Amoo̱ 9
9
Néná ko̱tíjeé xota̱ na̱xi̱ńdaá
1Ti̱ kamábe an Néná nga ki̱a̱ sikónkixi̱tꞌa ki̱a̱ ṉchaa̱n, kó bi̱ katsó:
Tꞌiée̱ ni xi síndoo̱ nkꞌaa̱ yáséxoó, tsi̱ꞌe̱ nga ka̱matíyaá,
kó ngatamaxi̱ nga̱són to̱ko̱ ngayeje kui xotaa̱,
kó Án boá xi sa̱ꞌinkꞌién An xi kju̱i̱e̱sónjiín,
tsi̱ꞌe̱ nga jmíjín xi kjo̱tjongii̱ yojoo̱.
2Kó ndatsi ngo ti̱xa̱ sa̱ꞌínda ngaskande nínga na̱nga̱a̱ tꞌanangii̱,
ki̱a̱ kjo̱chótꞌaa̱ ndsa̱ Án nga sa̱kóna,
kó ndatsi ngaskande nkꞌajmii̱ ko̱e̱je̱nijíngí, ki̱a̱ kꞌoeje̱ngini An,
3ndatsi ki̱a̱ kꞌuíndoꞌmá nga̱soón na̱xi̱ Karmeloo̱,
ki̱a̱ kongase An, kó ki̱a̱ skjíbé Án,
kó ndatsi ngaskande nínga ꞌniú na̱nga̱a̱ ndáchíkoón kꞌuíndoꞌmána,
ki̱a̱ sangiyáa ngo ye̱ xi skji̱ni̱e̱e̱.
4Kó ndatsi kongínjo̱ꞌniú ki̱a̱ kje̱n kondra̱a̱,
ki̱a̱ sangiyáa xota̱ xi ki̱cha̱ndojó sa̱ꞌínkꞌiénni.
Kuí boá xi skotsíjen ndá ndáa̱ tsi̱ꞌe̱ nga ni xi ndajín ka̱maa̱, jmí tsi ni xi ndaa̱.
Ngaꞌniú jeè Néná
5Ngatꞌa̱ Ndi̱a̱ná kui xi Néná xí tsi̱ꞌe̱ jájuún,
kuí boá xi tsꞌénjo̱ tꞌanangii̱, kó tꞌanangii̱ bixóndó,
kó ngayeje xota̱ xi ki̱a̱ síndoo̱, kjandátjé xota̱ xi je jesoón,
kó ngayeje tꞌanangii̱ nga ko̱e̱je̱nijíngí xikoó ndejèꞌ Niloo̱,
kósꞌe̱ xikoó ndejeèꞌ nangi Ejiptoo̱, nga ki̱a̱ kju̱i̱e̱ ngaꞌniuú.
6Kuí boá xi katsꞌénda nkꞌajmii̱, ko̱jo xókíjoo̱n,
kó katsꞌénda nga ńtsoó tꞌanangii̱,
Kuí xí chji̱a̱a̱ ndáfoaa̱ ndáchíkoón,
kó ki̱a̱ kjitjónjón nga̱soón tꞌanangii̱.
¡Kuí boá xi ꞌmí Ndi̱a̱ná kui xi Néná!
Xota̱ Israee̱l sa̱tíjeé
7Jún xota̱ Israee̱l. A mí tsí ngindyikón Án,
ti̱ bo̱a̱ ti̱ kjiꞌi chjínií jún xikoó xota̱ Etiopiyaa̱ nga.
Tsó Ndi̱a̱ná kui xi Néná.
A Ánjín bo̱a̱ xi tsꞌaxié An xota̱ Israee̱l ki̱a̱ nangi Ejiptoo̱,
kó a Ánjín bo̱a̱ xi tsꞌaxié An xota̱ Filisteaa̱ ki̱a̱ Kaftoo̱r,
kó a Ánjín bo̱a̱ xi tsꞌaxié An xota̱ Siriaa̱ ki̱a̱ Kii̱r.
