Mikeaa̱ 1
1
Néná katsjaá ngo én Mikeaa̱
1Én xí Néná tsíchji̱a̱jo Mikeaa̱, nda̱ xi chji̱a̱ni na̱ngi Moresee̱t, ni̱xtjin nga atixoma Jotaa̱n, ko̱jo Akaa̱, ko̱jo Esekiaa̱, já re xi kisꞌińdo na̱xi̱ńdáꞌniú xí chji̱a̱ni nangi Jundáa̱. Kuí bí kui nii̱ xi akakoo̱ kjo̱a̱a̱ na̱xi̱ńdáꞌniú Samaria̱, ko̱jo na̱xi̱ńdáꞌniú Jerusale̱n.
Xikótsꞌèn ko̱ti̱je̱é na̱ngi Samaria̱
2¡Ndaꞌyájnú kui nii̱ ngayeje jún xota̱ na̱xi̱ńdá!
¡Tasiénnijónjnú ngayeje jún xi tindyiónjnú nga̱sondiee̱!
Néná kui xi Ndi̱a̱ná ngatama chistiko̱ kjo̱a̱a̱ jún,
jo̱o̱n, Ndi̱a̱ná xí ngatama chistiko̱ ndeskande na̱ngo̱xi̱ tsjiee̱.
3Tsitsíjenjnú ngatꞌa̱ jè tikónda Néná nga kjo̱tjoni nínga tikón,
kó kji̱ndi̱bájaya nga tsja̱jon na̱xi̱ xi tjín tꞌanangii̱.
4Ngindie se kui ku̱i̱xo̱ndò na̱xii̱,
xikó maá sieén nga ma ńdá tꞌa ndiꞌií,
kó nangi soón jó tjín ka̱ma nga ko̱kjanga,
xikótsꞌèn monga ndáfoa xi sasienjén nínga nkꞌaá.
5Kui nii̱ xi ka̱ma ta̱ngatꞌanii̱ kjo̱a̱xchán xí katsꞌén xota̱ tji̱e̱e̱ Jakoo̱b,
ko̱jo kjo̱a̱a̱ jé xí katsꞌén xota̱ Israee̱l.
Na̱xi̱ńdáꞌniú Samaria̱ boá nínga katsꞌén kjo̱a̱xchán Jakoo̱b,
kó na̱xi̱ńdáꞌniú Jerusale̱n boá ngi̱ndie xi nkꞌa,
nínga kje̱ꞌe ne katsꞌéndikón xota̱ tji̱e̱e̱ Jundáa̱.
6Kuíni nga án boá xi sa̱ꞌinkjatsón án ngayeje na̱xi̱ńdáꞌniú Samaria̱,
kó ngo ngindie nínga ꞌbítji̱e̱ tostsi̱jè ka̱ma,
sa̱ꞌingàtíkjaꞌyá an ndi̱jo̱o̱ xó xí tjíchjáꞌyáni,
kó kꞌuitsijen an xó xí kamándani ngindiee̱.
7Ngayeje ni xi Nénájín xi tsꞌéndíkón, ka̱maxi̱,
kó kjo̱a̱tjó xi tsꞌenkꞌásꞌién ku̱i̱ti̱,
sa̱ꞌinkjatsón án ngayeje ne xi tsꞌéndíkón,
ngatꞌa̱ to̱n xi ka̱mandani, to̱o̱n ínchjínmasién boá,
kó kui to̱o̱n tsi̱ꞌe̱ ínchjínmasieén ka̱má nginí.
Kjo̱a̱ndasee̱n Mikeaa̱
8Kuíni nga an achichí ndasen skjandà an,
kó kjótsoꞌbá kjiꞌixtísé an, ko̱jo kjótsoꞌbá kjiꞌixtí an.
Ni̱ma̱ xian án nga skjandáya an xikoó cho̱ chakaa̱l,
ko̱jo xikoó ni̱sie abestruu̱.
