Abndíyaa̱ 1
1
Én xí Néná katsangiya kondra̱a̱ na̱xi̱ńdá Endoo̱n
1Ni xi akakoo̱ Abndiyaa̱, bi̱ tsó Ndi̱a̱ná kui xi Néná:
Jè kandaꞌyájne̱ ngo én xí Ndi̱a̱ná kui xi Néná katsóyà, nga ngo nda̱ chji̱ni̱e̱ꞌén jè kanangiya ngayeje na̱xi̱ńdaá, tsi̱ꞌe̱ nga bi̱ ka̱tso̱:
¡Ti̱sítji̱e̱njnú! ¡Tjianki̱xkánjo̱ na̱xi̱ńdá Endoo̱n!
2Ji Endoo̱n, jí boá xi ngo na̱xi̱ńdá xí ꞌniú chichí ngase sa̱ꞌiin ji,
kó achichí ꞌniú si̱ꞌanchꞌoo̱.
3Kjo̱a̱nkꞌakoo̱n ini̱màa̱ boá xi tsꞌenṉcha̱joo̱,
ngatꞌa̱ ki̱a̱ tindyin ji ngi̱ndyioó ndi̱jo̱jee̱, ki̱a̱ nga̱són na̱xi̱i̱,
kó nga nkꞌa tikón ngi̱ndie nínga tindyin ji, bi̱ tsó ini̱màa̱:
ꞌYá xí ka̱maa̱ kꞌo̱jmingína ngaskande tꞌanangii̱.
4Ta̱nga, ndatsi nkꞌa kꞌuíntji̱n ji xikoó ja̱a̱,
kó ndatsi ngi̱jii̱n ńñoo kꞌuijñí ji ndiꞌáa̱,
ngaskande ki̱a̱a̱ kꞌojmingíñaa. Tsó Ndi̱a̱ná kui xi Néná.
5Tsi ji kjo̱chókoón chejé xí fochó nga jñoó,
a mí tsí ko̱e̱je̱jochejé ngayeje ni xi mejeén jí.
Kó tsi ji kjo̱chókoón xota̱ xi ꞌboje̱n tostsi̱je̱è,
a ku̱i̱ꞌíndojiín chiboa én tostsi̱je̱è xí tse̱.
6¡Xi̱xꞌi̱a̱n xò Esauu̱ nga je kiniꞌánkjatsón!
Kó jè kachjaꞌátikó ngayeje nii̱,
jè kachjeꞌéxiín kjo̱a̱cho̱n xi síndoꞌmaá katsaki.
7Xota̱ xi nijan ma ji, je ki̱a̱ katsꞌénkjií xtji̱e̱e̱n nínga tikón tsindioó nangìi̱,
xota̱ xi nda kichꞌé ji, tsꞌenṉcha̱joo̱, kó kondra̱ tse̱ je síndoni,
xota̱ xi nijan chiniejnú nichinie ngo chja̱ya̱ je íjñaá.
¡Kó ji, nde kamákjínjiín kui nii̱!
8Kó kui ni̱xtjii̱n, a ka̱májínna sa̱ꞌinkjié An kjo̱a̱kjínkoón Endoo̱n. Tsó Ndi̱a̱ná kui xi Néná.
Kó a ka̱májínna sa̱ꞌinkjié An kjo̱a̱kjíntakoón na̱xi̱i̱ Esauu̱.
9Stsa̱kjonní já chꞌokóo̱n na̱xi̱ńdáꞌniú Temaa̱n,
kó kju̱i̱e̱ jáxíꞌín xi chji̱a̱ni na̱xi̱i̱ Esauu̱,
ta̱ngatꞌanii̱ ni xi ndajín xi ka̱maa̱.
Jé xí katsꞌén Endoo̱n
10Ta̱ngatꞌanii̱ nga chꞌo tsꞌén kiniꞌínkꞌín ji Jakoo̱b ntsꞌie,
achichí kjo̱a̱soboá ku̱i̱tje jí, kó ngatsjéni̱xtjin si̱ꞌankjie ndi̱ya̱à.
11Kó kui ni̱xtjii̱n kamáyè ji nga xota̱ xi xín na̱xi̱ńdáꞌniú chji̱a̱ni kijíjo̱ kjo̱a̱cho̱o̱n,
kó ki̱a̱ tsꞌasꞌienni nga̱ntjo̱a̱a̱ na̱xi̱ńdáꞌniuú,
sꞌe̱ kjo̱a̱chꞌáṉcha̱ katsatonni nga katsꞌénkabii̱ xkjín na̱xi̱ńdáꞌniú Jerusalee̱n,
kó ko̱jo ji, ki̱a̱ nijan kamá ji kui xotaa̱ nga.
12Ngata̱ ta̱ tsitsijindéjìi̱n ni̱xtjin kjiꞌanga ntsꞌie ji ndajín ka̱mataꞌin,
ngata̱ tsjajín maá kjo̱a̱a̱ ni xi ka̱maa̱ xota̱ tji̱e̱e̱ Jundáa̱, ni̱xtjin nga si̱ꞌankjie,
ti̱nde ngata̱ nkꞌajín ꞌnaxié ji yojòo̱ ni̱xtjin nga nda̱ ka̱maa̱.
