Xki̱ 24
24
1Kó nga Balaa̱n je be ni xi mejeén Néná, jmí ni katsꞌénjín tsi̱ꞌe̱ nga kjo̱tjokjaá. Ta̱sá ki̱a̱ askotsijen ndá ndá xtji̱e̱e̱n nínga tikón nangi kixií. 2Kó nga kamábe ngayeje xota̱ Israee̱l nga ki̱a̱ síndo ndiꞌaa̱, a̱si̱énni̱xtjii̱n Néná kisꞌijñajii̱n, 3kó Balaa̱n bi̱ tsó só xi kisie:
Án boá xi ꞌmína Balaa̱n, ndií Beoo̱r,
kó jè be nda nda an ni xi mejeén Néná.
¡Ndaꞌyájnúu̱ énna!
4Ngajoo̱ Néná boá nga tsꞌénchji̱a̱ an,
Kui Néná xi tjiín ngayeje ngaꞌniuú.
Jè be an ni xi mejeén kui,
ngatꞌa̱ kje̱n kui je kisꞌijña an.
5¡Achichí tsjákón kui ndiꞌa
xi tjínjnú jún xi xota̱ Israee̱l jún!
¡Achichí tsjachon nínga síndojnú ndiꞌajnú,
xota̱ na̱xi̱ńdá Israee̱l!
6Xikó maá tsi yá xka̱jèn xí ndyi̱a̱ndi̱yà,
xikó maá ngo ngi̱ndie nínga tjitjíe̱ ni ki̱a̱ tꞌa ndejeèꞌ.
Jún boá xi xikoó naxó xí ítji̱e̱ Néná,
Xikó maá yá xí tjitjíe̱ tꞌa ngo nínga tjitjó ndáfoaa̱.
7Ji ko̱jo xota̱ tji̱e̱e̱ boá xi ka̱ma xikoó ngo ngi̱ndie
nínga tjitjíe̱ yá xí tikón ngo tꞌa nínga tjín ndáfoa.
Re xi tse̱, ꞌniú ngase ka̱ma ta̱bo̱a̱jiín Angaa̱j,
kó nínga ko̱ti̱xome ji, je ngase ko̱jo ꞌniú ngase xcha̱ndikón.
8Néná boá xi tsꞌaxiéjnú ki̱a̱ nangi Ejipto̱ jún xota̱ Israee̱l.
Ngo ngaꞌniú xi nde sꞌijinjín máná xi katsꞌénkjién nga tsꞌaxiéjnú,
xikó maá ngaꞌniuú cho̱ búfalo̱.
Ngotꞌe̱ ꞌne̱, si̱ꞌankjiejnú kondra̱jnú nga ku̱i̱xkánjo̱jnú,
kó yáyojó si̱ꞌanꞌonnijnúu̱,
kó chjátꞌójnú ńdaa̱.
9Xikó maá ngo xandi̱je̱ xi tsꞌénkjaꞌyá
ngije katsꞌénꞌoón ngo cho̱.
Bo̱a̱ má kónjnú jún xota̱ Israee̱l.
¡Ngojín xi ka̱maa̱ sa̱ꞌínxtíjnú!
Kui xota̱ xi nda sa̱ꞌínjo̱jnú,
nda ka̱mataꞌin kui.
Ta̱nga xi ndajín sa̱ꞌínjo̱jnú,
ti̱ ndajín ka̱mataꞌin nga.
10Nga tsintꞌié kuí nii̱, Balaa̱k katsꞌénda ngo tji̱ngo̱ kó yeꞌeé ngi̱ya tsja xi ingoo̱. Kó bi̱ katsoó Balaa̱n:
—Kuí xá tsíchji̱a̱ñaa tsi̱ꞌe̱ nga chꞌo tsꞌén ko̱ndókjo̱e̱taꞌin ji kondra̱na, ta̱nga je ján ndi̱yànií nga ta̱sá tiniꞌínchikonñí ji. 11¡Ngotꞌe̱ má bi̱ tꞌénní ndiꞌàa̱ ꞌne̱! Án boá xi je bo̱a̱ kixian an nga sa̱ꞌincho̱o̱n katsaki, ta̱nga Néná kamámejénjiín, ¡kuíni nga jmí ni tsjajaán!