9Ngatꞌa̱ nínga kiniꞌánꞌoón na̱xi̱ńdáꞌniú Samaria̱ ngiti̱ ka̱mandayajín,
kó ngaskande na̱xi̱ńdáꞌniú Jundáa̱ stso̱bo̱a̱a̱ nga,
kó kui nii̱, ngaskande nga̱ntjo̱a̱a̱ na̱xi̱ńdána kjo̱chó,
ki̱a̱ ngamasiee̱n na̱xi̱ńdáꞌniú Jerusalee̱n.
10Ngata̱ ꞌmíyàjínjnúu̱ kui nii̱ xota̱ xi chji̱a̱ni Ngaa̱t,
ti̱nde ngata̱ chaꞌájínjnú, ti̱nde ngata̱ ni̱ma̱jín ꞌmíjnú,
ta̱sá ki̱a̱ tꞌítikjájinjnú ngi̱jin chojoo̱, ki̱a̱ Bee̱t-Afraa̱.
11Jún xota̱ xi ndokjo̱a̱nijnú ki̱a̱ na̱xi̱ńdáꞌniú Safii̱r,
ti̱tjakjíꞌixtíjnú, kó ngatꞌiéjnú kjo̱a̱soboá.
Xota̱ xi chji̱a̱ni na̱xi̱ńdáꞌniú Sanaa̱n nde mejénjiín kjo̱tjoxie.
Xota̱ xi chji̱a̱ni na̱xi̱ńdáꞌniú Betesee̱l ndyi̱kjandà,
kó ngiti̱ ka̱májiín ko̱síko̱jójnú.
12Xota̱ xi chji̱a̱ni na̱xi̱ńdáꞌniú Maroo̱t,
kótsꞌèn mejeén nga ni xi nda ka̱mataꞌin,
xi Néná jè katsangiya ni xi ndajín,
ngaskande nga̱ntjo̱a̱a̱ na̱xi̱ńdáꞌniú Jerusalee̱n.
13Jún xota̱ xi chji̱a̱ni na̱xi̱ńdáꞌniú Lakii̱,
tꞌítaꞌniútꞌajnú karro̱jnú ndi̱je̱ xi tsá monga,
ki̱a̱ boá nínga ítsꞌi̱yanii̱ jé xí katsꞌén xota̱a̱ na̱xi̱ńdáꞌniú Sioo̱n,
ki̱a̱ boá nínga kasako kjo̱a̱xchán xí katsꞌén xota̱a̱ na̱xi̱ńdá Israee̱l.
14Kuíni nga ta̱ te̱ꞌéjnúu̱ ngo ni xota̱ xi chji̱a̱ni nangi Moresee̱t-Ngaa̱t,
ngatꞌa̱ na̱xi̱ńdáꞌniú Aksii̱b tsꞌenṉcha̱jo já ree̱ na̱xi̱ńdá Israee̱l.
15Jún xota̱ xi chji̱a̱ni na̱xi̱ńdáꞌniú Maresaa̱,
án boá xi kjoéꞌe̱jojnúꞌun ngo xota̱ xi sa̱ꞌíntsi̱ꞌe̱ ni xi tjínjnú,
kó xota̱ ngito̱ko̱o̱ na̱xi̱ńdá Israee̱l ki̱a̱ kjo̱chókꞌíndo na̱xi̱ńdáꞌniú Andulaa̱n.
16Jún xota̱ xi chji̱a̱ni na̱xi̱ńdáꞌniú Sioo̱n,
¡tꞌíjón taka takajnúu̱ tokojnú ta̱ngatꞌanii̱ ndí xí ꞌniú tjójnú!
¡ꞌNiú taka ngatamajnú xikoó cho̱ xi kjinie yojo siee̱n!
¡Ngatꞌa̱ kjinnii̱ nínga tindyiónjnú tsangínjo̱ ꞌniú ndií!
Currently Selected:
Mikeaa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