8Ngotꞌe̱ ꞌne̱, ndyikón Án boá xi tsꞌénkotsijee̱n xota̱ xi ndyi̱tsꞌènjeé kui ngi̱ndie nínga botíxoma,
kuíni nga sa̱ꞌinkjiéni An ki̱a̱ nga̱són tꞌanangii̱,
ta̱nga jmí tsi ngayeje xota̱ tji̱e̱e̱ Jakoo̱b xi sa̱ꞌínkjié An. Tsó Ndi̱a̱ná kui xi Néná.
9Ngatꞌa̱ Án boá xi tsja An kjo̱a̱,
kó ndiꞌaa̱ xota̱ Israee̱l kꞌuitsánieyá ngi̱jii̱n ngayeje na̱xi̱ńdaá,
xikó má tsꞌén ꞌbítsanieyá tsomií nga niꞌántsjie,
kó nde chií bixójín nga̱són tꞌanangii̱.
10Ki̱cha̱ndojó si̱ꞌankjiesónni ngayeje xota̱ jé xí chji̱a̱ni nangina,
Kui xi bi̱ tsoó: ¡Ni xi ndajiín kjo̱chótji̱ngíjínná, ti̱nde ki̱a̱jín kꞌo̱kaniéná ñá!
Néná skjinínkꞌá nginí na̱xi̱ńdá Israee̱l
11Kui ni̱xtjin jàn skjininkꞌa ngiñá An ndiꞌandikón xí katsꞌénda Ndabii̱, kui xi je ixóndoó,
kó kꞌuichjá An nínga katsee̱n xoó,
kó skjininkꞌa ngiñá An xó xí ixóndoó,
kó sa̱ꞌinda ngiñá An xikó má kisꞌie ni̱xtjin xchá jàn,
12tsi̱ꞌe̱ kui sa̱ꞌíntsi̱ꞌe̱ kui nangi xi tsangi ngasee̱ xota̱ tji̱e̱e̱ Endoo̱n,
ko̱jo ngayeje kui na̱xi̱ńdá xí ndyi̱tsꞌénkáxoma Jaꞌénna.
Tsó Ndi̱a̱na kui xi Néná xí tsꞌén kuí nii̱.
13Bi̱ tsó Ndi̱a̱ná kui xi Néná: Ngotꞌe̱ ꞌne̱,
je ndibá ni̱xtjin nga kjiꞌanga kui xi bokján tꞌanangii̱,
kjo̱chótji̱ngii̱ kui xi je ndyi̱ꞌboje̱n ni tjieé,
kó kui xi ndyi̱tsjánié too̱ tostsi̱je̱è,
kjo̱chótji̱ngii̱ kui xi ndyi̱yaꞌa kui too̱,
kó na̱xi̱i̱ bino̱ kjo̱tjoo̱, kó ngayeje nínga tji̱ngi̱i̱ ka̱mańdá má nga tsie ni kꞌuieé.
14Kó kji̱ndi̱bájo̱ ngiñá An xota̱ na̱xi̱ńdána Israee̱l, kjo̱a̱a̱ nga tsangínjo̱ꞌniú,
kó kuí, sa̱ꞌíndaya nginí na̱xi̱ńdáꞌniú xí je síndo kjitiyaa̱, kó ki̱a̱ kꞌuíndoyà,
kó ku̱i̱ꞌítji̱e̱ tostsi̱je̱è, kó kꞌuí binoo̱,
kó ku̱i̱ꞌítji̱e̱ ni tjié, kó skji̱ni̱e̱ to xi ko̱a̱ja̱a̱.
15Ki̱a̱ kꞌuindo ngiñá An ki̱a̱ tꞌanangii̱,
kó jmíni̱xtjin nga ko̱ꞌna̱xiéni ki̱a̱ tꞌanangi xi An katsjáa̱.
Eén Néná boá xi̱ꞌbi̱, Ne xi tse̱.
Currently Selected:
Amoo̱ 9: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