13Ti̱nde nga ki̱a̱jín bitjasꞌi̱n ji nga̱ntjo̱a̱a̱ na̱xi̱ńdána, ni̱xtjin nga ni xi ndajín ka̱maa̱,
ti̱nde nga tsjajín maá kui ni̱xtjii̱n, ti̱nde nga chjábéjín ji ni xi tjiín, ni̱xtjin nga ni xi ndajín ka̱maa̱.
14Ti̱nde ngata̱ ki̱a̱jín bosín ji nínga foaꞌaxtikjaá xkjín ndi̱ya̱à, tsi̱ꞌe̱ nga xota̱ xi ndyi̱mongaa̱ si̱ꞌinkꞌin ji,
ti̱nde nga niꞌínkꞌasꞌínjín ji xota̱ xi jesónjiín, ni̱xtjin nga nda̱ ka̱maa̱.
15Ngatꞌa̱ jè tikón tiña ni̱xtjii̱n Ndi̱a̱ná kui xi Néná, tsi̱ꞌe̱ ngayeje na̱xi̱ńdaá.
Xikó kjiꞌi ni xi kiniꞌín ji, bo̱a̱ kjiꞌi ni xi si̱ꞌanjoo̱.
Ni xi kiniꞌín ji, ti̱kuíní ni xi kꞌo̱kanieé taki ji.
Néná boá xi ko̱tíjeé ngayeje na̱xi̱ńdaá
16Xikótsꞌèn ikitjatiójnú kjo̱a̱ni̱ma̱ ki̱a̱ nga̱són na̱xi̱ ndikónna,
ti̱ bo̱a̱ ti̱ tsꞌén kjo̱a̱ꞌatio ngayeje na̱xi̱ńdaá, xikótsꞌèn sa̱ko̱ó kui.
¡Jo̱o̱n, bo̱a̱ ka̱maa̱, kó tsá sa̱ꞌiín yojoo̱!
Kó xikoó tsi jmíni̱xtjin kisꞌińdo.
17Ta̱nga ki̱a̱ na̱xi̱ Sioo̱n, kꞌuíndo ngo xtín xota̱ xi kꞌo̱ngi xi kjo̱tjoꞌa,
kó ki̱a̱ boá nínga ngi̱ndie ndikón ka̱ma.
Kó xota̱ tji̱e̱e̱ Jakoo̱b, sa̱kó nginií tꞌanangi xi kisꞌiee̱ ngasꞌe̱.
18Xota̱ tji̱e̱e̱ Jakoo̱b, ko̱jo xota̱ tji̱e̱e̱ Kosiee̱, xikoó tsi ndiꞌí ka̱ma,
kó xota̱ tji̱e̱e̱ Esauu̱, xikoó tsi xka̱ kixí xi ku̱i̱ti̱ ngaskande nga kju̱i̱e̱ ka̱ma,
kó nde ingojín xota̱ tji̱e̱e̱ Esauu̱ xi kꞌuíndo ngase,
ngatꞌa̱ Ndi̱a̱ná kui xi Néná boá xi je bo̱a̱ katsó.
19Xota̱ xi chji̱a̱ni nangi Nengee̱b,
kuí boá xi tsi̱ꞌe̱ ka̱ma nangi nínga na̱xi̱i̱ Esauu̱,
kó xota̱ xi chji̱a̱ni Sefela̱, kui tsi̱ꞌe̱ ka̱ma nangii̱ xota̱ Filisteaa̱,
kó ti̱ kui tsi̱ꞌe̱ ka̱ma nangii̱ xota̱ tji̱e̱e̱ Efraii̱n,
ko̱jo kꞌijñaá nangi Samaria̱ nga,
kó xota̱ tji̱e̱e̱ Benjaa̱, kui tsi̱ꞌe̱ ka̱ma nangi Ngalaa̱nd.
20Kó xota̱ xi síndoꞌniú xí chji̱a̱ni jájuún xota̱ tji̱e̱e̱ Israee̱l,
kui xi síndo ngi̱jii̱n xota̱ Kanaa̱n, ko̱jo ngaskande nangi Sarepta̱,
ko̱jo xota̱ xi síndoꞌniú xí chji̱a̱ni na̱xi̱ńdáꞌniú Jerusalee̱n,
kui xi síndo Sefara̱nd, kui tsi̱ꞌe̱ ka̱ma ndí nangi xí chji̱a̱ni Nengee̱b.
21Kó achichí tsjá ka̱maa̱ nga je katsꞌén, nga ko̱e̱je̱nijíngí na̱xi̱ Sioo̱n,
tsi̱ꞌe̱ nga kui ku̱i̱ꞌítꞌajé ngayeje nangi xi chji̱a̱ni na̱xi̱i̱ Esauu̱,
kó Ndi̱a̱ná kui xi Néná boá xi ko̱tíxomaa̱.
Currently Selected:
Abndíyaa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