12Kó Balaa̱n bi̱ katsoó:
—Jè bo̱a̱ kixiáa̱n xota̱ chji̱ni̱e̱ꞌén xí kanangiyení, 13nga ndatsi an ko̱e̱ꞌéní ndo̱bo̱a̱xáa̱ nga tjikítsie má to̱nsinié ko̱jo to̱ntiboa, chjiéngá kuintꞌieꞌée̱n Néná. ¡Ta̱kuítsí ni xi Néná ko̱tíxomana xi kuichjiá an! 14Jè tsꞌénfí an, ta̱nga ngindiee̱ nga kjuín án, xiyaá ni xi xota̱ Israee̱l jaskan sa̱ꞌínjo̱ xota̱ na̱xi̱ńdá xí tse̱. 15Án boá xi ꞌmína Balaa̱n, ndií Beoo̱r, kó kuí bí xi̱ꞌbi̱ xi sóna:
Je nda tsintꞌie
cha̱n cha̱n an kui eén,
16jo̱o̱n, jè tsintꞌie an
eén Néná.
Kjo̱a̱kjíntakónna,
Néná xí tikón ndiꞌakꞌajmii̱ boá xi tsangiya,
kó ni xi be an,
Néná xi tjiín ngayeje ngaꞌniuú boá xi tsja̱ana.
17Ni xi akóna Néná, kji̱e̱ fotjosónjín,
sꞌe̱ tsí ka̱ma kui nii̱.
Sꞌe̱ kꞌuijñá ngo nda̱ re ki̱a̱ na̱xi̱ńdá Israee̱l,
kui xi ꞌna̱ ka̱ma xikoó ngo ńño.
Kuí boá xi sa̱ꞌiín nga skjánjo̱ xotaa̱ nangi Moaa̱b,
kó sa̱ꞌínkjié kui xi je ki̱a̱ katsꞌén
ndiꞌaa̱ nangi kjitiyaa̱.
18Kuí boá xi sa̱ꞌín na̱xi̱ńdaá Endoo̱n,
kó sa̱ꞌiín nga skjánjo̱ ngayeje kondraa̱.
19Xota̱ na̱xi̱ńdaá Jakoo̱b,
kjo̱tjojinni ngo xi ko̱tíxoma.
Kuí boá xi sa̱ꞌínkjié ngaskande
xota̱ chiboa xi kꞌuíndo ngase na̱xi̱ńdáꞌniuú.
20Ngije katsó kui nii̱, Balaa̱n askotsijen xtji̱e̱e̱n nínga tikón nangii̱ Amalee̱k, kósꞌe̱ bi̱ tsꞌén kisie:
Amalee̱k kuí boá xi kamá ngo na̱xi̱ńdá xí ꞌniú je,
ꞌniú ngase kamá ta̱bo̱a̱jiín ngayeje na̱xi̱ńdá xí ngasee̱.
Ta̱nga jè tsá si̱ꞌankjie.
21Sꞌe̱ jaskan Balaa̱n askotsijen xtji̱e̱e̱n nínga kisꞌińdo xota̱ tji̱e̱e̱ Kaii̱n, kó bi̱ katsó nga kisie:
Xota̱ tji̱e̱e̱ Kaii̱n,
achichí ꞌniú ndiꞌa xi síndoyá,
kó ngi̱ndie nínga síndo xikó maá ndi̱jo̱.
22Ta̱nga nga kjo̱chó ni̱xtjin, ngayejee̱ nga si̱ꞌankjie,
kó xota̱ Asiriaa̱ boá xi sa̱ꞌín moso̱.
23Kó nga jetꞌani, Balaa̱n ti̱ kisie nginí nga bi̱ katsó:
¡Xi̱xꞌi̱a̱n xò xota̱ xi síndo
kjiꞌanga Néná sa̱ꞌín ngayeje kui nii̱.
24Kji̱ndi̱bá tjotso yiꞌi xi chji̱a̱ni na̱xi̱ńdá Chipree̱,
kó sa̱ꞌínkjié ngayeje na̱xi̱ńdáꞌniú
xí chji̱a̱ni Asiria̱ ko̱jo Ebee̱r!
25Jaskan Balaa̱n kijí nginí ndiꞌaa̱, kó Balaa̱k kijí nginí na̱xi̱ńdaá.
Currently Selected:
Xki̱ 24: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
