Néná xi tjón tikón ngindiee̱ nga kiniꞌánda ngayeje ni xi kiniꞌándaa̱. 16Ngatꞌa̱ ta̱ngatꞌanii̱ kui nga Néná katsꞌénda ngayeje ni xi tjín ndiꞌakꞌajmii̱ ko̱jo nga̱sondiee̱, ni xi ya ko̱jo ni xi yàjín xikoó xi ngito̱ko̱, ko̱jo xi tjiín xaá, ko̱jo xi tjiín ngaꞌniú, ko̱jo xi botixómá. Ngayeje nii̱ xi kamánda ngatꞌaa̱ kui, kó kuí xí tsi̱ꞌe̱ ka̱ma. 17Kristoo̱ tikón ndeskande ngindiee̱ nga kiniꞌánda ngayeje nii̱, kó ta̱ngatꞌanii̱ kui nga síndonda ngayeje nii̱. 18Kristoo̱ boá xi tikóntjoón xota̱ na̱ngo̱xi̱i̱, kó xota̱ na̱ngo̱xi̱i̱ kuí boá xi yojoo̱ Kristoo̱. Kristoo̱ boá xi tjón jaꞌáꞌyaá ngi̱jii̱n xota̱ xi je jesoón, tsi̱ꞌe̱ nga kui xi nkꞌa ngase kꞌuijñaá ngayeje ni xi tjiín. 19Ngatꞌa̱ tsja kamaá Na̱ꞌmii̱, nga íjñajii̱n Jesukristoo̱ xi kókón kuí. 20Kó nga ngatꞌaa̱ Kristoo̱ nga Néná boá xi katsꞌén nga kjo̱e̱ꞌekón nginií ngayeje xi síndotꞌaxiín, xi síndo kui nga̱sondiee̱, ko̱jo xi síndo ndiꞌakꞌajmii̱, kó Kristoo̱ boá xi katsjá kjo̱a̱xioó ta̱ngatꞌanii̱ jín xí iskjitjón tꞌa kroo̱.

21Jún ngasꞌe̱ kixindyiontꞌaxínjnúu̱ Néná, kó ngi̱jin ini̱ma̱jnú kondraa̱ kui kamájnú, kjo̱a̱a̱ ni xi ndajín xi kiniꞌánjnú, 22ta̱nga ngotꞌe̱ ꞌne̱, Néná boá xi katsꞌén nga kjoéꞌe̱chon nginíjnúu̱, ta̱ngatꞌanii̱ nga Kristoo̱ katsꞌénkꞌasꞌien yojoo̱ nga kiniꞌánkꞌién, tsi̱ꞌe̱ nga ka̱ma ku̱i̱ndyiajnú ngindyi̱ko̱n Néná, xikoó xota̱ xi tsjie, xi jmíjiín ni xi ndándí, ko̱jo nga jmíjín xi ka̱maa̱ chꞌo tsꞌén ku̱i̱chji̱a̱taꞌin. 23Bo̱a̱ ka̱ma tsi ja̱koxi̱ nga ꞌniú tindyiàjnú ko̱jo tsi ꞌniú tikón kjo̱a̱sꞌijinjnú, ko̱jo nga jmíni̱xtjin kju̱i̱e̱ kjo̱a̱chiyá xi tikónjnú, kjo̱a̱a̱ kui éntjatsi̱e̱e̱ Kristoo̱ xi je kandaꞌyájnú, kuí eén xi je tjíꞌbíni̱jmì ngayeje són nga̱sondiee̱, kó an Pabloo̱ katseꞌéxána nga kꞌuini̱jmì án kui eén.

Bi̱ tsꞌén akóyá Pabloo̱ kjo̱a̱a̱ xá xi katseꞌeé

24Ngotꞌe̱ ꞌne̱, achichí tsja mana kjo̱a̱a̱ kjo̱a̱ni̱ma̱ xi tsꞌénfoaꞌatio an nganda tsa̱jún, ngatꞌa̱ bo̱a̱ tsꞌén kjimando̱jona yojona nga tsꞌénfoaꞌatio an kjo̱a̱ni̱ma̱ xi tjisákoó Kristoo̱ ngandaa̱ xota̱ na̱ngo̱xi̱i̱, ngatꞌa̱ xota̱ na̱ngo̱xi̱i̱ kuí boá xi yojoo̱ Kristoo̱. 25Bo̱a̱ tsꞌén katsꞌenxá án ngi̱jii̱n xota̱ na̱ngo̱xi̱i̱, xikótsꞌèn índa Néná nga katsjána xá nganda tsa̱jún, tsi̱ꞌe̱ nga kꞌuini̱jmì yeje an eén Néná. 26Tsꞌénꞌbini̱jmì án kui én xí kisꞌijña ꞌma ni̱xtjin xchá jàn, kui xi akakojiín xota̱ xi kisꞌie ngasꞌe̱, ta̱nga ngotꞌe̱ ꞌne̱, tjibókoo̱ xota̱ na̱xi̱ńdá tsjiee̱ Néná. 27Néná kamámejeén akoó kui xotaa̱, kókjiꞌi kjo̱a̱cho̱o̱n kjo̱a̱jee̱ ni xi tjiꞌmaá ngi̱jii̱n xota̱ xi tjín ngayeje nga̱sondiee̱, kó kui ni xi tjiꞌmá xi tjisꞌíjñátsijen ngotꞌe̱ kuí boá Kristo̱ xi tikónjinjnú, kó ta̱ngatꞌaa̱ kuí boá nga ndyi̱chiyájnú nga sa̱kójnú kjo̱a̱je.

28Kristo̱ xi̱ꞌbi̱ xi ndyi̱ꞌbíni̱jmìjne̱, kó ndyi̱botíxomajne̱ ngayeje xotaa̱, kó ndyi̱bokoyájne̱ nga ndyi̱niꞌánkjiénjne̱ ngayeje kjo̱a̱kjínkón xi tsja̱ajne̱ Néná, tsi̱ꞌe̱ nga kui xotaa̱ xi ka̱ma xikoó xota̱ xi sꞌijii̱n Kristoo̱ xikótsꞌèn mejeén Néná. 29Ta̱ngatꞌanii̱ kui nii̱ nga ꞌniú tjítsꞌenxá án nga tsꞌenkjién án ngayeje ngaꞌniúna, ko̱jo ngayeje ngaꞌniú xi tsjána Kristoo̱.

Currently Selected:

Xota̱ Kolosa̱ 1: MAIX

Highlight

Compare

Copy